عبدالرحمن بن غنم اشعری فرماتے ہیں: مجھے ابوالدرداء نے کہا: تم لوگوں کو کیسا دیکھتے ہو؟ میں نے کہا: ٹھیک ہے، ان کی دعوت بھی ایک ہے، ان کا امام بھی ایک ہے، ان کا دشمن زیر ہے۔ ان کے عطیات اور ان کے رزق وافر ہیں، آپ نے فرمایا: وہ وقت کیسا ہو گا جب ان کے دلوں میں آپس میں بغض ہو گا، جب ان کی زبانوں پر لعن طعن ہو گی، جب ان کی آپس کی دشمنی ظاہر ہو گی، اور ان کے درمیان فساد برپا ہو گا، اور یہ لوگ ایک دوسرے کی گردنیں ماریں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8809]

سیدنا حذیفہ بن یمان رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میری امت میں اس وقت تک فتنہ نہیں ہو گا جب تک کہ ان میں تمایز، تمایل اور مقاطع ظاہر نہیں ہو گا۔ میں نے پوچھا: یا رسول اللہ صلی اللہ علیہ وسلم تمایز کیا ہوتا ہے؟ آپ صلی اللہ علیہ وسلم نے فرمایا: تمایز، وہ عصبیت ہے جو لوگ میرے بعد اسلام میں پیدا کر لیں گے۔ میں نے پوچھا: تمایل کیا ہے؟ آپ صلی اللہ علیہ وسلم نے فرمایا: ایک قبیلہ، دوسرے قبیلہ پر مائل ہو گا اور اس کی حرمت کو حلال سمجھ لے گا۔ میں نے پوچھا: مقاطع کیا ہے؟ آپ صلی اللہ علیہ وسلم نے فرمایا: شہروں کی سیر ہے، جنگ میں ان کی ایک دوسرے کے ساتھ گردنیں پھنسیں گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8810]

خارجہ بن صلت برجمی بیان کرتے ہیں: میں سیدنا عبداللہ کے ہمراہ مسجد میں داخل ہوا، اس وقت جماعت رکوع میں تھی، انہوں نے بھی رکوع کیا، پھر ایک آدمی وہاں سے گزرا، اس نے ان کو سلام کیا، سیدنا عبداللہ نے کہا: اللہ اور اس کے رسول نے سچ فرمایا، پھر آپ صف تک پہنچ گئے۔ جب نماز سے فارغ ہوئے تو میں نے ان کے ” صدق اللہ ورسولہ “ کہنے کی وجہ پوچھی، آپ نے فرمایا: رسول اللہ صلی اللہ علیہ وسلم فرمایا کرتے تھے، قیامت اس وقت تک قائم نہیں ہو گی جب تک کہ مساجد کو گزرگاہ نہ بنا لیا جائے، اور لوگ صرف جان پہچان والوں کو ہی سلام کریں گے، عورتیں مردوں کے برابر تجارت کریں گی , گھوڑے اور عورتیں بہت مہنگی ہو جائیں گی، پھر یہ اتنے سستے ہو جائیں گے کہ قیامت تک دوبارہ مہنگے نہیں ہوں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8811]

سیدنا ابوبكرہ رضی اللہ عنہ فرماتے ہیں كہ جنگ جمل کے موقع پر میں نے ارادہ كیا كہ میں بھی جنگ میں شریک ہو كر جہاد كروں، پہر مجھے یہ حدیث یاد آ گئی جو كہ میں نے رسول اللہ صلی اللہ علیہ وسلم سے سنی تھی، آپ صلی اللہ علیہ وسلم كو یہ اطلاع ملی كہ كسریٰ یا كوئی دوسرا عجمی بادشاہ مر گیا ہے اور لوگوں نے ایک عورت كو اپنا بادشاہ بنا لیا ہے، رسول اللہ صلی اللہ علیہ وسلم نے فرمایا: وہ قوم كبھی کامیاب نہیں ہو سكتی، جس نے اپنا بادشاہ کسی عورت کو بنا لیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8812]