حضرت ابن عمر رضی اللہ عنہما فرماتے ہیں کہ حضرت رُبَیّع رضی اللہ عنہ نے اپنے خاوند سے خلع لے لی، ان کے چچا حضرت عثمان رضی اللہ عنہ کے پاس آئے تو حضرت عثمان رضی اللہ عنہ نے فرمایا کہ وہ ایک حیض عدت گزارے گی، حضرت ابن عمر رضی اللہ عنہما اس سے پہلے خلع یافتہ کی عدت تین حیض ہونے کے قائل تھے لیکن حضرت عثمان رضی اللہ عنہ کے اس حکم کے بعد ایک حیض کے عدت ہونے کے قائل ہوگئے اور فرمایا کرتے تھے کہ وہ ہم سے بہتر اور ہم سے زیادہ جاننے والے تھے۔ [مصنف ابن ابي شيبه/كتاب الطلاق/حدیث: 19494]

حضرت ابن عمر رضی اللہ عنہما فرمایا کرتے تھے کہ وہ تین حیض عدت گزارے گی، یہاں تک کہ حضرت عثمان رضی اللہ عنہ نے یہ (ایک حیض والی) بات فرمائی، تو پھر وہ اسی کے مطابق فتویٰ دیتے تھے اور فرماتے تھے کہ وہ ہم میں سب سے بہتر اور سب سے زیادہ جاننے والے تھے۔ [مصنف ابن ابي شيبه/كتاب الطلاق/حدیث: 19495]

حضرت عکرمہ رحمہ اللہ فرماتے ہیں کہ خلع یافتہ عورت کی عدت ایک حیض ہے، اس کا فیصلہ رسول اللہ صلی اللہ علیہ وسلم نے جمیلہ بنت سلول رضی اللہ عنہا کے بارے میں فرمایا تھا۔ [مصنف ابن ابي شيبه/كتاب الطلاق/حدیث: 19496]

حضرت ابن عباس رضی اللہ عنہما فرماتے ہیں کہ خلع یافتہ عورت کی عدت ایک حیض ہے۔ [مصنف ابن ابي شيبه/كتاب الطلاق/حدیث: 19497]

حضرت سلیمان بن یسار رحمہ اللہ فرماتے ہیں کہ حضرت رُبَیّع رضی اللہ عنہ نے اپنے خاوند سے خلع لی اور پھر ایک حیض عدت گزارنے کا انہیں حکم دیا گیا۔ [مصنف ابن ابي شيبه/كتاب الطلاق/حدیث: 19498]

حضرت شعبی رحمہ اللہ فرماتے ہیں کہ عدت گزارنے والی عورت اپنے خاوند کے گھر میں عدت گزارے گی، کیونکہ اگر وہ چاہے تو رجوع کرلے۔ [مصنف ابن ابي شيبه/كتاب الطلاق/حدیث: 19499]

حضرت ابن عمر رضی اللہ عنہما فرماتے ہیں کہ حضرت ربیع رضی اللہ عنہ نے اپنے خاوند سے خلع لی تو (ربیع کے والد) حضرت معوذ رضی اللہ عنہ حضرت عثمان رضی اللہ عنہ کے پاس آئے اور ان سے سوال کیا کہ کیا وہ وہاں سے منتقل ہوسکتی ہیں؟ حضرت عثمان رضی اللہ عنہ نے فرمایا کہ ہاں وہ اس گھر سے منتقل ہوسکتی ہیں۔ [مصنف ابن ابي شيبه/كتاب الطلاق/حدیث: 19500]

حضرت خیثمہ رحمہ اللہ فرماتے ہیں کہ بشر بن مروان کے پاس میاں بیوی کے درمیان خلع کا ایک مسئلہ لایا گیا، بشر نے اس کی اجازت نہ دی، تو حضرت عبد اللہ بن شہاب خولانی رحمہ اللہ نے بشر سے کہا کہ میں حضرت عمر بن خطا ب رضی اللہ عنہ کے پاس حاضر تھا، ان کے پاس خلع کا ایک مسئلہ لایا گیا تو انہوں نے اس کی اجازت دے د ی تھی۔ [مصنف ابن ابي شيبه/كتاب الطلاق/حدیث: 19501]

حضرت شریح رحمہ اللہ نے سلطان کی مداخلت کے بغیر خلع کی اجازت دی ہے۔ [مصنف ابن ابي شيبه/كتاب الطلاق/حدیث: 19502]

حضرت نافع رحمہ اللہ فرماتے ہیں کہ حضرت ربیع بنت معوذ رضی اللہ عنہا کے چچا نے انہیں ان کے خاوند سے خلع لے کردی، ان کا خاوند شراب پیا کرتا تھا، یہ خلع انہوں نے امیر المومنین حضرت عثمان رضی اللہ عنہ کی مداخلت کے بغیر لی، لیکن حضرت عثمان رضی اللہ عنہ نے اسے جائز قرار دیا۔ [مصنف ابن ابي شيبه/كتاب الطلاق/حدیث: 19503]