ربیع بن خالد ضبی رحمہ اللہ نے بیان کیا کہ میں نے حجاج (حجاج بن یوسف) کو خطبہ دیتے ہوئے سنا، اس نے اپنے خطبے میں کہا: ”ہم میں سے کسی کا قاصد جو اس کے کسی کام میں مشغول ہو، وہ اس کے لیے زیادہ محترم ہوتا ہے یا اس کا وہ نائب جو اس کے اہل میں ٹھہرا ہوا ہو؟“ پس میں نے اپنے دل میں کہا: ”مجھ پر اللہ کے لیے یہ نذر ہے کہ اب تیرے پیچھے کبھی نماز نہیں پڑھوں گا، اور اگر مجھے کچھ لوگ مل گئے جو تیرے خلاف جہاد کرتے ہوں تو میں ان کے ساتھ مل کر بالضرور جہاد کروں گا۔“ اسحاق رحمہ اللہ نے اپنی روایت میں مزید کہا: چنانچہ اس نے (ربیع بن خالد نے حجاج کے خلاف دیر) جماجم کے قتال میں حصہ لیا حتیٰ کہ قتل ہو گیا۔ [سنن ابي داود/كِتَاب السُّنَّةِ/حدیث: 4642]

عاصم سے مروی ہے کہ میں نے حجاج سے سنا، وہ برسرِ منبر کہہ رہا تھا: ﴿فَاتَّقُوا اللَّهَ مَا اسْتَطَعْتُمْ﴾ [سورة التغابن: 16] ”اللہ کا تقویٰ اختیار کرو جہاں تک ہمت پاؤ، اس میں کوئی استثنا نہیں۔ امیر المؤمنین عبدالملک (عبدالملک بن مروان) کی بات سنو اور اطاعت کرو، اس میں کوئی استثنا نہیں۔ اللہ کی قسم! اگر میں لوگوں کو حکم دوں کہ مسجد کے فلاں دروازے سے باہر جاؤ اور وہ دوسرے کسی دروازے سے باہر نکلیں تو میرے لیے ان کے خون اور مال حلال ہوں گے۔ اللہ کی قسم! اگر میں مضر کے بدلے قبیلہ ربیعہ کی گرفت کروں تو یہ میرے لیے اللہ کی طرف سے حلال ہے۔ اور کون ہے جو مجھے ہذیل کے غلام (اشارہ ہے سیدنا عبداللہ بن مسعود رضی اللہ عنہ) کی طرف سے معذور جانے، اس کا خیال ہے کہ اس کی قرآت اللہ کی طرف سے ہے۔ اللہ کی قسم! یہ (اس کی قراءت) تو بدویوں کے رجز (چھوٹے چھوٹے شعروں) کی مانند ہے۔ اللہ نے اسے اپنے نبی صلی اللہ علیہ وسلم پر نازل نہیں کیا ہے۔ اور کون ہے جو مجھے ان عجمیوں سے معذور جانے، ان میں سے کوئی پتھر پھینک دیتا ہے (فتنے کی بات کر دیتا ہے) پھر کہتا ہے دیکھو یہ کہاں تک جاتا ہے۔ اللہ کی قسم! میں انہیں کلِ ماضی کی مانند کر کے رکھ دوں گا (نیست و نابود کر دوں گا)۔“ راوی نے کہا کہ میں نے یہ واقعہ اعمش کو بیان کیا تو اس نے کہا: ”میں نے بھی اللہ کی قسم! اسے اس سے سنا ہے۔“ [سنن ابي داود/كِتَاب السُّنَّةِ/حدیث: 4643]

میں نے حجاج سے سنا وہ منبر پر کھڑا کہہ رہا تھا: ”یہ عجمی کاٹ ڈالے جانے کے لائق ہیں۔ اللہ کی قسم! میں نے اگر لاٹھی کو لاٹھی پر مارا تو ان لوگوں کو ماضی کی مانند کر چھوڑوں گا (نیست و نابود کر دوں گا)۔“ اس کا اشارہ غیر عرب لوگوں کی طرف تھا۔ [سنن ابي داود/كِتَاب السُّنَّةِ/حدیث: 4644]

شریک نے سلیمان اعمش سے روایت کیا، انہوں نے کہا: ”میں نے حجاج کے ساتھ جمعہ پڑھا تو اس نے خطبہ دیا، اور ابوبکر بن عیاش والی (مذکورہ بالا) حدیث (4643) بیان کی۔ اس نے کہا: ”اللہ کے خلیفہ اور اس کے منتخب عبدالملک بن مروان کی بات سنو اور اس کی اطاعت کرو۔“ اور حدیث بیان کی۔ مزید کہا: ”اور اگر میں مضر کے بدلے ربیعہ کی گرفت کروں۔“ اور عجمیوں کا ذکر نہیں کیا۔“ [سنن ابي داود/كِتَاب السُّنَّةِ/حدیث: 4645]

(رسول اللہ صلی اللہ علیہ وسلم کے غلام) سیدنا سفینہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”نبوت کی خلافت تیس سال رہے گی، پھر اللہ تعالیٰ اپنا ملک جسے چاہے گا عنایت کرے گا۔“ سعید بن جمہان نے کہا کہ سیدنا سفینہ رضی اللہ عنہ نے مجھے کہا: ”حساب لگا لو، سیدنا ابوبکر رضی اللہ عنہ کے دو سال، سیدنا عمر رضی اللہ عنہ کے دس سال اور سیدنا عثمان رضی اللہ عنہ کے بارہ سال اور اسی طرح کچھ سیدنا علی رضی اللہ عنہ۔“ سعید کہتے ہیں کہ میں نے سیدنا سفینہ رضی اللہ عنہ سے کہا کہ یہ بنو مروان سمجھتے ہیں کہ سیدنا علی رضی اللہ عنہ خلیفہ نہ تھے تو انہوں نے کہا: ”بنی زرقاء کے پچھلے حصوں نے جھوٹ بولا ہے۔“ [سنن ابي داود/كِتَاب السُّنَّةِ/حدیث: 4646]

سیدنا سفینہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”نبوت کی خلافت تیس سال تک رہے گی، پھر اللہ تعالیٰ اپنا ملک جسے چاہے گا دے دے گا۔“ [سنن ابي داود/كِتَاب السُّنَّةِ/حدیث: 4647]

جناب عبداللہ بن ظالم مازنی سے روایت ہے، انہوں نے کہا کہ میں نے سیدنا سعید بن زید بن عمرو بن نفیل رضی اللہ عنہ سے سنا، انہوں نے کہا: ”جب فلاں کوفے میں آیا اور اس نے فلاں کو خطبے میں کھڑا کیا (عبداللہ نے کہا) تو سعید بن زید رضی اللہ عنہ نے میرے ہاتھ دبائے اور کہا: ”کیا تم اس ظالم (خطیب) کو نہیں دیکھتے ہو؟ (غالباً وہ خطیب سیدنا علی رضی اللہ عنہ کے بارے میں کچھ کہہ رہا تھا۔) میں نو افراد کے بارے میں گواہی دیتا ہوں کہ وہ جنتی ہیں، اگر دسویں کے بارے میں کہوں تو گناہ گار نہیں ہوں گا۔“”ابن ادریس نے کہا: ”عرب لوگ «آثِمٌ» کا لفظ بولتے ہیں (جبکہ سیدنا سعید نے «لَمْ آثَمْ» کہا)۔“ عبداللہ کہتے ہیں، میں نے پوچھا: ”وہ نو افراد کون سے ہیں؟“ انہوں نے کہا کہ رسول اللہ صلی اللہ علیہ وسلم نے فرمایا جبکہ آپ صلی اللہ علیہ وسلم حراء پر کھڑے ہوئے تھے: ”اے حراء ٹھہر جا! تجھ پر سوائے نبی کے یا صدیق کے یا شہید کے اور کوئی نہیں ہے۔“ میں نے کہا: ”اور وہ نو کون کون ہیں؟“ کہا: ”رسول اللہ صلی اللہ علیہ وسلم ، ابوبکر، عمر، عثمان، علی، طلحہ، زبیر، سعد بن ابی وقاص، (مالک) اور عبدالرحمٰن بن عوف رضی اللہ عنہم۔“ میں نے پوچھا: ”اور دسواں کون ہے؟“ تو وہ لمحے بھر کے لیے ٹھٹھکے پھر کہا: ”میں۔“ امام ابوداؤد رحمہ اللہ کہتے ہیں کہ اس حدیث کو اشجعی نے سفیان سے، انہوں نے منصور سے، انہوں نے ہلال بن یساف سے، انہوں نے ابن حیان سے، انہوں نے عبداللہ بن ظالم سے اسی کی سند سے مذکورہ بالا کی مانند روایت کیا ہے۔ [سنن ابي داود/كِتَاب السُّنَّةِ/حدیث: 4648]

جناب عبدالرحمن بن الاخنس سے روایت ہے کہ وہ مسجد میں بیٹھے ہوئے تھے جب ایک شخص نے سیدنا علی رضی اللہ عنہ کا ذکر کیا تو سیدنا سعید بن زید رضی اللہ عنہ کھڑے ہوئے اور کہا: ”میں گواہی دیتا ہوں کہ میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”دس اشخاص جنت میں ہیں۔ نبی صلی اللہ علیہ وسلم جنت میں ہیں، ابوبکر جنت میں ہیں، عمر جنت میں ہیں، عثمان جنت میں ہیں، علی جنت میں ہیں، طلحہ جنت میں ہیں، زبیر بن عوام جنت میں ہیں، سعد بن مالک جنت میں ہیں اور عبدالرحمن بن عوف جنت میں ہیں۔“ اگر میں چاہوں تو دسویں کا نام بھی لے سکتا ہوں۔“ لوگوں نے پوچھا: ”وہ کون ہے؟“ تو وہ خاموش ہو رہے۔ لوگوں نے پوچھا: ”وہ کون ہے؟“ تو انہوں نے کہا: ”وہ سعید بن زید ہے۔“ [سنن ابي داود/كِتَاب السُّنَّةِ/حدیث: 4649]

ریاح بن حارث کا بیان ہے کہ میں کوفہ کی مسجد میں فلاں کے پاس بیٹھا ہوا تھا (اشارہ ہے سیدنا مغیرہ بن شعبہ رضی اللہ عنہ کی طرف) اور ان کے پاس اہل کوفہ کے کچھ لوگ بھی بیٹھے ہوئے تھے۔ تو سیدنا سعید بن زید بن عمرو بن نفیل رضی اللہ عنہ تشریف لائے۔ پس انہوں (مغیرہ رضی اللہ عنہ) نے ان کو «مَرْحَبًا» ”مرحبا“ کہا اور خوش آمدید کہا اور پھر انہیں اپنی چارپائی کی پائنتی کی طرف بٹھا لیا۔ پھر اہل کوفہ میں سے ایک شخص آیا جس کا نام قیس بن علقمہ تھا۔ انہوں نے اس کا بھی استقبال کیا۔ پھر اس نے بدگوئی کی اور بدگوئی کی۔ سیدنا سعید رضی اللہ عنہ نے پوچھا: ”یہ کسے گالیاں دے رہا ہے؟“ کہا: ”سیدنا علی رضی اللہ عنہ کو۔“ تو سیدنا سعید رضی اللہ عنہ نے کہا: ”(تعجب ہے!) میں دیکھ رہا ہوں کہ تمہارے سامنے اصحابِ رسول اللہ صلی اللہ علیہ وسلم کو برا بھلا کہا جا رہا ہے اور آپ ہیں کہ اسے ٹوکتے ہی نہیں اور نہ سمجھاتے ہیں۔ میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم فرما رہے تھے، اور مجھے کوئی ایسی نہیں پڑی کہ آپ صلی اللہ علیہ وسلم پر کوئی ایسی بات کہہ دوں جو آپ نے نہ کہی ہو، پھر کل جب آپ سے میری ملاقات ہو اور وہ مجھ سے پوچھ لیں: ”ابوبکر (رضی اللہ عنہ) جنت میں ہیں، عمر (رضی اللہ عنہ) جنت میں ہیں۔““ اور مذکورہ بالا حدیث کے ہم معنی روایت کیا۔ پھر کہا: ”ان میں سے کسی ایک کا رسول اللہ صلی اللہ علیہ وسلم کے ساتھ (جہاد میں) حاضر رہنا اور اس کے چہرے کا غبار آلود ہو جانا تمہاری ساری زندگی کے اعمال سے کہیں بہتر ہے، خواہ تمہیں سیدنا نوح علیہ السلام کی زندگی ہی کیوں نہ مل جائے۔“ [سنن ابي داود/كِتَاب السُّنَّةِ/حدیث: 4650]

سیدنا انس بن مالک رضی اللہ عنہ نے بیان کیا کہ اللہ کے نبی صلی اللہ علیہ وسلم احد پہاڑ پر چڑھے تو سیدنا ابوبکر رضی اللہ عنہ، سیدنا عمر رضی اللہ عنہ اور سیدنا عثمان رضی اللہ عنہ بھی آپ صلی اللہ علیہ وسلم کے پیچھے چلے گئے، پس پہاڑ نے حرکت کی۔ تو نبی کریم صلی اللہ علیہ وسلم نے اس پر اپنا پاؤں مارا اور فرمایا: «اُثْبُتْ أُحُدُ فَإِنَّمَا عَلَيْكَ نَبِيٌّ وَصِدِّيقٌ وَشَهِيدَانِ» ”احد! ٹھہر جا! (تیرے اوپر) ایک نبی، ایک صدیق اور دو شہید ہیں۔“ [سنن ابي داود/كِتَاب السُّنَّةِ/حدیث: 4651]