حضرت حسن رحمہ اللہ فرماتے ہیں کہ اگر کوئی شخص مرض الموت میں ورثاء کو نقصان پہنچانے کے لئے شادی کرے تو یہ درست نہیں اور اگر خدمت کے لئے شادی کرے تو جائز ہے۔ [مصنف ابن ابي شيبه/كتاب النكاح/حدیث: 18330]

حضرت حماد رحمہ اللہ فرماتے ہیں کہ جو شخص مرض الموت میں شادی کرے تو (اس کا مہر) اس کے تہائی مال میں سے ہوگا۔ [مصنف ابن ابي شيبه/كتاب النكاح/حدیث: 18331]

حضرت ابن جریج رحمہ اللہ کہتے ہیں کہ میں نے حضرت عطاء رحمہ اللہ سے مریض کے شادی کرنے کے بارے میں سوال کیا تو انہوں نے فرمایا کہ یہ میرے نزدیک تو ایک نئی چیز ہے۔ [مصنف ابن ابي شيبه/كتاب النكاح/حدیث: 18332]

حضرت زہری فرماتے ہیں کہ مرض الموت میں شادی کرنا درست نہیں ہے۔ [مصنف ابن ابي شيبه/كتاب النكاح/حدیث: 18333]

حضرت خلیفہ بن غالب رحمہ اللہ کہتے ہیں کہ میں نے حضرت نافع رحمہ اللہ سے مرض الموت میں شادی کے بارے میں سوال کیا تو انہوں نے فرمایا کہ یہ جائز ہے۔ وہ وارث بھی ہوگی اور مہر بھی لے گی۔ [مصنف ابن ابي شيبه/كتاب النكاح/حدیث: 18334]

حضرت نافع رحمہ اللہ فرماتے ہیں کہ ابن ابی ربیعہ رحمہ اللہ نے حالت مرض الموت میں ایک عورت سے شادی کی، وہ اسے اپنا وارث بنانا چاہتے تھے۔ ان کے اور اس عورت کے درمیان ایک رشتہ تھا۔ [مصنف ابن ابي شيبه/كتاب النكاح/حدیث: 18335]

حضرت مسروق رحمہ اللہ فرماتے ہیں کہ جب کوئی عورت مشرکین کے پاس چلی جاتی تو اس کے خاوند کو اس کے مہر کے برابر ادا کیا جاتا، اور جب کوئی عورت مشرکین کی کسی ایسی قوم کے پاس چلی جائے جن کے ساتھ کوئی عہد نہ ہو، پھر تمہاری باری آئے اور تمہیں مال غنیمت ہاتھ لگے تو { فَآتُوا الَّذِینَ ذَھَبَتْ أَزْوَاجُھُمْ مِثْلَ مَا أَنْفَقُوا } یعنی اس کے خاوند کو غنیمت میں سے اس کے مہر کے برابر ادا کرو۔ [مصنف ابن ابي شيبه/كتاب النكاح/حدیث: 18336]

ایک اور سند سے یونہی منقول ہے۔ [مصنف ابن ابي شيبه/كتاب النكاح/حدیث: 18337]

حضرت عروہ بن زبیر رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ اپنے نطفوں (یعنی ہونے والی اولاد) کے لئے اچھے رشتے کا انتخاب کرو۔ [مصنف ابن ابي شيبه/كتاب النكاح/حدیث: 18338]

ابراہیم رحمہ اللہ فرماتے ہیں کہ حضرت علقمہ رحمہ اللہ جب شادی کرتے تو اپنے سے کم تر گھرانے میں شادی کرتے۔ [مصنف ابن ابي شيبه/كتاب النكاح/حدیث: 18339]