حضرت ابن عباس رضی اللہ عنہما فرماتے ہیں کہ اس سے مراد زنا ہے۔ { إِلَّا مَا مَلَكَتْ أَيْمَانُكُمْ } کا مطلب یہ ہے کہ آدمی اپنی اس باندی کو جو اس کے غلام کی بیوی ہو (اس سے) الگ کر لے اور اگر چاہے تو اس سے جماع کرے۔ [مصنف ابن ابي شيبه/كتاب النكاح/حدیث: 17760]

ایک اور صاحب فرماتے ہیں کہ اس سے مراد دشمن کی قیدی عورتیں ہیں۔ [مصنف ابن ابي شيبه/كتاب النكاح/حدیث: 17761]

حضرت سعید بن جبیر قرآن مجید کی آیت { وَالْمُحْصَنَاتُ مِنَ النِّسَآئِ } کی تفسیر میں فرماتے ہیں کہ یہ آیت حنین والوں کی عورتوں کے بارے میں نازل ہوئی۔ جب رسول اللہ صلی اللہ علیہ وسلم نے حنین کو فتح فرمایا تو مسلمانوں کے ہاتھ بہت سے قیدی لگے۔ جب کوئی مسلمان کسی قیدی عورت کے پاس جاتا تو وہ کہتی کہ میرا تو خاوند ہے۔ چناچہ حضور صلی اللہ علیہ وسلم سے اس بات کا تذکرہ کیا گیا تو اللہ تعالیٰ نے اس آیت کو نازل فرمایا: { وَالْمُحْصَنَاتُ مِنَ النِّسَائِ إلاَّ مَا مَلَکَتْ أَیْمَانُکُمْ } اس سے مراد وہ قیدی عورتیں ہیں جن کے خاوند ہوں۔ [مصنف ابن ابي شيبه/كتاب النكاح/حدیث: 17762]

حضرت مجاہد قرآن مجید کی آیت { وَالْمُحْصَنَاتُ مِنَ النِّسَائِ } کی تفسیر میں فرماتے ہیں ہیں کہ اس میں زنا سے منع کیا گیا ہے۔ [مصنف ابن ابي شيبه/كتاب النكاح/حدیث: 17763]

حضرت سعید بن مسیب قرآن مجید کی آیت { وَالْمُحْصَنَاتُ مِنَ النِّسَائِ } کی تفسیر میں فرماتے ہیں کہ اس آیت سے دھوکہ کا شکار نہ ہوجانا۔ اس سے مراد باندیاں ہیں غلام نہیں ہیں۔ [مصنف ابن ابي شيبه/كتاب النكاح/حدیث: 17764]

حضرت ابو رزین قرآن مجید کی آیت { لَا یَحِلُّ لَکَ النِّسَائُ مِنْ بَعْدُ } کی تفسیر میں فرماتے ہیں کہ تمہارے لئے صرف وہ مشرکہ عورتیں حلال ہیں جو قیدی بنائی گئی ہوں یا تم ان کے مالک بن جاؤ۔ [مصنف ابن ابي شيبه/كتاب النكاح/حدیث: 17765]

حضرت مجاہد قرآن مجید کی آیت { لَا یَحِلُّ لَکَ النِّسَائُ مِنْ بَعْدُ } کی تفسیر میں فرماتے ہیں کہ (اس کے بعد آپ کے لئے کوئی عورت حلال نہیں) نہ کوئی مسلمان عورت، نہ عیسائی عورت اور نہ کافر عورت۔ [مصنف ابن ابي شيبه/كتاب النكاح/حدیث: 17766]

حضرت مجاہد قرآن مجید کی آیت { لَا یَحِلُّ لَکَ النِّسَائُ مِنْ بَعْدُ } کی تفسیر میں فرماتے ہیں کہ اس سے مراد اہل کتاب کی عورتیں ہیں۔ [مصنف ابن ابي شيبه/كتاب النكاح/حدیث: 17767]

حضرت مجاہد قرآن مجید کی آیت { لَا یَحِلُّ لَکَ النِّسَائُ مِنْ بَعْدُ } کی تفسیر میں فرماتے ہیں کہ اس سبب کے بعد کی عورتیں مراد ہیں۔ [مصنف ابن ابي شيبه/كتاب النكاح/حدیث: 17768]

حضرت زیاد کہتے ہیں کہ میں نے حضرت ابی رضی اللہ عنہ سے سوال کیا کہ اگر رسول اللہ صلی اللہ علیہ وسلم کی سب ازواج انتقال کرجاتیں تو کیا آپ کے لئے نکاح حلال ہوتا؟ حضرت ابی نے جواب دیا کہ آپ کو کون منع کرتا؟ اللہ تعالیٰ نے حضور صلی اللہ علیہ وسلم کے لئے عورتوں کی ایک خاص قسم کو حلال کیا تھا۔ آپ ان میں سے جس سے چاہتے شادی کرسکتے تھے پھر انہوں نے اس آیت مبارکہ کی تلاوت فرمائی { یَا أَیُّہَا النَّبِیُّ إنَّا أَحْلَلْنَا لَکَ أَزْوَاجَک اللاَّتِی } یہاں تک کہ آیت مکمل فرمائی۔ [مصنف ابن ابي شيبه/كتاب النكاح/حدیث: 17769]