حضرت عامر رحمہ اللہ فرماتے ہیں کہ اگر کوئی شخص خواب میں طلاق دے یا آزاد کردے تو اس کی کوئی حیثیت نہیں۔ [مصنف ابن ابي شيبه/كتاب الطلاق/حدیث: 20384]

حضرت علی رضی اللہ عنہ فرماتے ہیں کہ سویا ہوا انسان جاگنے تک مرفوع القلم ہے۔ [مصنف ابن ابي شيبه/كتاب الطلاق/حدیث: 20385]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا کہ تین لوگوں سے قلم اٹھالیا گیا ہے ایک سویا ہوا جب تک وہ جاگ نہ جائے۔ [مصنف ابن ابي شيبه/كتاب الطلاق/حدیث: 20386]

حضرت عامر رحمہ اللہ سے سوال کیا گیا کہ اگر کسی آدمی کی چار بیویاں ہوں اور ان میں سے ایک دار الحرب چلی جائے تو کیا حکم ہے؟ انہوں نے فرمایا کہ اس کو طلاق دے کر شادی کرے۔ [مصنف ابن ابي شيبه/كتاب الطلاق/حدیث: 20387]

حضرت حسن رحمہ اللہ سے سوال کیا گیا کہ اگر ایک آدمی نے اپنی بیوی سے کہا کہ اگر تو فلاں شخص کے گھر میں داخل ہوئی تو تجھے طلاق ہے اس کے بعدوہ گھرگر گیا توکیاحکم ہے؟ انہوں نے فرمایا کہ اگر گھر گرادیا گیا تو طلاق نہیں ہوگی۔ حضرت ابو ہاشم رحمہ اللہ فرماتے ہیں کہ اگر گھر اس آدمی کی ملکیت میں تھا اور گرادیا گیا، یا وہ راستہ بن گیا اور وہ عورت اس میں داخل ہوئی توا سے طلاق ہوجائے گی۔ [مصنف ابن ابي شيبه/كتاب الطلاق/حدیث: 20388]

راوی کہتے ہیں کہ حضرت ابو ہاشم رحمہ اللہ نے فرمایا کہ اگر گھر اس آدمی کی ملکیت میں تھا اور گرادیا گیا، یا وہ راستہ تھا اور وہ عورت اس میں داخل ہوئی تو اسے طلاق ہوگئی۔ [مصنف ابن ابي شيبه/كتاب الطلاق/حدیث: 20389]

حضرت عامر رحمہ اللہ نے گواہی دی کہ رسول اللہ صلی اللہ علیہ وسلم نے طلاق دی تھی۔ [مصنف ابن ابي شيبه/كتاب الطلاق/حدیث: 20390]

حضرت ابو جعفر رحمہ اللہ فرماتے ہیں کہ رسول اللہ صلی اللہ علیہ وسلم نے دو عورتوں کو طلا ق دی، جن میں سے ایک بنو عامر سے تھی۔ [مصنف ابن ابي شيبه/كتاب الطلاق/حدیث: 20391]

حضرت مجاہد رحمہ اللہ فرماتے ہیں کہ رسول اللہ صلی اللہ علیہ وسلم نے طلاق نہیں دی تھی۔ آپ نے محض عزلت اختیار فرمائی تھی۔ [مصنف ابن ابي شيبه/كتاب الطلاق/حدیث: 20392]

حضرت عروہ رحمہ اللہ فرماتے ہیں کہ حضرت عمر رضی اللہ عنہ نے بنو مخزوم کی ایک بانجھ عورت سے شادی کی پھر اسے طلاق دے دی۔ پھر آپ رضی اللہ عنہ نے فرمایا کہ میں عورتوں سے لذت کے حصول کے لئے ہم بستری نہیں کرتا اگر اولاد نہ ہوتی تو میں عورتوں کے پاس نہ پھٹکتا۔ [مصنف ابن ابي شيبه/كتاب الطلاق/حدیث: 20393]