ابومجلز رحمہ اللہ سے روایت ہے، انہوں نے کہا: ”جب تم جمعہ کے دن (مسجد میں) اس وقت آؤ کہ امام خطبہ دے رہا ہو، تو اگر تم چاہو تو دو رکعتیں پڑھ لو اور اگر چاہو تو (بغیر نماز پڑھے) بیٹھ جاؤ۔“ [مصنف ابن ابي شيبه/كتاب الجمعة/حدیث: 5271]

سیدنا مجاہد رحمہ اللہ سے اللہ تعالیٰ کے اس فرمان ﴿وَلَا تَنْكِحُوا مَا نَكَحَ آبَاؤُكُمْ مِنَ النِّسَاءِ﴾ [سورة النساء: 22] کے متعلق روایت ہے، انہوں نے کہا: «مَنْ كَانَ يَطُولُهَا» ”اس سے مراد وہ عورت ہے جس کے ساتھ (باپ) ہمبستری کرتا تھا۔“ [مصنف ابن ابي شيبه/كتاب الجمعة/حدیث: 5272]

حضرت علی رضی اللہ عنہ سے بھی اسی طرح منقول ہے۔ [مصنف ابن ابي شيبه/كتاب الجمعة/حدیث: 5273]

حضرت عطاء فرماتے ہیں کہ وہ حضرات جمعہ کے دن امام کے خطبہ دیتے وقت نماز پڑھنے کو مکروہ سمجھتے تھے۔ [مصنف ابن ابي شيبه/كتاب الجمعة/حدیث: 5274]

ابن سیرین رحمہ اللہ سے روایت ہے کہ وہ فرمایا کرتے تھے: ”جب امام (خطبہ کے لیے) نکل آئے تو کوئی بھی شخص نماز ادا نہ کرے یہاں تک کہ امام (نماز سے) فارغ ہو جائے۔“ [مصنف ابن ابي شيبه/كتاب الجمعة/حدیث: 5275]

اسماعیل بن ابی خالد سے روایت ہے، انہوں نے کہا: ”میں نے شریح رحمہ اللہ کو دیکھا کہ وہ جمعہ کے دن (مسجد کے) ابوابِ کندہ سے داخل ہوئے، پھر وہ (تحیۃ المسجد ادا کیے بغیر) بیٹھ گئے اور نماز نہیں پڑھی۔“ [مصنف ابن ابي شيبه/كتاب الجمعة/حدیث: 5276]

سیدنا عروہ بن زبیر رحمہ اللہ سے روایت ہے، انہوں نے فرمایا: ”جب امام منبر پر بیٹھ جائے تو پھر کوئی نماز نہیں ہے۔“ [مصنف ابن ابي شيبه/كتاب الجمعة/حدیث: 5277]

امام زہری رحمہ اللہ سے اس شخص کے متعلق روایت ہے جو جمعہ کے دن (مسجد میں) اس وقت آئے جب امام خطبہ دے رہا ہو اور وہ «ولا يصلي» ”نماز پڑھے بغیر“ ہی بیٹھ جائے۔ [مصنف ابن ابي شيبه/كتاب الجمعة/حدیث: 5278]

ابن عون سے روایت ہے، انہوں نے کہا: ”ابن سیرین (مسجد میں آ کر) بیٹھ جایا کرتے تھے اور (نفل) نماز ادا نہیں کرتے تھے۔“ [مصنف ابن ابي شيبه/كتاب الجمعة/حدیث: 5279]

حضرت ثعلبہ بن ابی مالک قرظی فرماتے ہیں کہ میں نے حضرت عمر رضی اللہ عنہ اور حضرت عثمان کا زمانہ پایا، ہمارا دستور ان کے زمانے میں یہ تھا کہ جب امام جمعہ کے لئے آجاتا تو ہم نماز چھوڑ دیتے تھے۔ [مصنف ابن ابي شيبه/كتاب الجمعة/حدیث: 5280]