سیدنا عمر بن خطاب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: قیامت تک میری امت کا ایک گروہ حق پر قائم رہے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس حدیث کو ثوبان اور عمران بن حصین رضی اللہ عنہما نے بھی رسول اللہ صلی اللہ علیہ وسلم سے روایت کیا ہے۔ سیدنا ثوبان رضی اللہ عنہ کی روایت کردہ حدیث۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8594]

سیدنا ثوبان فرماتے ہیں کہ رسول اللہ صلی اللہ علیہ وسلم نے ارشاد فرمایا: میرے اللہ نے میرے لئے زمین کو سمیٹ دیا، میں نے اس کے مشرق اور مغرب کو بہم دیکھا، اللہ تعالیٰ نے سرخ اور سفید دو خزانے عطا فرمائے ہیں، اور جہاں جہاں تک میرے لئے زمین سمیٹی گئی، وہاں وہاں تک میری امت کی حکومت پہنچے گی، میں نے اپنے رب سے دعا مانگی ” میری امت کو قحط سے ہلاک نہ فرمائے “ میری اس دعا کو قبول کر لیا گیا، میں نے دعا مانگی ” میری امت پر ان کا دشمن غالب نہ آئے “ اللہ تعالیٰ نے یہ بھی عطا فرما دیا، میں نے دعا مانگی ” یہ ایک دوسرے کو قتل نہ کریں “ مجھے اس سے منع فرما دیا گیا، اور فرمایا: اے محمد! میں جب کوئی فیصلہ کر لیتا ہوں پھر اس کو لوٹایا نہیں جا سکتا، میں نے آپ کو یہ دے دیا کہ میں قحط کے ساتھ آپ کی امت کو ہلاک نہیں کروں گا، اور یہ بھی دے دیا کہ ان کے دشمن کو ان پر غالب نہیں ہونے دوں گا، تاکہ وہ ان کا قتل عام نہ کرے، اور اگر ساری دنیا کے لوگ جمع ہو جائیں اور سب ایک دوسرے کو ہلاک کرنے لگ جائیں، اور ایک دوسرے کو گرفتار کرنے لگ جائیں، اور مجھے اپنی امت پر یہ فکر ہے کہ ان کو گمراہ حکمران ملیں گے، اور قیامت قائم ہونے سے پہلے میری امت کے کچھ قبیلے مشرکوں سے جا ملیں گے، اور میری امت کے کچھ قبیلے بتوں کی پوجا کریں گے، اور میری امت جب تلوار رکھ دے گی تو قیامت تک ان سے تلوار اٹھائی نہیں جائے گی، اور آپ نے آنے والے سو سال تک کی تمام باتیں بیان کر دیں۔ پھر فرمایا: میری امت میں تیس کذاب پیدا ہوں گے، سب خود کو نبی سمجھیں گے، حالانکہ میں خاتم الانبیاء ہوں، میرے بعد کوئی نبی نہیں آ سکتا۔ لیکن میری امت میں مسلسل ایک گروہ رہے گا جو کہ حق پر جہاد کرے گا اور غالب رہے گا، ان کو برا بھلا کہنے والا ان کا کچھ بھی نہیں بگاڑ سکے گا، حتی کہ اللہ تعالیٰ کا حکم آ جائے، اور فرمایا: کوئی جنتی شخص جنت سے کوئی پھل کھائے گا تو اللہ تعالیٰ اسی جیسا پھل وہاں پر دوبارہ اگا دے گا۔ اور فرمایا: بندے کو اپنے عیال پر خرچ کرنے کا ثواب ہر صدقے سے زیادہ ملے گا، پھر وہ دینار جو جہاد کے لئے پالے گئے گھوڑے پر خرچ کیا، پھر وہ دینار جو مجاہدین پر خرچ کیا گیا، آپ نے فرمایا: نبی اکرم صلی اللہ علیہ وسلم نے اس مسئلہ کو بہت عظیم جانا، اور قیامت کے دن بتوں کے پجاری اپنے بتوں کو اپنی پشت پر لاد کر لائیں گے، اللہ تعالیٰ ان سے پوچھے گا: تم ان کی عبادت کیوں کرتے تھے؟ وہ کہیں گے: اے ہمارے رب! تو نے ہماری جانب کوئی رسول بھیجا ہی نہیں، اور نہ ہی ہمارے پاس کوئی امر آیا۔ اور تو ہماری جانب کوئی رسول بھیجتا تو ہم سب سے بڑے تیرے عبادت گزار ہوتے، اللہ تعالیٰ ان سے فرمائے گا: تمہارا کیا خیال ہے، اگر میں تمہیں حکم دیتا تو تم میری بات مان لیتے؟ وہ کہیں گے: جی ہاں۔ اللہ تعالیٰ اس بات پر ان سے پکا وعدہ لے گا، پھر ان کو دوزخ میں جانے کا حکم ہو گا، وہ دوزخ کی جانب چل پڑیں گے، جب وہ دوزخ کے قریب آئیں گے اور اس میں بھڑکتا ہوا عذاب دیکھیں گے تو واپس آ جائیں گے اور کہیں گے: یا اللہ! اس میں داخل ہونے کی ہم میں ہمت نہیں ہے، اللہ تعالیٰ فرمائے گا تم اس میں ذلیل و رسوا ہو کر داخل ہو جاؤ، نبی اکرم صلی اللہ علیہ وسلم نے فرمایا: اگر وہ لوگ پہلی مرتبہ ہی داخل ہو جاتے تو وہ آگ ان پر سلامتی والی ہو جاتی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو اس اسناد کے ہمراہ نقل نہیں کیا۔ تاہم امام مسلم نے معاذ بن ہشام کی مختصر روایت نقل کی ہے جو کہ معاذ نے قتادہ سے، انہوں نے ابوقلابہ سے، انہوں نے اسماء الرحبی سے اور انہوں نے سیدنا ثوبان سے روایت کی ہے۔ عمران بن حصین رضی اللہ عنہ کی روایت کردہ حدیث: [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8595]