ایک اور سند سے یونہی منقول ہے۔ [مصنف ابن ابي شيبه/كتاب النكاح/حدیث: 17050]

حضرت زید بن ثابت عورت کو قبل ازدخول طلاق دینے کی صورت میں عورت کی ماں سے نکاح کو بالکل جائز سمجھتے تھے۔ اور قبل از دخول عورت کے انتقال کی صورت میں اسے مکروہ بتاتے تھے۔ [مصنف ابن ابي شيبه/كتاب النكاح/حدیث: 17051]

بنو بکر بن کنانہ کے حضرت مسلم بن عویمر فرماتے ہیں کہ میرے والد نے طائف میں ایک عورت سے میری شادی کی۔ ابھی میں نے اس سے جماع نہ کیا تھا کہ میرے چچا کا انتقال ہوگیا جو اس کی ماں کے خاوند تھے۔ اس کی ماں ایک مالدار عورت تھیں۔ میرے والد نے مجھ سے کہا کہ اگر تم اس کی ماں سے شادی کرلو تو بہت رہے۔ میں نے کہا کہ وہ تو ٹھیک ہے لیکن میں نے اس کی بیٹی سے نکاح کرلیا ہے۔ پھر اس بارے میں نے حضرت ابن عباس رضی اللہ عنہما سے سوال کیا تو انہوں نے فرمایا کہ تم اس سے نکاح کرلو۔ [مصنف ابن ابي شيبه/كتاب النكاح/حدیث: 17052]

اور میں نے حضرت ابن عمر رضی اللہ عنہما سے سوال کیا تو انہوں نے فرمایا کہ اس سے نکاح نہ کرو۔ [مصنف ابن ابي شيبه/كتاب النكاح/حدیث: 17053]

انہوں نے فرمایا کہ پھر میرے والد عویمر نے اس بارے میں حضرت معاویہ رضی اللہ عنہ کو خط لکھا اور اس میں حضرت ابن عباس رضی اللہ عنہما اور حضرت ابن عمر رضی اللہ عنہما کی رائے درج کی۔ حضرت معاویہ رضی اللہ عنہ نے انہیں جواب میں لکھا کہ جو چیز اللہ نے حرام کی ہے میں اسے حلال نہیں کرتا اور جو حلال کی ہے میں اسے حرام نہیں کرتا۔ یہ تمہاری مرضی ہے، اور عورتیں بہت ہیں۔ انہوں نے فرمایا کہ پھر انہوں نے نہ مجھے اس سے منع کیا اور نہ اجازت دی۔ پھر میرے والد نے اس خیال کو چھوڑ دیا اور یہ نکاح نہ ہوا۔ [مصنف ابن ابي شيبه/كتاب النكاح/حدیث: 17054]

حضرت ابو عمرو شیبانی فرماتے ہیں کہ ایک مرتبہ حضرت عبد اللہ بن مسعود رضی اللہ عنہ نے فتویٰ دیا کہ اگر کسی آدمی نے دخول سے پہلے اپنی بیوی کو طلاق دی یامر گیا تو وہ اس عورت کی ماں سے شادی کرسکتا ہے۔ پھر جب وہ مدینہ آئے تو انہوں نے اپنے فتویٰ سے رجوع کرلیا اور لوگوں کو ایسا کرنے سے منع کیا۔ حالانکہ عورتوں کی شادی کے بعد بچے بھی ہوچکے تھے۔ [مصنف ابن ابي شيبه/كتاب النكاح/حدیث: 17055]

حضرت مسروق قرآن مجید کی آیت { أُمَّہَاتِ نِسَائِکُمْ } کے بارے میں فرماتے ہیں کہ جس چیز کو اللہ نے مبہم رکھا ہے اسے مبہم رہنے دو اور جسے وضاحت سے بیان کیا ہے اس کی اتباع کرو۔ [مصنف ابن ابي شيبه/كتاب النكاح/حدیث: 17056]

حضرت مجاہد قرآن مجید کی آیت { وَأُمَّہَاتُ نِسَائِکُمْ وَرَبَائِبُکُمَ اللاَّتِی فِی حُجُورِکُمْ } کے بارے میں فرماتے ہیں کہ یہاں ان دونوں میں دخول مراد ہے۔ [مصنف ابن ابي شيبه/كتاب النكاح/حدیث: 17057]

حضرت ابن جریج فرماتے ہیں کہ میں نے حضرت عطاء سے سوال کیا کہ اگر کسی آدمی نے عورت سے شادی کی، پھر اسے دیکھے اور جماع کئے بغیر اسے طلاق دے دی تو کیا وہ اس کی ماں سے شادی کرسکتا ہے؟ انہوں نے فرمایا نہیں، (ماں کی حرمت) مطلق ہے۔ [مصنف ابن ابي شيبه/كتاب النكاح/حدیث: 17058]

حضرت مکحول اس بات کو مکروہ خیال فرماتے تھے کہ آدمی کسی عورت سے نکاح کرنے کے بعد اس کی ماں سے شادی کرے۔ [مصنف ابن ابي شيبه/كتاب النكاح/حدیث: 17059]