حضرت عبد اللہ بن شقیق فرماتے ہیں کہ میں نے حضرت عائشہ رضی اللہ عنہا سے نبی کریم صلی اللہ علیہ وآلہ وسلم کے روزوں کے بارے میں سوال کیا تو آپ نے فرمایا کہ میرے علم کے مطابق نبی کریم صلی اللہ علیہ وآلہ وسلم نے سوائے رمضان کے اور کسی مہینے میں سارا مہینہ روزے نہیں رکھے، اور نہ کسی مہینے میں سارا مہینہ روزے چھوڑے بلکہ اس میں کچھ روزے ضرور رکھتے۔ [مصنف ابن ابي شيبه/كتاب الصيام/حدیث: 10011]

حضرت لقیط بن صبرہ سے روایت ہے کہ حضور صلی اللہ علیہ وآلہ وسلم نے فرمایا کہ ناک میں پانی ڈالنے میں مبالغہ کرو البتہ اگر روزہ ہو تو پھر ایسا نہ کرو۔ [مصنف ابن ابي شيبه/كتاب الصيام/حدیث: 10012]

حضرت فضیل فرماتے ہیں کہ حضرت ضحاک اور ان کے ساتھی ماہ رمضان میں خراسان میں تھے، وہ کلی نہیں کیا کرتے تھے۔ [مصنف ابن ابي شيبه/كتاب الصيام/حدیث: 10013]

حضرت ابن سیرین اس بات کو مکروہ قرار دیتے تھے کہ روزہ دار اس طرح ناک میں پانی ڈالے کہ پانی اس کے حلق میں چلا جائے۔ [مصنف ابن ابي شيبه/كتاب الصيام/حدیث: 10014]

حضرت شعبی فرماتے ہیں کہ اگر تمہارا روزہ ہو تو ناک میں پانی ڈالنے میں مبالغہ نہ کرو۔ [مصنف ابن ابي شيبه/كتاب الصيام/حدیث: 10015]

حضرت ابوہریرہ فرماتے ہیں کہ اگر تم میں سے کسی کا روزہ ہو تو وہ تیل لگائے تاکہ کسی کو اس کا روزہ ہونے کا علم نہ ہو۔ جب تھوک پھینکے تو چھپا کر پھینکے۔ یہ بات فرماتے ہوئے راوی یزید بن ہارون نے ہاتھ سے اس طرح اشارہ کیا جیسے منہ کو ڈھانپ رہے ہوں۔ [مصنف ابن ابي شيبه/كتاب الصيام/حدیث: 10016]

حضرت عیسیٰ بن مریم فرماتے تھے کہ جب تم میں سے کسی کا روزہ ہو تو اپنے ہونٹوں پر تیل لگائے۔ [مصنف ابن ابي شيبه/كتاب الصيام/حدیث: 10017]

حضرت عبد اللہ فرماتے ہیں کہ جب تم میں سے کسی کا روزہ ہو تو تیل لگائے۔ [مصنف ابن ابي شيبه/كتاب الصيام/حدیث: 10018]

حضرت خرشہ بن حر فرماتے ہیں کہ میں نے حضرت عمر کو دیکھا کہ آپ رجب میں اس وقت تک لوگوں کے ہاتھوں پر مارتے تھے جب تک وہ کھانا کھانے کے لئے اپنے ہاتھ برتنوں میں نہ رکھ دیتے۔ آپ فرماتے کھانا کھاؤ، یہ وہ مہینہ ہے جس کی تعظیم زمانہ جاہلیت کے لوگ کیا کرتے تھے۔ [مصنف ابن ابي شيبه/كتاب الصيام/حدیث: 10019]

حضرت زید بن اسلم فرماتے ہیں کہ رسول اللہ صلی اللہ علیہ وآلہ وسلم سے رجب کے روزے کے بارے میں سوال کیا گیا تو آپ نے فرمایا کہ تم شعبان میں روزہ کیوں نہیں رکھتے؟ [مصنف ابن ابي شيبه/كتاب الصيام/حدیث: 10020]