حضرت حسن اور حضرت ابراہیم فرماتے ہیں کہ ایسا جانور شکار کی طرح ہے۔ [مصنف ابن ابي شيبه/كتاب الصيد/حدیث: 20965]

ابراہیم سے بھی یہی منقول ہے، دونوں حضرات فرماتے ہیں کہ ایسا جانور شکار کی طرح ہے۔ [مصنف ابن ابي شيبه/كتاب الصيد/حدیث: 20966]

حضرت زیاد بن ابی مریم فرماتے ہیں کہ ایک حمار وحشی اپنے عیال کے قابو سے باہر ہوگیا، انہوں نے اس کی گردن پر تلوار مار دی۔ پھر اس بارے میں حضرت ابن مسعود رضی اللہ عنہ سے سوال کیا گیا تو انہوں نے فرمایا کہ یہ تو ذبح کا سب سے جلدی طریقہ ہے۔ [مصنف ابن ابي شيبه/كتاب الصيد/حدیث: 20967]

حضرت علقمہ فرماتے ہیں کہ حضرت عبد اللہ رضی اللہ عنہ کے گھر میں ایک حمار وحشی ہوگیا۔ ایک آدمی نے اس کی گردن پر بسم اللہ پڑھ کر تلوار ماری تو حضرت ابن مسعود رضی اللہ عنہ نے فرمایا کہ یہ شکار ہے اسے کھالو۔ [مصنف ابن ابي شيبه/كتاب الصيد/حدیث: 20968]

ایک اور سند سے یونہی منقول ہے۔ [مصنف ابن ابي شيبه/كتاب الصيد/حدیث: 20969]

حضرت علقمہ فرماتے ہیں کہ حضرت عبد اللہ کے گھر میں ایک حمار کو وحشی ہونے پر ایک آدمی نے اس کی گردن میں تلوار ماری۔ حضرت عبد اللہ رضی اللہ عنہ سے اس بارے میں سوال کیا گیا تو آپ نے فرمایا کہ اسے کھالو یہ شکار ہے۔ [مصنف ابن ابي شيبه/كتاب الصيد/حدیث: 20970]

حضرت ابو جعفر فرماتے ہیں کہ مدینہ کے ایک گھر میں ایک بیل وحشی ہوگیا ایک آدمی نے بسم اللہ پڑھ کر اس کو تلوار ماری۔ اس بارے حضرت علی رضی اللہ عنہ سے سوال کیا گیا تو آپ نے فرمایا کہ یہ جلدی کا ذبح ہے، اور انہیں اسے کھانے کا حکم دیا۔ [مصنف ابن ابي شيبه/كتاب الصيد/حدیث: 20971]

حضرت رافع بن خدیج رضی اللہ عنہ فرماتے ہیں کہ ایک مرتبہ ہم حضور نبی کریم صلی اللہ علیہ وآلہ وسلم کے ساتھ تھے کہ اتنے میں ایک اونٹ سرکش ہوگیا۔ ایک آدمی نے اسے تلوار مار دی۔ اس بات کا آپ صلی اللہ علیہ وسلم سے ذکر کیا گیا تو آپ نے فرمایا کہ یہ پالتو جانوروحشی جانوروں کی طرح بعض اوقات سرکش اور بےقابو ہوجاتے ہیں جو جانور تمہارے بس سے باہر ہوجائیں ان کے ساتھ یونہی کرو۔ [مصنف ابن ابي شيبه/كتاب الصيد/حدیث: 20972]

ابراہیم اور حسن اس مچھلی کے کھانے میں کوئی حرج نہیں سمجھتے تھے جو (پانی میں بنائے گئے) باڑے میں مرجائے۔ [مصنف ابن ابي شيبه/كتاب الصيد/حدیث: 20973]

ابراہیم پانی میں مرنے والی مچھلی کو مکروہ قرار دیتے تھے، البتہ اگر آدمی (پانی میں) باڑا بنا لے تو جو مچھلی اس میں داخل ہو کر مرجائے اسے جائز قرار دیتے تھے۔ [مصنف ابن ابي شيبه/كتاب الصيد/حدیث: 20974]