حضرت عبدا للہ بن شداد فرماتے ہیں کہ ایک رات عشاء کی نماز میں نبی کریم صلی اللہ علیہ وآلہ وسلم نے لوگوں کی طرف رخ فرمایا پھر فرمایا کہ میرا دل چاہتا ہے کہ میں کسی کو نماز پڑھانے کا کہوں، پھر اذان دی جائے، اور میں ان لوگوں کے گھروں میں جا کر انہیں جلا دوں جو نماز کے لئے مسجد میں نہیں آتے۔ [مصنف ابن ابي شيبه/كتاب الصلوات/حدیث: 3509]

حضرت عبد الرحمن بن ابی لیلیٰ کہتے ہیں کہ حضرت ابن ام مکتوم نبی کریم صلی اللہ علیہ وآلہ وسلم کی خدمت میں حاضر ہوئے اور عرض کیا کہ مدینہ میں بہت سے حشرات اور دلدلی جگہیں ہیں، کیا میرے لئے رخصت ہے کہ میں عشاء اور فجر کی نماز اپنے گھر میں پڑھ لوں؟ حضور صلی اللہ علیہ وآلہ وسلم نے فرمایا کہ کیا تم حَیَّ عَلَی الصَّلاَۃِ اور حَیَّ عَلَی الْفَلاَحِ سنتے ہو؟ انہوں نے کہا جی ہاں۔ آپ صلی اللہ علیہ وآلہ وسلم نے فرمایا تو پھر نماز کے لئے ضرور آؤ۔ [مصنف ابن ابي شيبه/كتاب الصلوات/حدیث: 3510]

حضرت ابوہریرہ فرماتے ہیں کہ حضرت ابن ام مکتومنبی کریم صلی اللہ علیہ وآلہ وسلم کی خدمت میں حاضر ہوئے اور عرض کیا کہ میں ایک نابینا آدمی ہوں اور میرا گھر دور ہے۔ اور میرے پاس کوئی ایسا شخص بھی نہیں جو مجھے پکڑ کر مسجد میں لاسکے۔ کیا میرے لئے رخصت ہے کہ میں مسجد میں نہ آؤں؟ حضور صلی اللہ علیہ وآلہ وسلم نے فرمایا نہیں۔ [مصنف ابن ابي شيبه/كتاب الصلوات/حدیث: 3511]

حضرت مجاہد کہتے ہیں کہ حضرت ابن عباس رضی اللہ عنہما کے پاس ایک آدمی ایک مہینے تک آکر سوال کرتا رہا کہ آدمی دن کو روزہ رکھتا ہے اور رات کو عبادت کرتا ہے لیکن جمعہ اور جماعت میں حاضر نہیں ہوتا، اگر وہ مرگیا تو کیا ہوگا؟ آپ نے فرمایا وہ جہنم میں جائے گا۔ [مصنف ابن ابي شيبه/كتاب الصلوات/حدیث: 3512]

حضرت جہم بن ابی سبرہ کہتے ہیں کہ حضرت زبیر بن عوام اپنے پیچھے ایک آدمی کو بٹھاتے تھے جوان کی نماز کا خیال رکھتا تھا۔ [مصنف ابن ابي شيبه/كتاب الصلوات/حدیث: 3513]

حضرت محمد بن سیرین کہتے ہیں کہ حضرت عمر بن خطاب رضی اللہ عنہ کو بھولنے کا خوف تھا، لہٰذا جب وہ نماز پڑھتے تو ایک آدمی کے ذمے لگا دیتے کہ وہ آپ کی نماز کا دھیان رکھتا، پس اگر اسے کھڑا دیکھتے تو کھڑے ہو جاتے اور اگر اسے بیٹھا ہوا دیکھتے تو بیٹھ جاتے۔ [مصنف ابن ابي شيبه/كتاب الصلوات/حدیث: 3514]

حضرت رکین فرماتے ہیں کہ میں حضرت اسماء کی خدمت میں حاضر ہوا، وہ بوڑھی تھیں اور نماز پڑھ رہی تھیں، ایک عورت ان سے کہہ رہی تھی ”رکوع کیجئے، سجدہ کیجئے“ [مصنف ابن ابي شيبه/كتاب الصلوات/حدیث: 3515]

حضرت سلمہ بن اکوع نے نبی کریم صلی اللہ علیہ وآلہ وسلم سے عرض کیا کہ یارسول اللہ! میں ایک شکار ی آدمی ہوں، کیا میں ایک قمیص میں نماز پڑھ سکتا ہوں؟ آپ نے فرمایا ہاں، البتہ اسے باندھ لو خواہ ایک کانٹے سے ہی۔ [مصنف ابن ابي شيبه/كتاب الصلوات/حدیث: 3516]

حضرت کثیر بن زید کہتے ہیں کہ میں نے حضرت سالم کو اس حال میں نماز پڑھتے دیکھا ہے کہ ان کے بٹن کھلے ہوئے تھے۔ [مصنف ابن ابي شيبه/كتاب الصلوات/حدیث: 3517]

حضرت سبرہ بن معبد جہنی کہتے ہیں کہ نبی کریم صلی اللہ علیہ وآلہ وسلم نے ارشاد فرمایا کہ جب بچہ سات سال کا ہوجائے تو اسے نماز کا حکم دو، اگر دس سال کا ہو کر بھی نماز چھوڑے تو اسے مارو۔ [مصنف ابن ابي شيبه/كتاب الصلوات/حدیث: 3518]