حضرت ابوبکر (ابن ابی شیبہ) فرماتے ہیں کہ جب اس کے ساتھ کوئی اور آدمی بھی ہو تو صف سے پہلے رکوع کرسکتا ہے، اور اگر اکیلا ہو تو رکوع نہ کرے۔ [مصنف ابن ابي شيبه/كتاب الصلوات/حدیث: 2660]

حضرت لیث فرماتے ہیں کہ حضرت مجاہد جب رکوع کرتے تھے تو اپنے ہاتھوں کو اپنے گھٹنوں پرر کھتے تھے۔ حضرت عطاء، حضرت طاوس اور حضرت نافع اپنی کہنیوں کو کھلا رکھتے تھے۔ [مصنف ابن ابي شيبه/كتاب الصلوات/حدیث: 2661]

حضرت لیث فرماتے ہیں کہ ایک مرتبہ ایک آدمی نے حضرت عطاء کے ساتھ نماز پڑھی، جب اس نے رکوع کیا تو اپنے گھٹنوں کو سمیٹ لیا۔ انہوں نے اسے اپنا ہاتھ مارا اور فرمایا کہ انہیں پھیلا کر رکھو۔ [مصنف ابن ابي شيبه/كتاب الصلوات/حدیث: 2662]

حضرت سالم براد فرماتے ہیں کہ ہم حضرت ابو مسعود کے کمرے میں ان سے ملاقات کے لئے حاضر ہوئے، ہم نے ان سے عرض کیا کہ ہمیں رسول اللہ صلی اللہ علیہ وآلہ وسلم کا طریقۂ نماز سکھا دیجئے۔ چناچہ انہوں نے نماز پڑھی، جب سجدہ کیا تو اپنی کہنیوں کو پھیلا کررکھا۔ [مصنف ابن ابي شيبه/كتاب الصلوات/حدیث: 2663]

حضرت میمونہ فرماتی ہیں کہ جب حضور صلی اللہ علیہ وآلہ وسلم سجدہ کرتے تو ان کے پیچھے موجود شخص آپ کی بغلوں کی سفیدی دیکھ سکتا تھا۔ [مصنف ابن ابي شيبه/كتاب الصلوات/حدیث: 2664]

حضرت احمر فرماتے ہیں کہ نبی کریم صلی اللہ علیہ وآلہ وسلم سجدہ کرتے ہوئے اپنی رانوں کو اپنے پہلوؤں سے اس قدر جدا رکھتے تھے کہ ہمیں آپ پر ترس آتا تھا۔ [مصنف ابن ابي شيبه/كتاب الصلوات/حدیث: 2665]

حضرت عبد اللہ بن عبد اللہ بن اقرم خزاعی اپنے والد سے روایت کرتے ہیں کہ میں اپنے والد کے ساتھ مقام نمرہ میں تھا کہ ہمارے پاس سے کچھ سوار گذرے، انہوں نے راستے کے ایک طرف پڑاؤ ڈالا، میرے والد نے مجھ سے کہا کہ اے میرے پیارے بیٹے! تم اپنے ان جانوروں کے ساتھ رہو، میں ابھی آتا ہوں۔ وہ چلے تو میں بھی ان کے ساتھ چل پڑا۔ دیکھا تو وہاں رسول اللہ صلی اللہ علیہ وآلہ وسلم تھے، آپ نے نماز پڑھی، میں نے بھی آپ کے ساتھ نماز پڑھی، میں نماز میں آپ صلی اللہ علیہ وآلہ وسلم کی بغلوں کی سفیدی کو دیکھ رہا تھا۔ [مصنف ابن ابي شيبه/كتاب الصلوات/حدیث: 2666]

حضرت ابن عباس رضی اللہ عنہما فرماتے ہیں کہ سجدے میں حضور صلی اللہ علیہ وآلہ وسلم کی بغلوں کی سفیدی دکھائی دیتی تھی۔ [مصنف ابن ابي شيبه/كتاب الصلوات/حدیث: 2667]

حضرت حمید فرماتے ہیں کہ حضرت انس سجدہ کرتے ہوئے اعضاء کو ایک دوسرے سے جدا رکھتے تھے۔ [مصنف ابن ابي شيبه/كتاب الصلوات/حدیث: 2668]

حضرت ابراہیم فرماتے ہیں کہ جب نبی کریم صلی اللہ علیہ وآلہ وسلم سجدہ کرتے تو آپ کے پیچھے موجود شخص آپ کی بغلوں کی سفیدی دیکھ سکتا تھا۔ [مصنف ابن ابي شيبه/كتاب الصلوات/حدیث: 2669]