سیدنا علی رضی اللہ عنہ بیان کرتے ہیں کہ رسول اللہ صلی اللہ علیہ وسلم نے مجھے دو غلام بیچنے کا حکم دیا جو کہ بھائی تھے۔ چنانچہ میں نے انہیں الگ الگ بیچ دیا۔ میں نے نبی کریم صلی اللہ علیہ وسلم کو بتایا، تو آپ نے فرمایا: ”ان کو واپس لیں اور ایک ہی جگہ (اکٹھا) فروخت کیجیے۔“ [المنتقى ابن الجارود/كتاب البيوع والتجارات/حدیث: 575]

سیدہ عائشہ رضی اللہ عنہا بیان کرتی ہیں کہ جب سورۃ البقرہ کی آخری آیات اتریں، جن میں سود کا ذکر ہے، تو نبی کریم صلی اللہ علیہ وسلم باہر نکلے اور لوگوں کے سامنے ان آیات کی تلاوت کی، پھر آپ نے شراب کی خرید و فروخت کو حرام قرار دیا۔ [المنتقى ابن الجارود/كتاب البيوع والتجارات/حدیث: 576]

سیدنا عمر رضی اللہ عنہ سے روایت ہے کہ جب انہیں خبر ملی کہ فلاں آدمی نے شراب بیچی ہے، تو انہوں نے فرمایا: ”اللہ اس شخص کو تباہ کرے، کیا اسے معلوم نہیں کہ رسول اللہ صلی اللہ علیہ وسلم نے فرمایا: ’اللہ تعالیٰ یہودیوں کو تباہ کرے، ان پر چربی حرام کی گئی، تو انہوں نے اسے پگھلا کر بیچنا شروع کر دیا۔‘“ محمود کی روایت میں یہ اضافہ ہے کہ ”انہوں نے اس کی قیمت کھانی شروع کر دی۔“ [المنتقى ابن الجارود/كتاب البيوع والتجارات/حدیث: 577]

سیدنا جابر بن عبداللہ رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”اللہ تعالیٰ نے شراب، بت، مردار، اور خنزیر کی خرید و فروخت کو حرام قرار دیا ہے۔“ مسلمانوں میں سے کسی نے پوچھا: ”مردار کی چربی کے متعلق آپ کا کیا خیال ہے؟ اس سے چمڑے اور کشتیوں کو رنگا جاتا ہے، نیز لوگ اس سے چراغ بھی جلاتے ہیں۔“ آپ صلی اللہ علیہ وسلم نے فرمایا: ”حرام ہے، اللہ تعالیٰ یہودیوں کو تباہ کرے، جب ان پر چربی حرام ہوئی، تو انہوں نے اسے پگھلا کر بیچ دیا اور اس کی قیمت کھائی۔“ [المنتقى ابن الجارود/كتاب البيوع والتجارات/حدیث: 578]

سیدنا ابو ہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”تمہارا رب کہتا ہے: قیامت کے دن میں تین آدمیوں کے مدمقابل ہوں گا، اور جس کے مدمقابل میں ہوں گا، اس سے جھگڑوں گا: وہ آدمی جس نے میرے نام پر (عہد) دے کر دھوکہ کیا، وہ آدمی جس نے کسی آزاد آدمی کو بیچ کر اس کی قیمت کھائی، اور وہ آدمی جس نے کسی کو مزدوری پر لگایا، اس سے کام تو پورا لیا، لیکن اس کی اجرت پوری نہ دی۔“ ابن طباع، نعیم، اور ابراہیم بن حمزہ نے بھی محمود بن آدم سے اسی طرح بیان کیا ہے، اور نفیل سے بھی یہ روایت مروی ہے۔ [المنتقى ابن الجارود/كتاب البيوع والتجارات/حدیث: 579]

سیدنا جابر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے کتے اور بلی کی قیمت (لینے) سے منع کیا ہے۔ [المنتقى ابن الجارود/كتاب البيوع والتجارات/حدیث: 580]

سیدنا ابو مسعود رضی اللہ عنہ بیان کرتے ہیں کہ نبی کریم صلی اللہ علیہ وسلم نے کتے کی قیمت، زانیہ کی اجرت، اور کاہن کی شیرینی (اجرت) سے منع کیا ہے۔ [المنتقى ابن الجارود/كتاب البيوع والتجارات/حدیث: 581]

سیدنا عبداللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے نر کی جفتی کی قیمت لینے سے منع کیا ہے۔ [المنتقى ابن الجارود/كتاب البيوع والتجارات/حدیث: 582]

حرام بن محیصہ اپنے والد سے بیان کرتے ہیں کہ انہوں نے نبی کریم صلی اللہ علیہ وسلم سے حجام (سینگی لگانے والے) کی کمائی کے متعلق پوچھا، تو آپ نے اس سے منع فرما دیا۔ انہوں نے اپنی ضروریات کی شکایت کی، تو آپ صلی اللہ علیہ وسلم نے فرمایا: ”اپنے اونٹ یا غلام کو کھلا دے۔“ [المنتقى ابن الجارود/كتاب البيوع والتجارات/حدیث: 583]

سیدنا عبداللہ بن عباس رضی اللہ عنہما بیان کرتے ہیں کہ نبی کریم صلی اللہ علیہ وسلم نے سینگی لگوائی اور سینگی لگانے والے (حجام) کو اجرت بھی دی۔ [المنتقى ابن الجارود/كتاب البيوع والتجارات/حدیث: 584]