حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم کا وصال اس وقت تک نہیں ہوا جب تک اللہ تعالیٰ نے آپ کے لئے عورتوں کو حلال نہ کر دیا۔ [مصنف ابن ابي شيبه/كتاب النكاح/حدیث: 17770]

حضرت عطاء فرماتے ہیں کہ قرآن مجید کی آیت { وَلاَ أَنْ تَبَدَّلَ بِہِنَّ مِنْ أَزْوَاجٍ وَلَوْ أَعْجَبَک حُسْنُہُنَّ } میں جن عورتوں کو اپنے نکاح میں نہ لانے کا حکم دیا جارہا ہے ان سے یہودی اور عیسائی عورتیں مراد ہیں۔ [مصنف ابن ابي شيبه/كتاب النكاح/حدیث: 17771]

حضرت حکم قرآن مجید کی آیت { لَا یَحِلُّ لَکَ النِّسَائُ مِنْ بَعْدُ } کی تفسیر میں فرماتے ہیں کہ اس سے مراد اہل کتاب یا دیہاتی عورتیں ہیں۔ [مصنف ابن ابي شيبه/كتاب النكاح/حدیث: 17772]

حضرت عبد اللہ بن شداد قرآن مجید کی آیت { وَلاَ أَنْ تَبَدَّلَ بِہِنَّ مِنْ أَزْوَاجٍ } کی تفسیر میں فرماتے ہیں کہ اس سے مراد ہے کہ اگر نبی اپنی ازواج کو طلاق دے دیں تو ان عورتوں کو تبدیل کرنا حلال نہیں۔ [مصنف ابن ابي شيبه/كتاب النكاح/حدیث: 17773]

حضرت عبد اللہ بن شداد فرماتے ہیں کہ نبی کریم صلی اللہ علیہ وسلم اس آیت کے نازل ہونے کے بعد بھی جس سے چاہتے نکاح فرماتے تھے۔ جب یہ آیت نازل ہوئی تو آپ کے نکاح میں نو عورتیں تھیں، اور آپ نے حضرت ام حبیبہ اور حضرت جویریہ رضی اللہ عنہما سے نکاح فرمایا۔ [مصنف ابن ابي شيبه/كتاب النكاح/حدیث: 17774]

حضرت حسن فرماتے ہیں کہ قرآن مجید کی آیت { وَلاَ أَنْ تَبَدَّلَ بِہِنَّ مِنْ أَزْوَاجٍ } میں اللہ تعالیٰ نے اپنے نبی کو ان نو عورتوں پر محدود فرما دیا جن کی موجودگی میں آپ کا وصال ہوا۔ [مصنف ابن ابي شيبه/كتاب النكاح/حدیث: 17775]

حضرت علی بن زید کہتے ہیں کہ میں نے حضرت علی بن حسین کو یہ بات بتائی تو انہوں نے فرمایا کہ بلکہ حضور صلی اللہ علیہ وسلم کو نکاح کرنے کی اجازت تھی۔ [مصنف ابن ابي شيبه/كتاب النكاح/حدیث: 17776]

حضرت عکرمہ قرآن مجید کی آیت { اَلزَّانِیْ لَا یَنْکِحُ اِلَّا زَانِیَۃً } کی تفسیر میں فرماتے ہیں کہ زانی زانیہ سے ہی زنا کرتا ہے۔ [مصنف ابن ابي شيبه/كتاب النكاح/حدیث: 17777]

حضرت سعید بن مسیب قرآن مجید کی آیت { اَلزَّانِیْ لَا یَنْکِحُ اِلَّا زَانِیَۃً } کی تفسیر میں فرماتے ہیں کہ کہا جاتا تھا کہ اس کے بعد والی آیت { وَأَنْکِحُوا الأَیَامَی مِنْکُمْ } نے اسے منسوخ کر دیا ہے۔ اور کہا جاتا تھا کہ وہ (بدکار عورت) بھی مسلمانوں کی بے نکاح عورتوں میں داخل ہے۔ [مصنف ابن ابي شيبه/كتاب النكاح/حدیث: 17778]

حضرت سعید بن جبیر قرآن مجید کی آیت { اَلزَّانِیْ لَا یَنْکِحُ اِلَّا زَانِیَۃً } کی تفسیر میں فرماتے ہیں کہ وہ زانیہ یا مشرکہ سے زنا کرتا ہے۔ [مصنف ابن ابي شيبه/كتاب النكاح/حدیث: 17779]