(حضرت عبد العزیز بن رفیع کہتے ہیں کہ) پھر میں حضرت سعید بن مسیب کے پاس آیا تو انہوں نے بھی محمد بن حنفیہ والی بات کہی۔ [مصنف ابن ابي شيبه/كتاب النكاح/حدیث: 17040]

(حضرت عبد العزیز بن رفیع کہتے ہیں کہ) پھر میں نے حضرت ابن منبہ سے سوال کیا تو انہوں نے فرمایا کہ میں گواہی دیتا ہوں کہ اللہ تعالیٰ نے حضرت موسیٰ علیہ السلام پر جو کچھ نازل فرمایا اس میں ہے کہ دو بہنوں کو جمع کرنے والا ملعون ہے۔ انہوں نے فرمایا کہ اس میں ہمارے لئے یہ تفصیل نہیں تھی کہ دونوں آزاد ہوں یا باندیاں۔ [مصنف ابن ابي شيبه/كتاب النكاح/حدیث: 17041]

(حضرت عبد العزیز بن رفیع کہتے ہیں کہ) پھر میں نے واپس جاکر ابن منبہ کی بات حضرت سعید بن مسیب کو بتائی تو انہوں نے فرمایا: اللہ اکبر۔ [مصنف ابن ابي شيبه/كتاب النكاح/حدیث: 17042]

حضرت عائشہ رضی اللہ عنہا نے اس عمل کو مکروہ قراردیا ہے۔ [مصنف ابن ابي شيبه/كتاب النكاح/حدیث: 17043]

حسن سے سوال کیا گیا کہ اگر کسی شخص کی ملکیت میں دو بہنیں ہوں، ایک سے جماع کیا ہو پھر اس سے رک گیا ہو تو کیا دوسری سے جماع کرسکتا ہے؟ وہ اس بات کو پسند کرتے تھے کہ جب تک صحبت شدہ کو اپنی ملکیت سے نہ نکال دے اس وقت تک دوسری سے جماع نہ کرے۔ [مصنف ابن ابي شيبه/كتاب النكاح/حدیث: 17044]

حضرت حکم اور حضرت حماد فرماتے ہیں کہ اگر کسی آدمی کی ملکیت میں دو بہنیں ہوں تو دونوں میں سے کسی ایک کے قریب بھی نہ جائے۔ [مصنف ابن ابي شيبه/كتاب النكاح/حدیث: 17045]

حضرت شعبی اور حضرت ابن سیرین فرماتے ہیں کہ سوائے تعداد کے باندیوں اور آزاد عورتوں سے صحبت کے احکامات ایک جیسے ہیں۔ [مصنف ابن ابي شيبه/كتاب النكاح/حدیث: 17046]

حضرت عثمان رضی اللہ عنہ سے سوال کیا گیا کہ اگر کسی شخص کی ملکیت میں دو بہنیں ہوں، ایک سے جماع کیا ہو تو کیا دوسری سے جماع کرسکتا ہے؟ انہوں نے فرمایا کہ ایک آیت نے انہیں حلال اور دوسری نے حرام قرار دیا ہے۔ البتہ میں نہ اس کا حکم دیتا ہوں اور نہ اس سے منع کرتا ہوں۔ پھر وہ سوال کرنے والا دروازہ پر حضرت علی رضی اللہ عنہ سے ملا اور ان سے اسی بارے میں سوال کیا تو انہوں نے فرمایا کہ میں تمہیں اس سے منع کرتا ہوں اور اگر مجھے تم پر قدرت ہوئی اور تم نے ایسا کیا تو میں تمہیں سزا دوں گا۔ [مصنف ابن ابي شيبه/كتاب النكاح/حدیث: 17047]

حضرت قاسم بن محمد فرماتے ہیں کہ عرب کے ایک قبیلے نے حضرت معاویہ رضی اللہ عنہ سے سوال کیا کہ کیا آدمی دومملوک بہنوں سے جماع کرسکتا ہے؟ انہوں نے اس کے جواز کا فتوی دیا۔ یہ بات حضرت نعمان بن بشیر کو پہنچی، انہوں نے حضرت معاویہ رضی اللہ عنہ سے اس بارے میں پوچھاتو انہوں نے اس فتویٰ کا اقرار کیا۔ اس پر حضرت نعمان بن بشیرنے فرمایا کہ آپ یہ بتائیں کہ اگر کسی شخص کی ملکیت میں اس کی اپنی بہن باندی کے طور پر ہو تو کیا اس کے لئے اس سے وطی کرنا جائز ہے؟ یہ سن کر حضرت معاویہ رضی اللہ عنہ نے فرمایا کہ اللہ کی قسم! تم نے میری آنکھیں کھول دیں۔ تم ان لوگوں کے پاس جاؤ اور انہیں ایسا کرنے سے منع کرو۔ ان کے لئے ایسا کرنا مناسب نہیں ہے۔ حضرت قاسم بن محمد کہتے ہیں کہ میں نے کہا کہ یہ آزادی وغیرہ کا رحمی رشتہ ہے۔ [مصنف ابن ابي شيبه/كتاب النكاح/حدیث: 17048]

حضرت قتادہ سے سوال کیا گیا کہ اگر آدمی نے منکوحہ کو دخول سے پہلے طلاق دے دی تو کیا اس کی ماں سے نکاح کرسکتا ہے؟ انہوں نے فرمایا کہ حضرت علی رضی اللہ عنہ فرماتے تھے کہ یہ ربیبہ کے درجہ میں ہے۔ [مصنف ابن ابي شيبه/كتاب النكاح/حدیث: 17049]