حضرت ہشام بن عروہ فرماتے ہیں کہ میرے والد اس حال میں مسجد میں د اخل ہوتے اور امام رکوع کی حالت میں ہوتا تو وہ صف سے پہلے ہی رکوع کرکے صف میں داخل ہوجاتے۔ [مصنف ابن ابي شيبه/كتاب الصلوات/حدیث: 2650]

حضرت وقاء فرماتے ہیں کہ میں اور حضرت سعید بن جبیر اس حال میں مسجد میں داخل ہوئے کہ لوگ رکوع کی حالت میں تھے، ہم دونوں نے دروازہ پر رکوع کرلیا اور پھر چلتے ہوئے صف میں آکر مل گئے۔ [مصنف ابن ابي شيبه/كتاب الصلوات/حدیث: 2651]

حضرت یزید بن ابی حبیب فرماتے ہیں کہ انہوں نے ابو سلمہ کو مسجد میں داخل ہوتے دیکھا، اس وقت لوگ رکوع کی حالت میں تھے، تو انہوں نے رکوع کیا، پھر رکوع ہی کی حالت میں آہستہ آہستہ چلتے ہوئے صف میں شامل ہوگئے۔ [مصنف ابن ابي شيبه/كتاب الصلوات/حدیث: 2652]

حضرت عطاء اس شخص کے بارے میں جو مسجد میں داخل ہو اور لوگ رکوع کی حالت میں ہوں فرماتے ہیں کہ جب وہ عورتوں کو عبور کرلے تو اللہ اکبر کہہ کر رکوع کرے، پھر چلتا ہواصف میں داخل ہوجائے، پھر اگر اسے اس سے پہلے سجدے مل جائیں تو جہاں اسے سجدہ ملے وہیں کرلے۔ [مصنف ابن ابي شيبه/كتاب الصلوات/حدیث: 2653]

حضرت عثمان بن اسود فرماتے ہیں کہ میں اور عمرو بن تمیم مسجد میں داخل ہوئے، امام نے رکوع کیا تو میں نے اور انہوں نے بھی رکوع کرلیا، پھر ہم دونوں رکوع کی حالت میں چلتے ہوئے صف کے ساتھ مل گئے۔ جب ہم نے نماز مکمل کرلی تو عمرو نے مجھ سے کہا کہ جو کچھ تم نے ابھی کیا ہے اسے کہتے ہوئے کس کو سنا ہے؟ میں نے کہا مجاہد سے، تو انہوں نے کہا کہ میں نے حضرت ابن زبیرکو ایسا کرتے دیکھا ہے۔ [مصنف ابن ابي شيبه/كتاب الصلوات/حدیث: 2654]

حضرت قاسم اور حسن فرماتے ہیں کہ اگر کوئی شخص مسجد میں داخل ہو اور لوگ رکوع کر چکے ہوں تو اگر اسے گمان ہو کہ وہ لوگوں کے سر اٹھانے سے پہلے انہیں رکوع میں پالے گا تو رکوع کرلے، پھر چلتا ہوا صف میں شامل ہوجائے۔ [مصنف ابن ابي شيبه/كتاب الصلوات/حدیث: 2655]

حضرت ابوہریرہ فرماتے ہیں کہ جب تک صف میں شامل نہ ہوجاؤ تکبیر نہ کہو۔ [مصنف ابن ابي شيبه/كتاب الصلوات/حدیث: 2656]

حضرت حسن سے اس شخص کے بارے میں سوال کیا گیا جو صف میں شامل ہونے سے پہلے ہی رکوع کرلے؟ فرمایا کہ اسے رکوع نہیں کرنا چاہئے۔ [مصنف ابن ابي شيبه/كتاب الصلوات/حدیث: 2657]

حضرت مغیرہ کہتے ہیں کہ میں نے حضرت ابراہیم سے پوچھا کہ جب میں مسجد میں داخل ہوں اور امام رکوع کی حالت میں ہو تو کیا میں صف میں شامل ہوئے بغیر رکوع کرسکتا ہوں۔ فرمایا تم ایسا نہ کرو۔ [مصنف ابن ابي شيبه/كتاب الصلوات/حدیث: 2658]

حضرت ابوہریرہ فرماتے ہیں کہ جب تم مسجد میں داخل ہو اور امام رکوع کی حالت میں ہو تو جب تک صف میں شامل نہ ہوجاؤ رکوع نہ کرو۔ [مصنف ابن ابي شيبه/كتاب الصلوات/حدیث: 2659]