اور حضرت زہری رحمہ اللہ نے فرمایا کہ کیوں نہیں، (یہ شرط معتبر ہے)۔ [مصنف ابن ابي شيبه/كتاب الطلاق/حدیث: 20374]

اور حضرت سفیان رحمہ اللہ نے فرمایا کہ میری رائے وہی ہے جو حضرت زہری رحمہ اللہ کی ہے۔ [مصنف ابن ابي شيبه/كتاب الطلاق/حدیث: 20375]

حضرت مسروق رحمہ اللہ فرماتے ہیں کہ اگر ایک آدمی نے اپنی بیوی سے کہا کہ اگر تو چاہے تو تجھے طلاق ہے، اسے گویا آدمی نے اختیار دے دیا۔ [مصنف ابن ابي شيبه/كتاب الطلاق/حدیث: 20376]

حضرت شعبی رحمہ اللہ فرماتے ہیں کہ اگر ایک عورت نے کسی آدمی سے شادی کی اور پھر دو سال اس کے پاس رہی۔ پھر اس کا شوہر آیا اور اس عورت کو لے گیا۔ پھر دوسرے آدمی نے اس کو طلاق دے دی تو اس کی طلاق کا اعتبار نہیں ہے۔ [مصنف ابن ابي شيبه/كتاب الطلاق/حدیث: 20377]

حضرت عطاء رحمہ اللہ فرماتے ہیں کہ ہر نکاح فاسد کا کوئی اعتبار نہیں اور اس کی طلاق کی کوئی حیثیت نہیں۔ [مصنف ابن ابي شيبه/كتاب الطلاق/حدیث: 20378]

حضرت صالح بن مسلم رحمہ اللہ فرماتے ہیں کہ میں نے حضرت شعبی رحمہ اللہ سے سوال کیا کہ اگر میاں بیوی دو آدمیوں کو ثالث بنائیں اور پھر رجوع کرلیں تو کیا حکم ہے؟ انہوں نے فرمایا کہ یہ ان کے لئے اس وقت تک ہے جب تک وہ بات نہ کریں، جب وہ دونوں بات کرلیں تو وہ رجوع نہیں کرسکتے۔ [مصنف ابن ابي شيبه/كتاب الطلاق/حدیث: 20379]

ایوب رحمہ اللہ کہتے ہیں کہ میں نے حضرت سعید بن جبیر رحمہ اللہ سے پوچھا کہ لعان کا کیا طریقہ ہے؟ انہوں نے فرمایا کہ جو قرآن مجید میں ہے اسے لے لو: میں اللہ کی قسم کھا کر گواہی دیتا ہوں، میں اللہ کی قسم کھا کر گواہی دیتا ہوں۔ [مصنف ابن ابي شيبه/كتاب الطلاق/حدیث: 20380]

حضرت عمرو بن میمون رحمہ اللہ اپنے والد سے روایت کرتے ہیں کہ ام کلثوم رضی اللہ عنہا حضرت زبیر بن عوام رضی اللہ عنہ کے نکاح میں تھیں۔ وہ عورتوں پر سختی کرنے والے آدمی تھی۔ جس کی وجہ سے وہ انہیں ناپسند کرتی تھیں۔ انہوں نے حالت حمل میں حضرت زبیر رضی اللہ عنہ سے طلاق کا مطالبہ کیا لیکن انہوں نے انکار کردیا۔ جب انہیں درد زہ ہونے لگا تو انہوں نے ایک طلاق کا پرزور مطالبہ کیا۔ حضرت زبیر رضی اللہ عنہ وضو کررہے تھے انہوں نے ایک طلاق دے دی۔ جب وہ باہر آئے تو انہیں کسی نے بتایا کہ حضرت ام کلثوم رضی اللہ عنہا نے بچے کو جنم دے دیا ہے۔ حضرت زبیر رضی اللہ عنہ نے کہا اس نے مجھے دھوکہ دیا، اللہ اسے اس کے دھوکے کا بدلہ دے! پھر وہ رسول اللہ صلی اللہ علیہ وسلم کے پا س حاضر ہوئے اور ان سے قصہ عرض کیا تو آپ نے فرمایا کہ اللہ کی کتاب غالب آگئی، تم انہیں نکاح کا پیام بھیج سکتے ہو۔ حضرت زبیر رضی اللہ عنہ نے فرمایا کہ اب وہ کبھی میرے نکاح میں واپس نہیں آئیں گی۔ [مصنف ابن ابي شيبه/كتاب الطلاق/حدیث: 20381]

حضرت عطاء رحمہ اللہ فرماتے ہیں کہ غلام اگر طلاق دے تو اس پر متعہ لازم نہیں۔ [مصنف ابن ابي شيبه/كتاب الطلاق/حدیث: 20382]

حضرت عامر رحمہ اللہ فرماتے ہیں کہ اگر کوئی شخص خواب میں طلاق دے یا آزاد کردے تو اس کی کوئی حیثیت نہیں۔ [مصنف ابن ابي شيبه/كتاب الطلاق/حدیث: 20383]