حضرت عامر بن مسعود سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ سردیوں کا روزہ ٹھنڈی غنیمت ہے۔ [مصنف ابن ابي شيبه/كتاب الصيام/حدیث: 10001]

حضرت عمر فرماتے ہیں کہ سردی غنیمت ہے۔ [مصنف ابن ابي شيبه/كتاب الصيام/حدیث: 10002]

حضرت مجاہد فرماتے ہیں کہ جب سردی کا موسم آتا تو حضرت عبید بن عمیر فرمایا کرتے تھے کہ اے قرآن والو! نماز کے لئے تمہاری رات لمبی ہوگئی ہے اور روزے کے لئے دن چھوٹا ہوگیا ہے۔ اسے غنیمت جانو۔ [مصنف ابن ابي شيبه/كتاب الصيام/حدیث: 10003]

حضرت ابو زہرہ فرماتے ہیں کہ نبی کریم صلی اللہ علیہ وآلہ وسلم جب روزہ افطار کرتے تو یہ فرماتے: اے اللہ! میں نے تیرے لئے روزہ رکھا اور تیرے ہی رزق پر افطار کیا۔ [مصنف ابن ابي شيبه/كتاب الصيام/حدیث: 10004]

راوی کہتے ہیں کہ حضرت ربیع بن خثیم یہ کہا کرتے تھے: تمام تعریفیں اس اللہ کے لئے ہیں جس نے میری مدد کی تو میں نے روزہ رکھا اور مجھے رزق دیا تو میں نے افطار کیا۔ [مصنف ابن ابي شيبه/كتاب الصيام/حدیث: 10005]

حضرت انس رضی اللہ عنہ فرماتے ہیں کہ نبی کریم صلی اللہ علیہ وآلہ وسلم جب کسی گھر والوں کے ساتھ روزہ افطار کرتے تو یہ کلمات فرماتے: تمہارے پاس روزہ دار روزہ افطار کریں، تمہارا کھانا نیک لوگ کھائیں اور تم پر فرشتے نازل ہوں۔ [مصنف ابن ابي شيبه/كتاب الصيام/حدیث: 10006]

حضرت عوف بن مالک اشجعی سے روایت ہے کہ حضرت عمر نے فرمایا کہ رمضان کے علاوہ کسی دن روزہ اور مسکین کو کھانا کھلانا رمضان کے ایک دن کا روزہ رکھنے کے برابر ہے۔ [مصنف ابن ابي شيبه/كتاب الصيام/حدیث: 10007]

حضرت انس رضی اللہ عنہ فرماتے ہیں کہ بعض اوقات نبی کریم صلی اللہ علیہ وآلہ وسلم کسی مہینے میں اس طرح مسلسل روزہ رکھتے کہ ہم محسوس کرتے کہ آپ روزہ نہیں چھوڑیں گے اور کیھی آپ اس طرح روزہ رکھنا چھوڑتے کہ ہمیں محسوس ہوتا کہ آپ روزہ نہیں رکھیں گے۔ [مصنف ابن ابي شيبه/كتاب الصيام/حدیث: 10008]

حضرت عثمان بن حکیم فرماتے ہیں کہ میں نے حضرت سعید بن جبیر سے رجب کے روزوں کے بارے میں سوال کیا تو آپ نے فرمایا کہ میں نے حضرت عبداللہ بن عباس کو فرماتے ہوئے سنا کہ نبی کریم صلی اللہ علیہ وآلہ وسلم اس طرح مسلسل روزہ رکھتے تو ہم محسوس کرتے کہ آپ روزہ نہیں چھوڑیں گے اور کبھی آپ اس طرح روزے چھوڑتے کہ ہمیں محسوس ہوتا کہ آپ روزہ نہیں رکھیں گے۔ [مصنف ابن ابي شيبه/كتاب الصيام/حدیث: 10009]

حضرت عائشہ رضی اللہ عنہا فرماتی ہیں کہ میرے علم کے مطابق نبی کریم صلی اللہ علیہ وآلہ وسلم نے سوائے رمضان کے اور کسی مہینے میں سارا مہینہ روزے نہیں رکھے۔ [مصنف ابن ابي شيبه/كتاب الصيام/حدیث: 10010]