سیدنا جابر رضی اللہ عنہ سے روایت ہے، انہوں نے بیان کیا کہ ایک مرتبہ جمعہ کے دن تجارت کا ایک قافلہ آیا، اس وقت رسول اللہ صلی اللہ علیہ وسلم خطبہ ارشاد فرما رہے تھے، پس لوگ (اسے) دیکھنے کے لیے (مسجد سے) چلے گئے اور رسول اللہ صلی اللہ علیہ وسلم کے ہمراہ صرف بارہ آدمی باقی رہ گئے، تب یہ آیتِ مبارکہ نازل ہوئی: ﴿وَإِذَا رَأَوْا تِجَارَةً أَوْ لَهْوًا انْفَضُّوا إِلَيْهَا وَتَرَكُوكَ قَائِمًا﴾ ”اور جب انہوں نے کوئی تجارت یا کھیل تماشا دیکھا تو وہ اس کی طرف لپک گئے اور آپ کو (منبر پر) کھڑا ہی چھوڑ دیا۔“ [سورة الجمعة: 11] [مصنف ابن ابي شيبه/كتاب الجمعة/حدیث: 5291]

طاؤس رحمہ اللہ سے روایت ہے کہ انہوں نے فرمایا: ”جمعہ کے دن منبر پر بیٹھنا بدعت ہے۔“ [مصنف ابن ابي شيبه/كتاب الجمعة/حدیث: 5292]

عبدالملک بن عمیر رحمہ اللہ سے روایت ہے کہ سیدنا مغیرہ رضی اللہ عنہ جمعہ کا خطبہ کھڑے ہو کر ارشاد فرماتے تھے اور ان کا صرف ایک ہی مؤذن تھا۔ [مصنف ابن ابي شيبه/كتاب الجمعة/حدیث: 5293]

سماک سے روایت ہے، انہوں نے کہا: ”میں نے سیدنا نعمان رضی اللہ عنہ کو کھڑے ہو کر خطبہ دیتے ہوئے دیکھا۔“ [مصنف ابن ابي شيبه/كتاب الجمعة/حدیث: 5294]

صالح رحمہ اللہ سیدنا ابوہریرہ رضی اللہ عنہ سے روایت کرتے ہیں کہ مروان نے انہیں مدینہ منورہ میں اپنا قائم مقام مقرر کیا ہوا تھا، وہ (نمازِ جمعہ کے دوران) دو خطبے ارشاد فرماتے اور (ان کے مابین) دو مرتبہ نشست فرماتے تھے۔ [مصنف ابن ابي شيبه/كتاب الجمعة/حدیث: 5295]

سیدنا عبداللہ بن عباس رضی اللہ عنہما سے روایت ہے کہ نبی کریم صلی اللہ علیہ وسلم جمعہ کے دن کھڑے ہو کر خطبہ ارشاد فرمایا کرتے تھے، پھر (دونوں خطبوں کے درمیان) کچھ دیر کے لیے تشریف فرما ہوتے، پھر دوبارہ قیام فرماتے اور (دوسرا) خطبہ ارشاد فرماتے۔ [مصنف ابن ابي شيبه/كتاب الجمعة/حدیث: 5296]

ابراہیم فرماتے ہیں کہ حضرت عبد اللہ سے جمعہ کے خطبہ کی کیفیت کے بارے میں سوال کیا گیا تو انہوں نے قرآن مجید کی یہ آیت پڑھی { وَتَرَکُوک قَائِمًا } یعنی وہ آپ کو کھڑے کا کھڑا چھوڑ دیتے ہیں۔
حضرت عمرو بن مرہ فرماتے ہیں کہ میں نے حضرت ابو عبیدہ سے جمعہ کے خطبہ کے بارے میں سوال کیا تو انہوں نے یہ آیت پڑھی { وَتَرَکُوک قَائِمًا } یعنی وہ آپ کو کھڑے کا کھڑا چھوڑ دیتے ہیں۔ [مصنف ابن ابي شيبه/كتاب الجمعة/حدیث: 5297]

حضرت یزید فرماتے ہیں کہ حضرت ابن سیرین سے نبی کریم صلی اللہ علیہ وآلہ وسلم کے جمعہ کے خطبہ کی کیفیت کے بارے میں سوال کیا گیا تو انہوں نے قرآن مجید کی یہ آیت پڑھی { وَتَرَکُوک قَائِمًا } یعنی وہ آپ کو کھڑے کا کھڑا چھوڑ دیتے ہیں۔ [مصنف ابن ابي شيبه/كتاب الجمعة/حدیث: 5298]

امام شعبی رحمہ اللہ سے روایت ہے، انہوں نے کہا: ”سیدنا معاویہ رضی اللہ عنہ نے «قاعدا» (بیٹھ کر) صرف اس لیے خطبہ دیا کیونکہ ان کے پیٹ کی چربی اور جسم کا گوشت بڑھ گیا (یعنی وہ بھاری بھرکم ہو گئے) تھا۔“ [مصنف ابن ابي شيبه/كتاب الجمعة/حدیث: 5299]

سیدنا عبداللہ بن عمر رضی اللہ عنہما سے روایت ہے کہ نبی کریم صلی اللہ علیہ وسلم (جمعہ کے موقع پر) دو خطبے ارشاد فرمایا کرتے تھے اور ان دونوں کے درمیان (تھوڑی دیر کے لیے) نشست فرماتے تھے۔ [مصنف ابن ابي شيبه/كتاب الجمعة/حدیث: 5300]