حضرت ابن عباس رضی اللہ عنہما فرماتے ہیں کہ آیت میں وطعامہ سے مراد وہ مچھلی ہے جسے سمندر باہر پھینک دے۔ [مصنف ابن ابي شيبه/كتاب الصيد/حدیث: 20945]

حضرت ابراہیم فرماتے ہیں کہ آیت میں وطعامہ سے مراد وہ مچھلی ہے جسے سمندر باہر پھینک دے۔ [مصنف ابن ابي شيبه/كتاب الصيد/حدیث: 20946]

حضرت سعید بن مسیب سے سمندر کے شکار اور اس کے طعام کے بارے میں سوال کیا گیا تو فرمایا کہ اس سے مراد وہ زندہ جاندار ہیں جنہیں سمندر باہر پھینک دے۔ [مصنف ابن ابي شيبه/كتاب الصيد/حدیث: 20947]

حضرت سعد جاری فرماتے ہیں کہ میں نے حضرت ابن عمر رضی اللہ عنہما اور حضرت ابن عمرو رضی اللہ عنہما سے ان مچھلیوں کے بارے میں سوال کیا جو سردی سے مرجائیں یا دوسری مچھلیوں نے انہیں مار ڈالا ہو۔ دونوں حضرات نے فرمایا کہ وہ حلال ہیں۔ [مصنف ابن ابي شيبه/كتاب الصيد/حدیث: 20948]

حضرت طاوس اس مچھلی کو مکروہ قرار دیتے ہیں تھے جسے دوسری مچھلی نے مار دیا ہو۔ [مصنف ابن ابي شيبه/كتاب الصيد/حدیث: 20949]

حضرت عبد اللہ بن عمر رضی اللہ عنہما فرماتے ہیں کہ ایسی مچھلی کو کھانے میں کوئی حرج نہیں۔ [مصنف ابن ابي شيبه/كتاب الصيد/حدیث: 20950]

حضرت عبد اللہ بن عبید بن عمیر سے سوال کیا گیا کہ اگر کوئی آدمی مچھلی پکڑنے کے لیے کانٹا پانی میں ڈالے۔ اس میں ایک مچھلی پھنس جائے لیکن دوسری مچھلی آ کر اس پر حملہ کرے اور اس کا آدھا حصہ لے جائے تو کیا حکم ہے؟ فرمایا وہ باقی حصے کو کھا سکتا ہے۔ [مصنف ابن ابي شيبه/كتاب الصيد/حدیث: 20951]

حضرت معتمر بن سلیمان فرماتے ہیں کہ میں نے حضرت برد سے ذکر کیا اگر ایک آدمی سوار ہوا اور کسی حمار کو نیزہ مار دے اور اللہ کا نام بھی لے یا تلوار مارے تو کیا حکم ہے؟ حضرت برد نے حضرت مکحول کا قول سنایا کہ اگر تلوار یا نیزہ مارتے ہوئے اس نے اللہ کا نام لیا ہے تو اس میں کوئی حرج نہیں۔ [مصنف ابن ابي شيبه/كتاب الصيد/حدیث: 20952]

حضرت عطاء فرماتے ہیں کہ اگر کسی آدمی نے شکار کو نیزہ مارتے ہوئے بسم اللہ پڑھی تو اسے کھالے۔ [مصنف ابن ابي شيبه/كتاب الصيد/حدیث: 20953]

حضرت یحییٰ بن یعمر فرماتے ہیں کہ جس جانور کے حلق میں نیزہ مارا جائے پھر اس کی رگیں کاٹی جائیں اسے نہ کھایا جائے۔ کیونکہ یہ ذبح نہیں بلکہ قتل ہے۔ [مصنف ابن ابي شيبه/كتاب الصيد/حدیث: 20954]