ابوطفیل بیان کرتے ہیں کہ میں اور عمر اور ابن ضلیع، سیدنا حذیفہ بن یمان کے پاس گئے، اس وقت ان کے پاس دو قطاروں میں لوگ موجود تھے، ہم نے کہا: اے حذیفہ! آپ نے وہ زمانہ پایا ہے جو ہم نے نہیں پایا، اور آپ وہ کچھ جانتے ہیں جو ہم نہیں جانتے، اور آپ نے وہ کچھ سنا ہے جو ہم نے نہیں سنا، اس لئے آپ ہمیں کوئی حدیث سنایئے، شاید کہ اللہ تعالیٰ، ہمیں اس سے کوئی فائدہ دے، آپ نے فرمایا: اگر میں تمہیں وہ تمام باتیں سناؤں جو میں نے سنی ہوئی ہیں، تو تم آنے والی رات کا بھی میرے لئے انتظار نہیں کرو گے، ہم نے کہا: ہم نے اس بارے میں آپ سے نہیں پوچھا بلکہ ہم یہ پوچھ رہے ہیں کہ آپ ہمیں کوئی ایسی بات سنا دیجئے، جس کے ذریعے اللہ تعالیٰ ہمیں کوئی نفع دے۔ جب سیدنا حذیفہ رضی اللہ عنہ نے فرمایا کہ رسول اللہ صلی اللہ علیہ وسلم نے ارشاد فرمایا: مضر کا یہ قبیلہ مسلسل ایک نیک آدمی کو قتل کرتا رہے گا، اس کو ہلاک کرتا رہے گا، اس کو فنا کرتا رہے گا۔ حتی کہ ان پر اپنا ایک لشکر مسلط فرمائے گا، وہ ان کو قتل کرے گا، حتی کہ یہ قتل بہت کثیر ہو جائے گا، سیدنا عمرو بن ضلیع نے کہا: اس کی ماں نہ رہے، تو نے لوگوں کے ساتھ مضر کے ذریعے مذاق کیا ہے، آپ نے فرمایا: کیا تم غزوہ ذات الرقاع کے مجاہد نہیں ہو؟ انہوں نے کہا: جی ہاں۔ انہوں نے کہا: جب تو قیس کو دیکھے، شام نے اس سے دوستی کر لی ہے۔ تو تم اپنے ہتھیار سنبھال لینا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8655]

مالک بن ظالم کہتے ہیں: سیدنا ابوہریرہ رضی اللہ عنہ نے مروان بن حکم سے کہا: مجھے میرے محبوب ابوالقاسم صادق و مصدوق صلی اللہ علیہ وسلم نے بتایا ہے کہ میری امت کی بربادی قریش کے بے وقوف لڑکوں کے ہاتھوں ہو گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور حذیفہ بن یمان نے اس حدیث کی صحت کی گواہی دی ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8656]

سیدنا عمرو بن حنظلہ فرماتے ہیں: جب سیدنا عثمان رضی اللہ عنہ کو شہید کر دیا گیا، تو ہم سیدنا حذیفہ رضی اللہ عنہ کے پاس گئے، کچھ لوگ پہلے سے ہی ان کے پاس بیٹھے تھے۔ آپ نے فرمایا: اللہ کی قسم! مضر کی ظلمت اللہ کے ہر مومن بندے کو قتل کر دے گی، یا اس کو فتنے میں ڈالیں گے حتی کہ ان کی وجہ سے اللہ تعالیٰ ان کو نقصان دے گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8657]

سیدنا ابوبرزہ اسلمی رضی اللہ عنہ فرماتے ہیں: یہ شخص جو شام میں ہے، یعنی مروان، اللہ کی قسم! یہ شخص محض حصول دنیا کی خاطر جنگ کرتا ہے، اور وہ جو مکہ میں ہے یعنی ابن زبیر۔ یہ بھی محض دنیا کی خاطر جنگ کرتا ہے، اور جن لوگوں کو تم قراء کہتے ہو یہ لوگ بھی دنیا کی خاطر لڑتے ہیں، میرے والد نے ان سے کہا: ان حالات میں آپ مجھے کیا حکم دیتے ہیں؟ انہوں نے کہا: میں تمام لوگوں میں صرف ایک جماعت کو خیر پر سمجھتا ہوں، جنہوں نے خود کو کمزور بنا لیا ہو گا، انہوں نے اپنے ہاتھ سے اشارہ کر کے کہا: لوگوں کے مال سے ان کے پیٹ خالی ہوں گے اور ان کے بوجھ سے ان کی پیٹھیں ہلکی ہوں گی۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8658]

8659 - نافع، سیدنا ابن عمر (رضی اللہ عنہ) سے روایت کرتے ہیں کہ: انہوں نے ایک شخص سے کہا جو ان سے حجاج بن یوسف یا ابن زبیر (رضی اللہ عنہ) کے ساتھ مل کر لڑنے کے بارے میں پوچھ رہا تھا، تو ابن عمر (رضی اللہ عنہ) نے اس سے فرمایا: "ان دونوں گروہوں میں سے تم جس کے ساتھ بھی ہو کر لڑے اور قتل ہوئے، تو (تمہارا ٹھکانہ) بھڑکتی ہوئی آگ (دوزخ) میں ہوگا"۔ یہ حدیث شیخین (امام بخاری و مسلم) کی شرائط پر صحیح ہے، لیکن انہوں نے اسے اپنی کتب میں نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8659]

سیدنا خیثمہ بن عبدالرحمن فرماتے ہیں: ہم سیدنا حذیفہ رضی اللہ عنہ کے پاس موجود تھے، کسی نے کہا: اے ابوعبداللہ آپ ہمیں کوئی ایسی بات سنائیں جو آپ نے رسول اللہ صلی اللہ علیہ وسلم سے سنی ہو، آپ نے فرمایا: اگر میں نے ایسا کیا تو تم لوگ مجھے رجم کر دو گے، ہم نے کہا: سبحان اللہ! کیا ہم ایسا کریں گے؟ آپ نے فرمایا: تمہارا کیا خیال ہے؟ اگر میں تمہیں یہ بتاؤں کہ تمہاری کوئی ماں تمہارے خلاف ایک بہت بڑا لشکر جرار لے کر آئے گی، وہ بہت طاقتور لشکر ہو گا، کیا تم میری یہ بات مان لو گے؟لوگوں نے کہا: سبحان اللہ، اس بات کو کون مانے گا؟ پھر سیدنا حذیفہ نے فرمایا: حمیراء تمہارے پاس ایک لشکر لے کر آئے گی، وہ لشکر گدھوں پر سوار ہو کر آئے گا اور تمہارے چہروں کو پریشان کر دے گا۔ یہ کہہ کر آپ اٹھے اور اپنے حجرے میں تشریف لے گئے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8660]