حضرت حماد کے نزدیک نہاریات سے نکاح کرنا مکروہ ہے۔ [مصنف ابن ابي شيبه/كتاب النكاح/حدیث: 17380]

حضرت حکم اور حضرت حماد سے سوال کیا گیا کہ ایک آدمی نکاح میں یہ شرط لگائے کہ وہ دن یا رات میں سے عورت کے لئے جو حصہ مقرر کرے گا عورت اس پر راضی رہے گی تو کیا حکم ہے؟ انہوں نے فرمایا کہ یہ شرط فاسد ہے۔ [مصنف ابن ابي شيبه/كتاب النكاح/حدیث: 17381]

حضرت زہری اس شخص کے بارے میں جو نکاح میں یہ شرط لگائے کہ وہ اتنے اتنے (عرصے) اس کے پاس نہیں آئے گا اور اس پر صرف معلوم مقدار ہی خرچ کرے گا، فرماتے ہیں کہ وہ صلح جس کا قرآن میں حکم ہے وہ تو ایک مرتبہ کے جماع کے بعد ہے۔ اور وہ ایسا کرنے کو مکروہ سمجھتے تھے۔ [مصنف ابن ابي شيبه/كتاب النكاح/حدیث: 17382]

یونس سے نکاح میں لگائی جانے والی شرط کے بارے میں سوال کیا گیا تو انہوں نے فرمایا کہ حسن تو اس میں کوئی حرج نہیں سمجھتے تھے اگر وہ علانیہ ہو۔ [مصنف ابن ابي شيبه/كتاب النكاح/حدیث: 17383]

اور حضرت ابن سیرین ابتداء میں (یہ شرط لگانے کو) مکروہ خیال کرتے تھے اور اگر بعد میں لگائی جائے تو اس میں کوئی حرج نہیں سمجھتے تھے۔ [مصنف ابن ابي شيبه/كتاب النكاح/حدیث: 17384]

حضرت جابر کہتے ہیں کہ میں نے حضرت عامر سے اس شخص کے بارے میں سوال کیا جس کی ایک بیوی ہو، پھر وہ دوسری عورت سے نکاح کرے اور یہ شرط لگائے کہ ایک کے لئے ایک دن اور دوسری کے لئے دو دن ہوں گے توا نہوں نے فرمایا کہ اس میں کوئی حرج نہیں۔ [مصنف ابن ابي شيبه/كتاب النكاح/حدیث: 17385]

حضرت ابن عباس رضی اللہ عنہما سے سوال کیا گیا کہ اگر نکاح کو اس شرط کے ساتھ مشروط کیا جائے کہ اگر فلاں دن تک خاوند نے مہر دے دیا تو ٹھیک وگرنہ نکاح نہیں ہوگا۔ آپ نے فرمایا کہ اس میں کوئی حرج نہیں۔ [مصنف ابن ابي شيبه/كتاب النكاح/حدیث: 17386]

حضرت زہری فرماتے ہیں کہ ایسا کرنا جائز ہے۔ گویا انہوں نے اسے خلع قرار دیا۔ [مصنف ابن ابي شيبه/كتاب النكاح/حدیث: 17387]

حسن فرمایا کرتے تھے کہ نکاح جائز ہے اور شرط باطل ہے۔ [مصنف ابن ابي شيبه/كتاب النكاح/حدیث: 17388]

حضرت ابراہیم فرماتے ہیں کہ نکاح میں طلاق کے علاوہ لگائی جانے والی ہر شرط کو نکاح ختم کردیتا ہے۔ [مصنف ابن ابي شيبه/كتاب النكاح/حدیث: 17389]