حضرت میمون بن مہران فرماتے ہیں کہ بچہ جب بالغ ہوجائے تو اسے نماز کا حکم دیا جائے گا۔ [مصنف ابن ابي شيبه/كتاب الصلوات/حدیث: 3529]

حضرت ابو اسحاق بچے کو نماز اس وقت سکھایا کرتے تھے جب اس کی عمر سات سال سے دس سال کے درمیان ہوتی۔ [مصنف ابن ابي شيبه/كتاب الصلوات/حدیث: 3530]

حضرت جعفر اپنے والد سے روایت کرتے ہیں کہ حضرت علی بن حسین رحمہ اللہ بچوں کو حکم دیتے تھے کہ ظہر اور عصر کی نماز کو اکٹھاپڑھیں اور مغرب و عشاء کی نماز اکٹھا پڑھ لیں۔ کسی نے ان سے کہا کہ اس طرح تو وہ بغیر وقت کے نماز پڑھیں گے۔ حضرت علی بن حسین رحمہ اللہ نے فرمایا کہ یہ اس سے بہتر ہے کہ وہ نماز پڑھے بغیر سو جائیں۔ [مصنف ابن ابي شيبه/كتاب الصلوات/حدیث: 3531]

حضرت ابن سیرین فرماتے ہیں کہ بچے کو نماز اس وقت سکھائی جائے گی جب وہ دائیں اور بائیں کی تمیز کرنے لگے۔ [مصنف ابن ابي شيبه/كتاب الصلوات/حدیث: 3532]

حضرت ابن عمر رضی اللہ عنہما سے بھی یونہی منقول ہے۔ [مصنف ابن ابي شيبه/كتاب الصلوات/حدیث: 3533]

حضرت عبد اللہ فرماتے ہیں کہ بچوں کو نماز کا عادی بناؤ۔ [مصنف ابن ابي شيبه/كتاب الصلوات/حدیث: 3534]

حضرت عمرو بن شعیب کہتے ہیں کہ بنو عبد المطلب میں جب کوئی بچہ بولنے لگتا تو حضور صلی اللہ علیہ وآلہ وسلم اسے سات مرتبہ یہ آیت سکھاتے: تمام تعریفیں اس اللہ کے لئے ہیں جس کی کوئی اولاد نہیں، اور بادشاہت میں اس کا کوئی شریک بھی نہیں ہے۔ [مصنف ابن ابي شيبه/كتاب الصلوات/حدیث: 3535]

حضرت علی بن حسین رحمہ اللہ اپنے بچے کو یہ سکھایا کرتے تھے: میں اللہ پر ایمان لایا اور میں نے شیطان کا انکار کیا۔ [مصنف ابن ابي شيبه/كتاب الصلوات/حدیث: 3536]

ابراہیم تیمی فرماتے ہیں کہ اسلاف اس بات کو پسند کرتے تھے کہ بچہ جب بولنے لگے اور صاف بولنے لگے تو اسے سب سے پہلے سات مرتبہ لاَ إلَہَ إِلاَّ اللَّہُ کی تلقین کریں۔ وہ چاہتے تھے کہ بچے کی زبان سے سب سے پہلے یہی کلمہ نکلنا چاہئے۔ [مصنف ابن ابي شيبه/كتاب الصلوات/حدیث: 3537]

حضرت ہمام اپنے والد سے روایت کرتے ہیں کہ ایک مرتبہ حضرت اشعث نے ایک لڑکے کو نماز کے لئے آگے کردیا۔ ان پر اعتراض کیا گیا تو انہوں نے فرمایا کہ میں نے قرآن کو آگے کیا ہے۔ [مصنف ابن ابي شيبه/كتاب الصلوات/حدیث: 3538]