میسرہ بن حلبس فرماتے ہیں: میں سعد زرقی کے ہمراہ باہر نکلا، اس کو قربانی کے جانور خریدنے کا کافی تجربہ تھا، اس نے ایک مینڈھا خریدنے کا مشورہ دیا، اس کا سر سیاسی مائل تھا، باقی مینڈھوں سے وہ زیادہ اونچا نہیں تھا۔ اس نے کہا: یہ مینڈھا اُس مینڈھے جیسا ہے جو رسول اللہ صلی اللہ علیہ وسلم نے قربان کیا تھا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَضَاحِيِّ/حدیث: 7743]

سیدنا جابر بن عبداللہ رضی اللہ عنہما فرماتے ہیں کہ قربانی کے دن رسول اللہ صلی اللہ علیہ وسلم نے عید کی نماز پڑھائی، جب آپ صلی اللہ علیہ وسلم خطبہ اور نماز سے فارغ ہوئے تو ایک مینڈھا قربان کیا اور آپ صلی اللہ علیہ وسلم نے اس کو بذات خود ذبح کیا۔ اور ذبح کرتے ہوئے یہ دعا پڑھی بِسْمِ اللَّهِ وَاللَّهُ أَكْبَرُ اللَّهُمَّ هَذَا عَنِّي وَعَنْ مَنْ لَمْ يُضَحِّ مِنْ أُمَّتِي ” اللہ کے نام سے شروع، اللہ سب سے بڑا ہے، یا اللہ یہ قربانی میری طرف سے اور میرے ہر اس امتی کی جانب سے قبول فرما جو قربانی کرنے کی استطاعت نہیں رکھتا “ [المستدرك على الصحيحين/كِتَابُ الْأَضَاحِيِّ/حدیث: 7744]

ابن ابی رافع اپنے والد سے، وہ ان کے دادا سے روایت کرتے ہیں کہ رسول اللہ صلی اللہ علیہ وسلم نے قربانی کا جانور ذبح کرنے بعد یوں دعا مانگی:” یا اللہ یہ قربانی میری طرف سے اور میری امت کی طرف سے قبول فرما “ [المستدرك على الصحيحين/كِتَابُ الْأَضَاحِيِّ/حدیث: 7745]

سیدنا عبداللہ بن ہشام رضی اللہ عنہ صحابی رسول ہیں، ان کی والدہ زینب بنت حمید ان کو بچپن میں رسول اللہ صلی اللہ علیہ وسلم کی بارگاہ میں لائی تھیں، حضور صلی اللہ علیہ وسلم نے ان کے سر پر ہاتھ بھی پھیرا تھا اور ان کے لیے دعا بھی فرمائی تھی۔ آپ فرماتے ہیں: رسول اللہ صلی اللہ علیہ وسلم پورے گھر والوں کی طرف سے ایک ہی بکری قربانی کیا کرتے تھے۔ ٭٭ ان تمام احادیث کی اسنادیں صحیح ہیں، ان سے یہ ثابت ہوتا ہے کہ متعدد لوگوں کی جانب سے ایک بکری قربان کی جا سکتی ہے۔ اس حدیث کے رایوں کی تعداد بہت زیادہ ہے، اور جو لوگ اس موقف کے قائل ہیں کہ ایک بکری صرف ایک شخص ہی کی جانب سے ہو سکتی ہے ان کی تعداد بہت کم ہے۔ اور فوت شدگان کی طرف سے قربانی کرنے کے حوالے سے بھی احادیث موجود ہیں۔ [المستدرك على الصحيحين/كِتَابُ الْأَضَاحِيِّ/حدیث: 7746]

سیدنا حنش رضی اللہ عنہ فرماتے ہیں: سیدنا علی رضی اللہ عنہ نے دو مینڈھے قربان کیے، ایک مینڈھا نبی اکرم صلی اللہ علیہ وسلم کی جانب سے اور ایک مینڈھا اپنی جانب سے۔ اور فرمایا: مجھے رسول اللہ صلی اللہ علیہ وسلم نے حکم دیا ہے کہ میں آپ صلی اللہ علیہ وسلم کی طرف سے قربانی کیا کروں تو میں ہمیشہ (یعنی زندگی بھر) ایسا کرتا رہوں گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ یہ ابوالحسناء، حسن بن حکم نخعی ہیں۔ [المستدرك على الصحيحين/كِتَابُ الْأَضَاحِيِّ/حدیث: 7747]

رسول اللہ صلی اللہ علیہ وسلم کے آزاد کردہ غلام سیدنا ثوبان رضی اللہ عنہ فرماتے ہیں: رسول اللہ صلی اللہ علیہ وسلم نے سفر میں بھی قربانی کا جانور ذبح کیا۔ پھر فرمایا: اے ثوبان۔ اس کا گوشت سنبھال لو۔ ہم مدینہ منورہ واپس آنے تک اس کا گوشت کھاتے رہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَضَاحِيِّ/حدیث: 7748]