حضرت عبد اللہ بن خراش رحمہ اللہ فرماتے ہیں کہ میں نے مقام ربذہ میں حضرت ابو ذر غفاری رضی اللہ عنہ کو دیکھا، ان کی اہلیہ کا رنگ کالا تھا، یا فرمایا کہ وہ بھوک اور کمزوری کی وجہ سے بےحال تھیں، اپنے ایک کالے رنگ کے چھپڑ میں تھے، ان سے کہا گیا کہ اے ابوذر! اگر آپ اس سے بہتر عورت سے شادی کرلیتے تو اچھا ہوتا! انہوں نے فرمایا کہ اللہ کی قسم! میں ایسی عورت سے شادی کروں جو میرے نام وشہرت میں کمی کا سبب بنے مجھے اس بات سے زیادہ پسند ہے کہ میں ایسی عورت سے شادی کروں جو میرے نام ونمود میں زیادتی کا سبب بنے۔ [مصنف ابن ابي شيبه/كتاب النكاح/حدیث: 18340]

حضرت عمر بن خطاب رضی اللہ عنہ فرماتے ہیں کہ مجھ میں جاہلیت کی کوئی عادت باقی نہیں رہی سوائے اس کے کہ مجھے اس بات کی پرواہ نہیں ہوتی کہ میں کس مسلمان سے شادی کررہاہوں اور کس سے شادی کر ارہا ہوں۔ [مصنف ابن ابي شيبه/كتاب النكاح/حدیث: 18341]

حضرت ابراہیم رحمہ اللہ فرماتے ہیں کہ حضرت علقمہ رحمہ اللہ اپنے سے کم تر لوگوں کو نکاح کا پیغام بھجواتے تھے۔ [مصنف ابن ابي شيبه/كتاب النكاح/حدیث: 18342]

حضرت محمد بن سیرین رحمہ اللہ فرماتے ہیں کہ ایک آدمی نے ایک غلام درزی کی بیٹی سے شادی کی۔ اس کے ہاں ایک لڑکاپیدا ہوا لیکن اس آدمی نے اسے اپنا بچہ ماننے سے انکار کردیا۔ حضرت شریح رحمہ اللہ نے اس سے فرمایا کہ جس چیز نے تجھے ایک غلام درزی کی بیٹی سے شادی پر مجبور کیا حالانکہ تو عرب کا ایک معزز آدمی ہے اسی چیز نے تجھے اس سے ہونے والے بچے کو اپنا بیٹا ماننے سے انکار کرنے پر ابھارا ہے۔ (یعنی شیطان نے تیرے دل میں وسوسے ڈالے ہیں) [مصنف ابن ابي شيبه/كتاب النكاح/حدیث: 18343]

اسماعیل رحمہ اللہ کہتے ہیں کہ میں نے حضرت عطاء رحمہ اللہ سے سوال کیا کہ اگر کوئی مالکن اپنے غلام سے یہ کہے کہ میں تجھے اس شرط پر آزاد کرتی ہوں کہ تو مجھ سے شادی کرلے تو کیا حکم ہے؟ انہوں نے فرمایا کہ بہتر تھا کہ وہ اسے آزاد کردیتی۔ [مصنف ابن ابي شيبه/كتاب النكاح/حدیث: 18344]

اسماعیل رحمہ اللہ کہتے ہیں کہ میں نے حضرت عبد اللہ بن عبید بن عمیر رحمہ اللہ سے بھی یہی سوال کیا تو انہوں نے حضرت عطاء رحمہ اللہ کے مثل بات فرمائی۔ [مصنف ابن ابي شيبه/كتاب النكاح/حدیث: 18345]

اسماعیل رحمہ اللہ کہتے ہیں کہ پھر میں نے حضرت مجاہد رحمہ اللہ سے سوال کیا تو وہ غضبناک ہوئے اور فرمایا کہ اس پر اللہ کی طرف سے بھی سزا ہے اور بادشاہ کی طرف سے بھی۔ [مصنف ابن ابي شيبه/كتاب النكاح/حدیث: 18346]

حضرت عطاء رحمہ اللہ اور حضرت عبد اللہ بن عبید بن عمیر رحمہ اللہ فرماتے ہیں کہ وہ اسے آزاد کردے لیکن شرط نہ لگائے۔ [مصنف ابن ابي شيبه/كتاب النكاح/حدیث: 18347]

اور حضرت مجاہد رحمہ اللہ فرماتے ہیں کہ اس پر اللہ کی طرف سے بھی سزا ہے اور بادشاہ کی طرف سے بھی۔ [مصنف ابن ابي شيبه/كتاب النكاح/حدیث: 18348]

حضرت عطاء رحمہ اللہ قرآن مجید کی آیت { وَأُحْضِرَتِ الْأَنْفُسُ الشُّحَّ } کی تفسیر میں فرماتے ہیں کہ اس سے مراد نفقہ ہے۔ [مصنف ابن ابي شيبه/كتاب النكاح/حدیث: 18349]