حضرت عبداللہ نے فرمایا کہ جب امام سَمِعَ اللَّہُ لِمَنْ حَمِدَہُ کہے تو مقتدی اللَّہُمَّ رَبَّنَا لَکَ الْحَمْدُ کہیں۔ [مصنف ابن ابي شيبه/كتاب الصلوات/حدیث: 2620]

حضرت عامر فرماتے ہیں کہ مقتدی امام کے پیچھے سَمِعَ اللَّہُ لِمَنْ حَمِدَہُ نہ کہیں، بلکہ اللَّہُمَّ رَبَّنَا لَکَ الْحَمْدُ کہیں۔ [مصنف ابن ابي شيبه/كتاب الصلوات/حدیث: 2621]

حضرت ابو سعید سے روایت ہے کہ حضور صلی اللہ علیہ وآلہ وسلم نے ارشاد فرمایا کہ جب تمہارا امام سَمِعَ اللَّہُ لِمَنْ حَمِدَہُ کہے تو تم اللَّہُمَّ رَبَّنَا لَکَ الْحَمْدُ کہو۔ [مصنف ابن ابي شيبه/كتاب الصلوات/حدیث: 2622]

حضرت محمد فرماتے ہیں کہ جب امام سَمِعَ اللَّہُ لِمَنْ حَمِدَہُ، کہے تو اس کے مقتدی سَمِعَ اللَّہُ لِمَنْ حَمِدَہُ، اللَّہُمَّ رَبَّنَا لَکَ الْحَمْدُ کہیں۔ [مصنف ابن ابي شيبه/كتاب الصلوات/حدیث: 2623]

ایک مدنی صحابی روایت کرتے ہیں کہ حضور صلی اللہ علیہ وآلہ وسلم نے سجدے کی حالت میں میرے جوتوں کی آواز سنی، جب نماز سے فارغ ہوئے تو آپ نے فرمایا کہ میں نے ابھی کس کے جوتوں کی آواز سنی تھی؟ میں نے عرض کیا کہ میں تھا۔ آپ نے فرمایا پھر تم نے کیا کیا؟ میں نے کہا کہ میں نے آپ کو سجدے کی حالت میں پایا اور آپ کے ساتھ میں نے بھی سجدہ کر لیا۔ حضور صلی اللہ علیہ وآلہ وسلم نے فرمایا کہ یونہی کیا کرو اور اس رکعت کو شمار نہ کرو۔ جس شخص نے مجھے رکوع، سجدے یا قیام کی حالت میں پایا تو اسے چاہئے کہ میرے ساتھ اسی حالت میں شریک ہو جائے۔ [مصنف ابن ابي شيبه/كتاب الصلوات/حدیث: 2624]

ایک اور سند سے یونہی منقول ہے۔ [مصنف ابن ابي شيبه/كتاب الصلوات/حدیث: 2625]

حضرت ابن عمر رضی اللہ عنہما اور حضرت زید بن ثابت فرماتے ہیں کہ اگر کوئی شخص لوگوں کو اس حال میں پائے کہ وہ رکوع سے سر اٹھا چکے ہیں تو وہ اللہ اکبر کہہ کر سجدہ کرے اور اس رکعت کو شمار نہ کرے۔ [مصنف ابن ابي شيبه/كتاب الصلوات/حدیث: 2626]

حسن اور ابراہیم اس شخص کے بارے میں جو امام کو سجدہ کی حالت میں پائے فرماتے ہیں کہ وہ اس کی اتباع کرے، اور اس کے ساتھ سجدہ کرے۔ امام کی مخالفت سے کام نہ لے۔ نیز سجدوں کی وجہ سے اس رکعت کو شمار نہ کرے ہاں البتہ اگر رکوع میں پا لے تو رکعت مل گئی۔ [مصنف ابن ابي شيبه/كتاب الصلوات/حدیث: 2627]

حضرت ابراہیم فرماتے ہیں کہ امام کو کسی بھی حالت میں پاؤ تو اس کی مخالفت نہ کرو۔ [مصنف ابن ابي شيبه/كتاب الصلوات/حدیث: 2628]

حضرت قتادہ فرماتے ہیں کہ اگر تم لوگوں کو سجود کی حالت میں پاؤ تو ان کے ساتھ سجدہ کر لو لیکن اس رکعت کو شمار نہ کرو۔ [مصنف ابن ابي شيبه/كتاب الصلوات/حدیث: 2629]