حضرت عمر رضی اللہ عنہ فرماتے ہیں کہ نفساء چالیس دن تک (نفاس کی حالت میں) رکی رہے گی۔ [مصنف ابن ابي شيبه/كتاب النكاح/حدیث: 18360]

حسن رحمہ اللہ فرماتے ہیں کہ نفساء چالیس دن رکے گی، پھر غسل کرکے نماز پڑھے گی۔ [مصنف ابن ابي شيبه/كتاب النكاح/حدیث: 18361]

حضرت شعبی رحمہ اللہ فرماتے ہیں کہ دو مہینے رکے گی پھر وہ مستحاضہ کی طرح ہے۔ [مصنف ابن ابي شيبه/كتاب النكاح/حدیث: 18362]

حسن رحمہ اللہ فرماتے ہیں کہ نفساء چالیس دن سے زیادہ نہیں رکے گی۔ [مصنف ابن ابي شيبه/كتاب النكاح/حدیث: 18363]

حضرت عطاء رحمہ اللہ فرماتے ہیں کہ وہ اپنی عادت کے بقدر رکے گی اور چالیس دن سے زیادہ نہیں رکے گی۔ [مصنف ابن ابي شيبه/كتاب النكاح/حدیث: 18364]

حضرت ابن عباس رضی اللہ عنہما فرماتے ہیں کہ نفاس والی عورت تقریباً چالیس دن تک رکے گی۔ [مصنف ابن ابي شيبه/كتاب النكاح/حدیث: 18365]

حضرت ام سلمہ رضی اللہ عنہا فرماتی ہیں کہ رسول اللہ صلی اللہ علیہ وسلم کے زمانے میں نفساء چالیس دن تک رکا کرتی تھیں اور ہم اپنے چہروں پر مٹیالی سرخی کی وجہ سے ورس نامی زرد بوٹی لگایا کرتی تھیں۔ [مصنف ابن ابي شيبه/كتاب النكاح/حدیث: 18366]

حضرت عبید اللہ بن ابی یزید رحمہ اللہ نے حضرت عبد اللہ بن عباس رضی اللہ عنہما سے سوال کیا کہ اگر کوئی آدمی باندی خریدے اور وہ حاملہ ہو تو کیا اس سے جماع کرسکتا ہے؟ انہوں نے فرمایا نہیں۔ پھر قرآن مجید کی آیت پڑھی: حمل والی عورتوں کی عدت یہ ہے کہ وہ بچے کو جنم دے دیں۔ [مصنف ابن ابي شيبه/كتاب النكاح/حدیث: 18367]

حضرت داود رحمہ اللہ کہتے ہیں کہ میں نے حضرت شعبی رحمہ اللہ سے کہا کہ حضرت ابو موسیٰ رضی اللہ عنہ نے تستر کی فتح کے دن فرمایا تھا کہ کسی حاملہ عورت سے جماع نہ کیا جائے اور مشرکین کی اولاد میں شراکت نہ کی جائے، کیونکہ پانی بچے میں اضافہ کرتا ہے۔ انہوں نے یہ بات اپنی رائے سے کہی تھی یا رسول اللہ صلی اللہ علیہ وسلم سے روایت کی تھی۔ انہوں نے فرمایا کہ رسول اللہ صلی اللہ علیہ وسلم نے اوطاس کے دن فرمایا تھا کہ کسی حاملہ سے بچے کی پیدائش سے پہلے جماع نہ کیا جائے اور دوسری خواتین سے اس وقت تک نہ کیا جائے جب تک ان کے رحم کا خالی ہونا معلوم نہ ہوجائے۔ [مصنف ابن ابي شيبه/كتاب النكاح/حدیث: 18368]

حضرت ابوقلابہ رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جس نے کسی حاملہ سے وطی کی وہ ہم میں سے نہیں ہے۔ [مصنف ابن ابي شيبه/كتاب النكاح/حدیث: 18369]