حضرت ابوذر رضی اللہ عنہ سے روایت ہے کہ میں نے رسول اللہ صلی اللہ علیہ وسلم سے پوچھا: کیا آپ نے اپنے رب کو دیکھا ہے؟ آپ صلی اللہ علیہ وسلم نے جواب دیا: «نُورٌ أَنَّى أَرَاهُ» ”وہ نور ہے، میں اس کو کیسے دیکھ سکتا ہوں۔“ [صحيح مسلم/كتاب الإيمان/حدیث: 443]

عبداللہ بن شفیق رحمہ اللہ کہتے ہیں کہ میں نے حضرت ابو ذر رضی اللہ عنہ سے کہا: اگر میں رسول اللہ صلی اللہ علیہ وسلم کو دیکھتا تو آپ سے پوچھتا۔ حضرت ابو ذر رضی اللہ عنہ نے کہا: تو آپ سے کس چیز کے بارے میں سوال کرتا؟ عبداللہ بن شفیق رحمہ اللہ نے کہا: میں آپ سے سوال کرتا: کیا آپ نے اپنے رب کو دیکھا ہے؟ حضرت ابو ذر رضی اللہ عنہ نے فرمایا: میں پوچھ چکا ہوں، آپ صلی اللہ علیہ وسلم نے فرمایا: «رَأَيْتُ نُورًا» ”میں نے نور دیکھا ہے۔“ یعنی میں نے بس نور دیکھا ہے۔ [صحيح مسلم/كتاب الإيمان/حدیث: 444]

حضرت ابو موسیٰ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ایک مجلس میں کھڑے ہو کر ہمیں پانچ باتیں بتائیں، فرمایا: ”(1) اللہ تعالیٰ سوتا نہیں ہے اور نہ ہی سونا اس کے شایان شان ہے۔ (2) میزان کے پلڑوں کو جھکاتا اور اٹھاتا ہے۔ (3) اس کی طرف رات کے اعمال دن کے اعمال سے پہلے اور دن کے اعمال (بعد والی رات) سے پہلے اٹھائے جاتے ہیں۔ (4) اس کا پردہ نور ہے۔ ابوبکر رضی اللہ عنہ کی روایت میں نور کی جگہ نار (آگ) ہے۔ (5) اگر وہ اس پردے کو کھول دے تو اس کے چہرے کی شعاعیں جہاں تک اس کی نگاہ پہنچے اس کی مخلوق کو جلا دیں۔“ [صحيح مسلم/كتاب الإيمان/حدیث: 445]

امام صاحب رحمہ اللہ ایک دوسری سند سے مذکورہ بالا روایت بیان کرتے ہیں جس میں ہے کہ آپ صلی اللہ علیہ وسلم نے ایک مجلس میں کھڑے ہو کر ہمیں چار باتیں بتائیں، پھر جریر رحمہ اللہ نے ابو معاویہ رحمہ اللہ کی طرح حدیث بیان کی اور «مِنْ خَلْقِهِ» کے الفاظ بیان نہیں کیے، اور کہا «حِجَابُهُ النُّورُ» ”اس کا پردہ نور ہے۔“ [صحيح مسلم/كتاب الإيمان/حدیث: 446]

حضرت ابو موسیٰ اشعری رضی اللہ عنہ سے روایت ہے کہ آپ صلی اللہ علیہ وسلم نے کھڑے ہو کر ہمیں چار باتیں بتائیں: ”(1) اللہ تعالیٰ سوتا نہیں ہے اور نہ سونا اس کے لائق ہے۔ (2) وہ ترازو کے پلڑے اوپر نیچے کرتا رہتا ہے۔ (3) اس کی طرف دن کا عمل رات کو اور (4) رات کا عمل دن کو اٹھایا جاتا ہے۔“ [صحيح مسلم/كتاب الإيمان/حدیث: 447]

حضرت عبداللہ بن قیس رضی اللہ عنہ بیان کرتے ہیں کہ رسول اکرم صلی اللہ علیہ وسلم نے فرمایا: ”دو جنتیں ایسی ہیں کہ ان کے برتن اور جو کچھ ان میں ہے چاندی کے ہوں گے، اور دو جنتیں ایسی ہیں کہ ان کے برتن اور جو کچھ ان میں ہے سونے کے ہوں گے، اور لوگوں اور ان کے رب کی جنتِ عدن میں رویت کے درمیان اس کے چہرے پر عظمت و بڑائی کی چادر کے سوا کوئی چیز حائل نہیں ہوگی۔“ [صحيح مسلم/كتاب الإيمان/حدیث: 448]

حضرت صہیب رضی اللہ عنہ نے رسول اکرم صلی اللہ علیہ وسلم کا فرمان سنایا: ”جب جنتی جنت میں داخل ہو جائیں گے، اس وقت اللہ تبارک و تعالیٰ فرمائے گا: ”تم کسی اور چیز کے خواہش مند ہو، کہ میں تمہیں اور دوں؟“ تو وہ جواب دیں گے: ”کیا تو نے ہمارے چہرے روشن نہیں کیے؟ کیا تو نے ہمیں جنت میں داخل نہیں کیا اور دوزخ سے نجات نہیں دی؟““ آپ صلی اللہ علیہ وسلم نے فرمایا: ”اس پر وہ پردہ اٹھا دے گا، انہیں کوئی ایسی چیز نہیں دی گئی ہو گی جو انہیں اپنے رب عزت و جلال والے کے دیدار سے زیادہ پسندیدہ ہو (ہر نعمت سے دیدار کی نعمت زیادہ محبوب ہو گی)۔“ [صحيح مسلم/كتاب الإيمان/حدیث: 449]

امام صاحب رحمہ اللہ نے ایک دوسری سند سے حدیث بیان کی، اور اس میں اتنا اضافہ کیا: ”پھر آپ صلی اللہ علیہ وسلم نے یہ آیت پڑھی: ﴿لِلَّذِينَ أَحْسَنُوا الْحُسْنَىٰ وَزِيَادَةٌ﴾ [سورة يونس: 26] ”جن لوگوں نے اچھی زندگی گزاری ان کے لیے اچھی جگہ ہے (یعنی جنت اور اس کی نعمتیں) اس پر زائد ایک نعمت ہے (دیدار حق ہے)۔“” [صحيح مسلم/كتاب الإيمان/حدیث: 450]

حضرت ابوہریرہ رضی اللہ عنہ سے روایت ہے کہ کچھ لوگوں نے رسول اللہ صلی اللہ علیہ وسلم سے عرض کیا: اے اللہ کے رسول! کیا ہم قیامت کے دن اپنے رب کو دیکھ پائیں گے؟ تو رسول اللہ صلی اللہ علیہ وسلم نے فرمایا: ”کیا تم چودھویں کا چاند دیکھنے میں (اژدحام کی وجہ سے) ایک دوسرے کو تکلیف پہنچاتے ہو؟“ صحابہ رضی اللہ عنہم نے عرض کیا: نہیں اے اللہ کے رسول! آپ صلی اللہ علیہ وسلم نے فرمایا: ”کیا تم سورج کو، جب اس کے ورے بادل حائل نہ ہوں، دیکھنے میں ایک دوسرے کو تکلیف پہنچاتے ہو؟“ صحابہ رضی اللہ عنہم نے عرض کیا: نہیں اے اللہ کے رسول! آپ صلی اللہ علیہ وسلم نے فرمایا: ”تم اللہ کو بھی اسی طرح (بغیر تکلیف و دشواری کے) دیکھو گے۔ اللہ تعالیٰ قیامت کے دن تمام لوگوں کو جمع کرے گا، پھر فرمائے گا: جو کسی کی بندگی کرتا تھا وہ اسی کے ساتھ ہو جائے۔ پھر جو شخص سورج کی پوجا کرتا تھا وہ سورج کے پیچھے چلا جائے گا، جو چاند کی پرستش کرتا تھا اسی کے ساتھ ہو جائے گا، اور جو طاغوتوں (غیر اللہ) کی پوجا کرتا تھا وہ طاغوتوں کے ساتھ ہو جائے گا، اور یہ امت رہ جائے گی، اس میں اس کے منافق بھی ہوں گے، تو ان کے پاس اللہ تبارک و تعالیٰ ایسی صورت میں آئے گا جسے وہ پہچانتے نہیں ہوں گے اور فرمائے گا: میں تمہارا رب ہوں۔ وہ کہیں گے: ہم تجھ سے اللہ تعالیٰ کی پناہ مانگتے ہیں، ہم اسی جگہ ٹھہریں گے، یہاں تک کہ ہمارے پاس ہمارا رب آ جائے۔ جب ہمارا رب آ جائے گا، تو ہم اسے پہچان لیں گے۔ پھر اللہ ان کے پاس اس صورت میں آئے گا جس میں وہ اسے پہچان لیں گے اور فرمائے گا: میں تمہارا رب ہوں۔ وہ کہیں گے: تو ہی ہمارا رب ہے، اور وہ اس کے پیچھے ہو جائیں گے۔ پھر جہنم کی پشت پر پل صراط رکھا جائے گا، تو میں اور میری امت سب سے پہلے اس سے گزریں گے، اور رسولوں کے سوا اس دن کسی کو کلام کی جرات نہ ہو گی۔ اور رسولوں کی پکار اس دن یہی ہو گی: اے اللہ! سلامتی دے! سلامتی دے! اور دوزخ میں سعدان (ایک خاردار جھاڑی) کے کانٹوں کی طرح لوہے کے مڑے ہوئے سروں والے آنکڑے ہوں گے (جن پر گوشت بھونا جاتا ہے)۔ کیا تم نے سعدان جھاڑی کو دیکھا ہے؟“ صحابہ رضی اللہ عنہم نے عرض کیا: جی ہاں! اے اللہ کے رسول! آپ صلی اللہ علیہ وسلم نے فرمایا: ”وہ آنکڑے سعدان کے کانٹوں جیسے ہوں گے، لیکن ان کی جسامت کی مقدار کو اللہ کے سوا کوئی نہیں جانتا، وہ لوگوں کو ان کے بد اعمال کی بنا پر اچک لیں گے۔ ان میں سے بعض اپنے عملوں کے سبب ہلاک ہوں گے اور بعض کے ٹکڑے کر دیے جائیں گے، پھر وہ نجات پا جائیں گے۔ یہاں تک کہ جب اللہ تعالیٰ بندوں کے درمیان فیصلہ کرنے سے فارغ ہو جائے گا، اور اپنی رحمت سے دوزخیوں میں سے جسے نکالنا چاہے گا نکال لے گا، تو وہ فرشتوں کو حکم دے گا کہ وہ ان لوگوں کو آگ سے نکال دیں جو اللہ کے ساتھ کسی چیز کو شریک نہیں ٹھہراتے تھے۔ یہ وہ لوگ ہوں گے جن پر اللہ رحمت کرنا چاہے گا، جو «لَا إِلٰهَ إِلَّا اللّٰهُ» ”اللہ کے سوا کوئی معبود برحق نہیں“ کہتے تھے، فرشتے انہیں آگ میں پہچان لیں گے، وہ انہیں سجدوں کے نشان سے پہچانیں گے۔ آگ ابن آدم کے جسم کو سجدوں کے نشان کے سوا ہر جگہ سے کھا جائے گی۔ اللہ تعالیٰ نے آگ پر سجدے کے نشان کو جلانا حرام قرار دیا ہے۔ وہ آگ سے اس حال میں نکالے جائیں گے کہ وہ جل کر کوئلہ ہو چکے ہوں گے۔ پھر ان پر آب حیات ڈالا جائے گا، تو وہ اس سے اس طرح اگیں گے جس طرح دانہ سیلاب کے کوڑے کرکٹ (بہاؤ کے ساتھ آنے والی مٹی) میں اگتا ہے۔ (یعنی بہت جلد ترو تازہ ہو کر اٹھ کھڑے ہوں گے) پھر جب اللہ تعالیٰ اپنے بندوں کے درمیان فیصلہ کرنے سے فارغ ہو جائے گا، اور ایک شخص باقی رہ جائے گا جس کا چہرہ آگ کی طرف ہوگا، اور یہی جنت میں داخل ہونے والا آخری شخص ہو گا۔ وہ عرض کرے گا: اے میرے رب! میرا چہرہ آگ سے پھیر دے، کیونکہ اس کی بدبو نے مجھے پریشان کر دیا ہے (یا میری شکل و صورت بدل دی ہے) اور اس کی تپش نے مجھے جلا ڈالا ہے۔ وہ اللہ سے دعا کرتا رہے گا جب تک اللہ کو منظور ہوگا، پھر اللہ تبارک و تعالیٰ فرمائے گا: اگر میں تیرا یہ سوال پورا کر دوں، تو کیا تو اس کے علاوہ بھی کوئی سوال کرے گا؟ وہ عرض کرے گا: میں تجھ سے اس کے علاوہ کوئی سوال نہیں کروں گا، اور وہ اپنے رب کو ہر طرح کے عہد و پیمان دے گا۔ پھر اللہ اس کا چہرہ دوزخ سے پھیر دے گا۔ جب وہ جنت کی طرف متوجہ ہوگا اور اس کی شادابی دیکھے گا، تو جب تک اللہ چاہے گا وہ خاموش رہے گا، پھر کہے گا: اے میرے رب! مجھے جنت کے دروازے تک پہنچا دے! اللہ تعالیٰ فرمائے گا: کیا تو نے اپنے پختہ عہد و پیمان نہیں دیے تھے کہ جو کچھ میں نے تجھے دیا ہے اس کے علاوہ کوئی سوال نہیں کرے گا؟ اے آدم کے بیٹے! تو کس قدر بے وفا ہے! وہ عرض کرے گا: اے میرے رب! اور اللہ سے دعا کرتا رہے گا یہاں تک کہ اللہ فرمائے گا: اگر میں تیرا یہ مطالبہ پورا کر دوں، تو شاید تو کچھ اور مانگنے لگے؟ وہ عرض کرے گا: تیری عزت کی قسم! اب اور کچھ نہیں مانگوں گا، اور وہ اپنے رب کو ہر طرح کے عہد و پیمان دے گا۔ پھر اللہ اسے جنت کے دروازے تک پہنچا دے گا۔ جب وہ وہاں کھڑا ہوگا، تو جنت اس کے لیے کھل جائے گی اور وہ اس کی نعمتوں اور رونقوں کو دیکھے گا، تو جب تک اللہ کو منظور ہوگا وہ خاموش رہے گا، پھر کہے گا: اے میرے رب! مجھے جنت میں داخل کر دے! تو اللہ تعالیٰ فرمائے گا: کیا تو نے اپنے پختہ عہد و پیمان نہیں دیے تھے کہ جو کچھ تجھے دیا گیا ہے اس کے سوا نہیں مانگے گا؟ اے ابن آدم! تجھ پر افسوس ہے، تو کس قدر عہد شکن ہے! وہ عرض کرے گا: اے میرے رب! میں تیری مخلوق میں سب سے زیادہ بدنصیب نہ رہوں۔ وہ اللہ عزوجل سے مسلسل دعا کرتا رہے گا یہاں تک کہ اللہ تعالیٰ ہنس پڑے گا، اور جب اللہ تعالیٰ ہنس دے گا، تو فرمائے گا: جنت میں داخل ہو جا! جب وہ اس میں داخل ہو جائے گا، تو اللہ تعالیٰ اس سے فرمائے گا: اب تمنا کر! تو وہ اپنے رب سے سوال کرے گا اور تمنائیں کرے گا، یہاں تک کہ اللہ اسے یاد دلائے گا کہ فلاں فلاں چیز کی تمنا کر، یہاں تک کہ جب اس کی تمام آرزوئیں ختم ہو جائیں گی، تو اللہ تعالیٰ فرمائے گا: یہ سب کچھ تیرے لیے ہے اور اتنا ہی مزید اور بھی۔“ عطاء بن یزید رحمہ اللہ بیان کرتے ہیں کہ حضرت ابوسعید رضی اللہ عنہ بھی حضرت ابوہریرہ رضی اللہ عنہ کے ساتھ موجود تھے اور وہ ان کی اس حدیث کی کسی بات کی تردید نہیں کر رہے تھے، یہاں تک کہ جب حضرت ابوہریرہ رضی اللہ عنہ نے یہ بیان کیا کہ اللہ تعالیٰ اس آدمی سے فرمائے گا: ”یہ سب کچھ تجھے دیا اور اتنا ہی اور بھی“ تو حضرت ابوسعید رضی اللہ عنہ نے کہا: اور اس کے ساتھ اس سے دس گنا مزید، اے ابوہریرہ! حضرت ابوہریرہ رضی اللہ عنہ نے کہا: مجھے تو رسول اللہ صلی اللہ علیہ وسلم سے یہی الفاظ یاد ہیں: ”تیرے لیے یہ سب کچھ ہے اور اتنا ہی مزید اور بھی۔“ حضرت ابوسعید رضی اللہ عنہ نے کہا: میں گواہی دیتا ہوں کہ مجھے رسول اللہ صلی اللہ علیہ وسلم کا یہ قول یاد ہے: ”تجھے یہ سب کچھ حاصل ہے اور اس سے دس گنا مزید۔“ حضرت ابوہریرہ رضی اللہ عنہ نے کہا: اور یہ آدمی جنت میں داخل ہونے والا آخری فرد ہو گا۔ [صحيح مسلم/كتاب الإيمان/حدیث: 451]

حضرت ابو ہریرہ رضی اللہ عنہ سے روایت ہے کہ لوگوں (صحابہ کرام رضی اللہ عنہم) نے عرض کیا: اے اللہ کے رسول صلی اللہ علیہ وسلم ! کیا ہم قیامت کے دن اپنے رب کو دیکھ سکیں گے؟ آگے مذکورہ بالا روایت ہے۔ [صحيح مسلم/كتاب الإيمان/حدیث: 452]