حضرت کلیب فرماتے ہیں کہ حضرت عبداللہ بن یزید خطمی جب رکوع سے سر اٹھاتے تو تکبیر کہتے ہوئے جھکا کرتے تھے، جیسے جھولے میں ہوں، آپ اس طرح سجدے میں جاتے تھے۔ [مصنف ابن ابي شيبه/كتاب الصلوات/حدیث: 2640]

حضرت اسود فرماتے ہیں کہ حضرت عمر رکوع سے سر اٹھاتے ہوئے کمر سیدھی کرنے سے پہلے سمع اللہ لمن حمدہ کہا کرتے تھے۔ اور جب تکبیر کہتے تو جھکتے ہوئے کہا کرتے تھے۔ [مصنف ابن ابي شيبه/كتاب الصلوات/حدیث: 2641]

حضرت ابراہیم فرماتے ہیں کہ جب سجدہ کے لئے جھکو تو تکبیر کہو اور جب رکوع کے لئے جھکو تو بھی تکبیر کہو۔ [مصنف ابن ابي شيبه/كتاب الصلوات/حدیث: 2642]

حضرت اسود فرماتے ہیں کہ حضرت عمر سجدے کے لئے جھکتے وقت تکبیر کہا کرتے تھے۔ [مصنف ابن ابي شيبه/كتاب الصلوات/حدیث: 2643]

حضرت ابراہیم فرماتے ہیں کہ حضرت عمر جب سَمِعَ اللَّہُ لِمَنْ حَمِدَہُ کہتے تو تکبیر کہتے ہوئے جھکا کرتے تھے۔ [مصنف ابن ابي شيبه/كتاب الصلوات/حدیث: 2644]

حضرت زید بن وہب فرماتے ہیں کہ میں حضرت عبد اللہ کے ساتھ ان کے گھر سے مسجد کی طرف گیا۔ جب ہم مسجد کے درمیان میں پہنچے تو امام نے رکوع کرلیا۔ حضرت عبد اللہ نے تکبیر کہی اور رکوع میں چلے گئے، میں بھی ان کے ساتھ رکوع میں چلا گیا۔ پھر ہم رکوع کی حالت میں چلتے ہوئے صف تک پہنچے تو اس وقت لوگ اپنے سر رکوع سے بلند کرچکے تھے۔ پھر جب امام نے نماز پوری کرلی تو میں یہ خیال کرتے ہوئے کھڑا ہوگیا کہ میری وہ رکعت چھوٹ گئی ہے۔ لیکن حضرت عبداللہ نے میرا ہاتھ پکڑ کر مجھے بٹھا دیا۔ اور فرمایا کہ تمہیں وہ رکعت مل گئی ہے۔ [مصنف ابن ابي شيبه/كتاب الصلوات/حدیث: 2645]

حضرت ابن سیرین فرماتے ہیں کہ حضرت ابو عبیدہ ایک مرتبہ مسجد میں تشریف لائے تو لوگ رکوع کی حالت میں تھے، آپ نے صف سے پیچھے رکوع کیا، پھر آپ چلتے ہوئے صف میں داخل ہوگئے۔ پھر انہوں نے اپنے والد سے بھی اسی طرح بیان کیا۔ [مصنف ابن ابي شيبه/كتاب الصلوات/حدیث: 2646]

حضرت ابو امامہ فرماتے ہیں کہ حضرت زید بن ثابت نے صف تک پہنچنے سے پہلے رکوع کیا اور پھر رکوع کی حالت میں چلتے ہوئے صف میں جا کے مل گئے۔ [مصنف ابن ابي شيبه/كتاب الصلوات/حدیث: 2647]

حضرت کثیر بن افلح فرماتے ہیں کہ حضرت زید بن ثابت نے جماعت کو اس حال میں پایا کہ لوگ رکوع کی حالت میں تھے، انہوں نے صف میں ملے بغیر رکوع کیا اور پھر صف میں شامل ہوگئے۔ [مصنف ابن ابي شيبه/كتاب الصلوات/حدیث: 2648]

حضرت عبید اللہ بن ابی یزید فرماتے ہیں کہ میں نے سعید بن جبیر کو یونہی کرتے دیکھا ہے۔ [مصنف ابن ابي شيبه/كتاب الصلوات/حدیث: 2649]