سیدنا احنف بن قیس رضی اللہ عنہ فرماتے ہیں: میں مدینہ منورہ میں موجود تھا، میں نے ایک آدمی کو دیکھا، لوگ اس کو دیکھ کر اس سے دور بھاگ رہے تھے، میں نے اس سے پوچھا: تم کون ہو؟ اس نے بتایا کہ میں رسول اللہ صلی اللہ علیہ وسلم کا صحابی ابوذر ہوں۔ میں نے کہا: لوگ تم سے بھاگ کیوں رہے ہیں؟ انہوں نے فرمایا: میں ان کو ان خزانوں سے روک رہا ہوں، جس سے رسول اللہ صلی اللہ علیہ وسلم ان کو روکا کرتے تھے، میں نے کہا: بے شک آج ہمارے عطیات بہت زیادہ ہو چکے ہیں، کیا تمہیں ہم پر کسی چیز کا خوف ہے؟ انہوں نے کہا: آج تو نہیں ہے۔ لیکن قریب ہے کہ تمہارے دین کی سودے بازی ہو گی، اور جب تمہارے دین میں سودے بازی ہونے لگ جائے تو خود کو ان سے الگ کر لینا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8804]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: بے شک اللہ تعالیٰ اس امت میں ہر سو سال کے بعد ایک مجدد بھیجے گا جو اس امت کے لئے دین میں تجدید کرے گا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8805]

ابوالولید بیان کرتے ہیں کہ میں ابوالعباس بن شریح کی مجلس میں موجود تھا، ایک آدمی نے آپ کی تعریف کرتے ہوئے یہ حدیث سنائی ” سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ ہر سو سال کے بعد ایک ایسا آدمی بھیجتا ہے، جو دین کو عصری تقاضوں کے مطابق کرتا ہے “ پھر اس شیخ نے کہا: اے قاضی خوش ہو جا کہ اللہ تعالیٰ نے پہلے سو سال کے بعد سیدنا عمر بن عبدالعزیز کو بھیجا اور دو سو سال کے بعد محمد بن ادریس شافعی رحمۃ اللہ علیہ کو بھیجا اور تم تین سو سال پورا ہونے پر آئے ہو پھر اس نے اشعار پڑھے۔ * دو مجدد تو گزر گئے ہیں اور وہ بہت صاحب برکت لوگ تھے، خلیفہ مسلمین سیدنا عمر رضی اللہ عنہ۔ * پھر ان کے بعد نبوت کے وارث، محمد کے نسب سے تعلق رکھنے والے محمد بن ادریس شافعی ہوئے۔ * اے ابوالعباس خوش ہو جا، کہ ان کے بعد تم تیسرے ہو، جو کہ احمد مجتبی صلی اللہ علیہ وسلم کے دین کی آبیاری کرو گے۔ راوی کہتے ہیں: قاضی ابوالعباس رحمۃ اللہ علیہ چیخ چیخ کر رونے لگ گئے، اور کہنے لگے: اس شیخ نے مجھے میری موت کی خبر دے دی، پھر میرے دوستوں کی پوری ایک جماعت نے مجھے بتایا کہ وہ لوگ امام ابوالطیب سہل بن محمد بن سلیمان کی مجلس میں موجود تھے، وہاں پر اس حکایت کا تذکرہ ہوا، تو انہوں نے میرے حوالے سے ان کی موجودگی میں یہ حکایت بیان کی، اس مجلس میں فقیہ ابوعمرو البسطامی ارجائی بھی موجود تھے، ابوعمرو نے فی البدیع یہ اشعار کہے۔ * اور چوتھا مجدد سہل محمد ہے، یہ ہر موحد کا امام ہے۔ * تمام مسلمان اگر نکلیں تو وہ علم کے حوالے سے انہی کی جانب رجوع کرتے ہیں، کتنا ہی اچھا ہے جس کی تائید کی گئی ہے۔ * ہمیشہ ہی ہمارے درمیان مخلوق کا، مختار مذہب کا امام رہے، وہ کتنا ہی اچھا مجدد ہے۔ میں نے فقیہہ ابوعمرو سے اپنی مجلس میں پوچھا، تو انہوں نے یہ اشعار سنائے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8806]

رسول اللہ صلی اللہ علیہ وسلم كی لونڈی بیان كرتی ہیں: نبی اکرم صلی اللہ علیہ وسلم ، ام المومنین رضی اللہ عنہا كے پاس یا كسی دوسری زوجہ رضی اللہ عنہا كے پاس تشریف لائے، اس وقت میں بھی وہاں موجود تھی، آپ صلی اللہ علیہ وسلم نے فرمایا: جب کوئی شخص ظاہراً گناہ كرے اور لوگ اس سے منع نہ كریں تو اللہ تعالیٰ ان پر عذاب نازل کرے گا، ایک آدمی نے کہا: اے اللہ کے نبی! اگرچہ ان میں نیک لوگ بھی موجود ہوں؟ آپ صلی اللہ علیہ وسلم نے فرمایا: اس وقت تو ان پر بھی وہ عذاب آئے گا، پھر بعد میں وہ اللہ تعالیٰ کی رحمت اور مغفرت کی طرف چلیں گے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8807]

سیدنا جابر بن عبداللہ رضی اللہ عنہما فرماتے ہیں کہ رسول اللہ صلی اللہ علیہ وسلم جب قیامت کا ذکر کرتے تو آپ کے رخسارے مبارک سرخ ہو جاتے، اور آپ پر جلال غالب آ جاتا، آپ کی آواز بلند ہو جاتی، یوں لگتا جیسے آپ کسی لشکر کو درست کرتے ہوئے اونچی اونچی بول رہے ہوں، آپ فرماتے: وہ صبح کے وقت آ سکتی ہے، وہ شام کے وقت آ سکتی ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8808]