حضرت ضحاک رحمہ اللہ فرماتے ہیں کہ بہتر ہے کہ جب میں اپنی ماں کے پاس جاؤں تو کہوں: اپنے بال ڈھانپ لو۔ [مصنف ابن ابي شيبه/كتاب النكاح/حدیث: 18180]

حضرت عکرمہ رحمہ اللہ فرماتے ہیں کہ آدمی کی جلد کا اپنی بہن یا ماں کی جلد کو چھونا زنا کا ایک حصہ ہے۔ (یہاں باب میں لفظ یباشر سے مراد جلد کا جلد کو چھونا ہے، مباشرت مروجہ مراد نہیں۔ نیز پاؤں اور ہتھیلیوں وغیرہ کو چھونا بھی مراد نہیں) [مصنف ابن ابي شيبه/كتاب النكاح/حدیث: 18181]

حضرت محمد بن علی رحمہ اللہ فرماتے ہیں کہ حضرت حسن اور حضرت حسین رضی اللہ عنہما امہات المومنین رضی اللہ عنہن کو نہیں دیکھا کرتے تھے۔ [مصنف ابن ابي شيبه/كتاب النكاح/حدیث: 18182]

اور حضرت عبد اللہ بن عباس رضی اللہ عنہما ان دونوں کے لئے امہات المؤمنین کو دیکھنا جائز سمجھتے تھے۔ [مصنف ابن ابي شيبه/كتاب النكاح/حدیث: 18183]

ایوب رحمہ اللہ فرماتے ہیں کہ میں نے حضرت سعید بن جبیر رحمہ اللہ سے سوال کیا کہ کیا آدمی اپنی ساس کے سر کو دیکھ سکتا ہے تو انہوں نے جواب میں یہ آیت پڑھی: وہ اپنی زینت ظاہر نہ کریں سوائے اپنے شوہروں کے، اپنے باپوں کے، اپنے سسروں کے، اپنے بیٹوں کے، اپنے خاوند کے بیٹوں کے، اپنے بھائیوں کے، اپنے بھائیوں کے بیٹوں کے، یا اپنی بہنوں کے بیٹوں کے۔ پھر فرمایا کہ میں اسے ان میں شمار کرتا ہوں۔ [مصنف ابن ابي شيبه/كتاب النكاح/حدیث: 18184]

حضرت شعبی اور حضرت عکرمہ رحمہما اللہ قرآن مجید کی آیت { وَلاَ یُبْدِینَ زِینَتَہُنَّ إلاَّ لِبُعُولَتِہِنَّ، أَوْ آبَائِہِنَّ، أَوْ آبَائِ بُعُولَتِہِنَّ } (الی آخر الآیۃ) کی تفسیر میں فرماتے ہیں کہ اس میں چچا اور ماموں کا تذکرہ نہیں ہے، اس لئے کہ یہ دونوں اپنے بیٹوں کے سامنے اس کا حلیہ بیان کرسکتے ہیں، اور فرمایا کہ عورت چچا اور ماموں کے سامنے اپنا دوپٹہ نہ اتارے۔ [مصنف ابن ابي شيبه/كتاب النكاح/حدیث: 18185]

حضرت نافع رحمہ اللہ فرماتے ہیں کہ حضرت ابن عمر رضی اللہ عنہما سے سوال کیا گیا کہ کیا کوئی عورت اپنی باندی کو اپنے خاوند کے لئے حلال قرار دے سکتی ہے؟ انہوں نے فرمایا کہ مجھے نہیں معلوم، لیکن اگر حضرت عمر رضی اللہ عنہ کا زمانہ ہوتاتو وہ اسے سنگسار کرنے کا حکم دیتے، تیرے لئے صرف وہی باندی حلال ہے جسے تو اپنے مرضی سے بیچ سکے اور اپنی مرضی سے آزاد کرسکے، اگر چاہے تو اسے ہبہ کرسکے اور اگر چاہے تو جس سے چاہے اس کا نکاح کراسکے۔ [مصنف ابن ابي شيبه/كتاب النكاح/حدیث: 18186]

حضرت ابن عمر رضی اللہ عنہما فرماتے ہیں کہ فرج کی حلت مکمل ملکیت یا نکاح سے ثابت ہوتی ہے، کہ اگر چاہے تو طلاق دے دے، اگر چاہے تو آزاد کردے اور اگر چاہے تو ہبہ کردے۔ [مصنف ابن ابي شيبه/كتاب النكاح/حدیث: 18187]

حضرت مغیرہ رحمہ اللہ کہتے ہیں کہ میں نے ابراہیم رحمہ اللہ سے سوال کیا کہ اگر کوئی عورت اپنی باندی اپنے بیٹے کے لئے حلال کردے تو کیا وہ اس کے لئے حلال ہے؟ انہوں نے فرمایا کہ وہ اس کے لئے صرف نکاح، ہبہ یا خریدنے سے حلال ہوتی ہے۔ [مصنف ابن ابي شيبه/كتاب النكاح/حدیث: 18188]

حضرت حسن رحمہ اللہ فرماتے ہیں کہ فرج عاریۃً نہیں لیا جاتا اگر مالک کی اجازت سے کسی نے جماع کیا تو وہ اسی کی ہوگئی۔ [مصنف ابن ابي شيبه/كتاب النكاح/حدیث: 18189]