سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تمہیں چنا جائے گا جیسے کھجوروں کی ٹوکری سے کھجوروں کو چنا جاتا ہے، اچھے لوگوں کو اٹھا لیا جائے گا اور شریر لوگ بچ جائیں گے۔ اس لیے ہو سکے تو مر جانا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور اس کی سند میں ابوجمیل ” طائی “ ہیں۔ [المستدرك على الصحيحين/كِتَابُ الرِّقَاقِ/حدیث: 8084]

سیدنا ابوسعید خدری رضی اللہ عنہ سیدنا بلال رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے ارشاد فرمایا: اے بلال! اللہ تعالیٰ سے فقیری کی حالت میں ملنا، دولت مندی کی حالت میں نہ ملنا۔ سیدنا بلال فرماتے ہیں: میں نے پوچھا: یا رسول اللہ صلی اللہ علیہ وسلم یہ کیسے ہو گا؟ آپ صلی اللہ علیہ وسلم نے فرمایا: جب تجھے رزق ملے تو جمع کر کے مت رکھنا اور جب تجھ سے کوئی مانگے تو انکار مت کرنا۔ میں نے کہا: یا رسول اللہ صلی اللہ علیہ وسلم اس کا نتیجہ کیا ہو گا؟ آپ صلی اللہ علیہ وسلم نے فرمایا: اگر تو ایسے کرے گا تو ٹھیک ہے ورنہ تو دوزخ میں جائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8085]

سیدنا انس رضی اللہ عنہ فرماتے ہیں کہ نبی اکرم صلی اللہ علیہ وسلم فتح مکہ کے موقع پر مکہ میں داخل ہوئے تو عاجزی کی وجہ سے آپ اس قدر جھکے ہوئے تھے کہ آپ کی ٹھوڑی مبارک کجاوے کے ساتھ لگ رہی تھی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8086]

سیدنا حذیفہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جس شخص نے صبح اور اس کی سب سے بڑی امید دنیا ہوئی، اس کا اللہ تعالیٰ کے ساتھ کوئی تعلق نہیں ہے، اور جو اللہ تعالیٰ سے ڈرتا نہیں ہے اس کا بھی اللہ تعالیٰ سے کوئی تعلق نہیں ہے اور جو عامۃ المسلمین کو اہمیت نہیں دیتا، وہ ان (مسلمانوں) میں سے نہیں ہے۔ [المستدرك على الصحيحين/كِتَابُ الرِّقَاقِ/حدیث: 8087]