حضرت ابو اسحاق فرماتے ہیں کہ حضرت علی رضی اللہ عنہ جب چاند دیکھتے تو یہ کلمات کہا کرتے تھے: اے اللہ! ہمیں مدد، خیر، برکت، فتح اور نور عطا فرما۔ ہم اس چاند کے شر سے اور اس کے بعد آنے والی چیز کے شر سے تیری پناہ مانگتے ہیں۔ [مصنف ابن ابي شيبه/كتاب الصيام/حدیث: 9991]

حضرت ابو مسعود بدری فرماتے ہیں کہ میں اس محل سے منہ کے بل گر جاؤں یہ مجھے اس بات سے زیادہ پسند ہے کہ میں وہ کام کروں جو یہ لوگ کرتے ہیں کہ جب تم میں سے کوئی چاند کو دیکھتا ہے تو گویا وہ اپنے رب کو دیکھ رہا ہو۔ [مصنف ابن ابي شيبه/كتاب الصيام/حدیث: 9992]

حضرت حسین بن علی رحمہ اللہ فرماتے ہیں کہ میں نے حضرت ہشام بن حسان سے سوال کیا کہ حضرت حسن چاند دیکھ کر کون سی دعا پڑھا کرتے تھے۔ انہوں نے فرمایا کہ وہ یہ کہتے تھے: اے اللہ! اس مہینے کو برکت، نور، اجر اور معافی کا ذریعہ بنا دے۔ اے اللہ! تو اپنے بندوں کے درمیان خیر کو تقسیم کرتا ہے۔ تو خیر کو ہمارے درمیان اس طرح تقسیم کردے جیسے تو اپنے نیک بندوں کے درمیان تقسیم کرتا ہے۔ [مصنف ابن ابي شيبه/كتاب الصيام/حدیث: 9993]

حضرت ابن جریج حضرت عطاء سے نقل کرتے ہیں کہ ایک آدمی کو ایک ویرانے میں چاند نظر آیا تو اس نے کسی کہنے والے کو یہ کلمات کہتے سنا: اے اللہ! اس چاند کو ہم پر امن وایمان، سلامتی واسلام، ہدایت و مغفرت اور ایسی توفیق کے ساتھ طلوع فرما جس سے تو راضی ہو، ان کاموں سے حفاظت عطا فرما جو تیری ناراضگی کا سبب ہوں۔ میرا اور تیرا رب اللہ ہے۔ وہ آدمی کہتا ہے کہ وہ مسلسل مجھے یہ کلمات سکھاتا رہا یہاں تک کہ میں نے انہیں زبانی یاد کرلیا، اور مجھے کوئی نظر نہیں آرہا تھا۔ [مصنف ابن ابي شيبه/كتاب الصيام/حدیث: 9994]

ابراہیم فرماتے ہیں کہ اسلاف کو یہ بات پسند تھی کہ آدمی چاند دیکھ کر یہ کلمات کہے: میرا اور تیرا رب اللہ ہے۔ [مصنف ابن ابي شيبه/كتاب الصيام/حدیث: 9995]

حضرت مجاہد چانددیکھ کر آواز بلند کرنے اور اشارہ کرنے کو مکروہ قرار دیتے تھے۔ [مصنف ابن ابي شيبه/كتاب الصيام/حدیث: 9996]

حضرت قتادہ سے روایت ہے کہ رسول اللہ صلی اللہ علیہ وآلہ وسلم نے جب چاند دیکھا تو تین مرتبہ یہ کلمات فرمائے: یہ خیر اور ہدایت کا چاند ہے، یہ خیر اور ہدایت کا چاند ہے، میں اس رب پر ایمان لایا جس نے تجھے پیدا کیا۔ پھر فرمایا تمام تعریفیں اس اللہ کے لئے ہیں جو فلاں مہینے کو لے گیا۔ [مصنف ابن ابي شيبه/كتاب الصيام/حدیث: 9997]

حضرت ابن عباس رضی اللہ عنہما اس بات کو مکروہ قرار دیتے تھے کہ چاند کی طرف رخ کرکے کھڑا ہوا جائے، وہ چاند کی طرف پہلو کر کے کھڑے ہوتے اور فرماتے: اللہ سب سے بڑا ہے، اور تمام تعریفیں اس اللہ کے لئے ہیں جو اس مہینے کو لے گیا اور اس مہینے کو لے آیا۔ [مصنف ابن ابي شيبه/كتاب الصيام/حدیث: 9998]

حسن سے نیروز کے روزے کے بارے میں سوال کیا گیا تو آپ نے اسے مکروہ قرار دیا اور فرمایا کہ وہ لوگ اس کی تعظیم کرتے ہیں۔ (نیروز اہل فارس کے نزدیک سال کے پہلے دن کی عید ہوا کرتی تھی۔ نیز میلادی سال کے مطابق وہ اکیس مارچ کو خوشی کا دن مناتے تھے۔) [مصنف ابن ابي شيبه/كتاب الصيام/حدیث: 9999]

حضرت حسن سے نیروز کے روزے کے بارے میں سوال کیا گا تو آپ نے فرمایا کہ تمہیں نیروز کے دن سے کیا واسطہ؟ تم اس کا خیال نہ کرو یہ تو عجمیوں کے لئے ہے۔ [مصنف ابن ابي شيبه/كتاب الصيام/حدیث: 10000]