حضرت علی رضی اللہ عنہ فرماتے ہیں کہ جو جانور سمندر میں مرجائے وہ مردار ہے۔ [مصنف ابن ابي شيبه/كتاب الصيد/حدیث: 20925]

ابراہیم نے پانی میں مرنے والی مچھلی کو مکروہ قرار دیا اور فرمایا کہ اگر آدمی (مچھلیوں کے لیے) باڑہ بنا لے اور کوئی مچھلی اس میں داخل ہو کر مر جائے تو اس کے کھانے میں کوئی حرج نہیں۔ [مصنف ابن ابي شيبه/كتاب الصيد/حدیث: 20926]

حضرت طاوس نے اس مچھلی کے کھانے سے منع کیا جو مردار حالت میں سمندر میں پائی جائے۔ [مصنف ابن ابي شيبه/كتاب الصيد/حدیث: 20927]

حضرت زہری فرماتے ہیں کہ سمندر میں مر کر (پانی کی سطح پر) تیرنے والی مچھلی کھانا مکروہ ہے۔ [مصنف ابن ابي شيبه/كتاب الصيد/حدیث: 20928]

ابراہیم فرماتے ہیں کہ سمندر میں مر کر (پانی کی سطح پر) تیرنے والی مچھلی کھانا مکروہ ہے۔ [مصنف ابن ابي شيبه/كتاب الصيد/حدیث: 20929]

حضرت معاویہ بن قرہ فرماتے ہیں کہ حضرت ابو ایوب نے سمندر میں ایک مچھلی دیکھی جو مر کر (پانی کی سطح پر) تیر رہی تھی، انہوں نے اسے کھالیا۔ [مصنف ابن ابي شيبه/كتاب الصيد/حدیث: 20930]

حضرت ابن عباس رضی اللہ عنہما نے حضرت ابوبکر رضی اللہ عنہ کا یہ قول قسم کھا کر نقل کیا کہ پانی کی سطح پر تیرتی مچھلی حلال ہے۔ [مصنف ابن ابي شيبه/كتاب الصيد/حدیث: 20931]

حضرت ابن عمر رضی اللہ عنہما مر کر سمندر کے اوپر تیرتی مچھلی کو حلال قرار دیتے تھے۔ [مصنف ابن ابي شيبه/كتاب الصيد/حدیث: 20932]

حضرت جابر رضی اللہ عنہ فرماتے ہیں کہ حضرت نبی کریم صلی اللہ علیہ وآلہ وسلم نے ہمیں حضرت ابو عبیدہ رضی اللہ عنہ کے ساتھ ایک لشکر میں روانہ کیا اس سفر میں ہمارا توشۂ سفر ختم ہوگیا۔ اس اثناء میں ہم نے ایک (بہت بڑی) مچھلی دیکھی جسے سمندر نے باہر پھینک دیا تھا۔ ہم نے اسے کھانے کا ارادہ کیا تو پہلے تو حضرت ابو عبیدہ نے ہمیں منع کردیا پھر فرمایا کہ ہم اللہ کے رسول کے بھیجے ہوئے ہیں اور ہم اللہ کے راستے میں ہیں۔ اس مچھلی کو کھالو۔ چناچہ ہم نے اسے کھالیا۔ پھر جب ہم واپس آئے تو ہم نے رسول اللہ صلی اللہ علیہ وسلم سے اس کا تذکرہ کیا۔ آپ نے فرمایا کہ اگر اس مچھلی کا کچھ حصہ تمہارے پاس ہو تو مجھے بھی دو۔ [مصنف ابن ابي شيبه/كتاب الصيد/حدیث: 20933]

حضرت ابو سعید خدری رضی اللہ عنہ فرماتے ہیں کہ جس مچھلی کو سمندر باہر پھینکے اسے کھالو۔ [مصنف ابن ابي شيبه/كتاب الصيد/حدیث: 20934]