حضرت عروہ رحمہ اللہ نے یتیم کے والی کو اجازت دی ہے کہ وہ اس کی نگرانی کے عوض اس کے مال میں سے معروف طریقے سے کچھ کھالے۔ [مصنف ابن ابي شيبه/كتاب البيوع والأقضية/حدیث: 22726]

حضرت شعبی رحمہ اللہ یتیم کے مال کے والی کے متعلق فرماتے ہیں کہ وہ دودھ اور پھل میں سے اجیر کے حساب سے تناول کرسکتا ہے۔ [مصنف ابن ابي شيبه/كتاب البيوع والأقضية/حدیث: 22727]

حضرت حسن رحمہ اللہ اس شخص کے متعلق فرماتے ہیں جو اپنا غلام ایک سال کے لئے اجرت پردے دے پھر وہ دورانِ سال اس غلام کو فروخت کرنے کا ارادہ کرے، فرمایا اگر وہ چاہے تو اس کو فروخت کرسکتا ہے۔ [مصنف ابن ابي شيبه/كتاب البيوع والأقضية/حدیث: 22728]

حضرت ایاس بن معاویہ اس شخص کے متعلق فرماتے ہیں جو اپنا غلام دوسرے شخص کے پاس بھیجے تاکہ وہ اس کو تعلیم دے، پھر وہ شرط مکمل ہونے سے قبل ہی اس کو وہاں سے نکال لے، تو جو کچھ معلّم نے اس غلام پر خرچ کیا ہے وہ اس کو لوٹایا جائے گا۔ [مصنف ابن ابي شيبه/كتاب البيوع والأقضية/حدیث: 22729]

حضرت شعبہ فرماتے ہیں کہ میں نے حضرت حکم سے دریافت کیا کہ ایک آدمی نے اپنا غلام ایک سال کے لئے اجرت پر دیا ہوا ہے پھر وہ اس کو اس سے نکالنے کا ارادہ کرتا ہے تو ایسا کرنا کیسا ہے؟ آپ رحمہ اللہ نے فرمایا کہ اس کو واپس نکالنے کی (اس سے لینے کی) اجازت ہے۔ [مصنف ابن ابي شيبه/كتاب البيوع والأقضية/حدیث: 22730]

راوی فرماتے ہیں کہ پھر میں نے حضرت حماد سے اس کے متعلق دریافت کیا؟ آپ رحمہ اللہ نے فرمایا کہ اس سے نہ لے مگر نقصان سے خلاصی پانے کے لئے۔ [مصنف ابن ابي شيبه/كتاب البيوع والأقضية/حدیث: 22731]

حضرت شریح رحمہ اللہ اور حضرت مسروق رحمہ اللہ فرماتے ہیں کہ اگر کوئی شخص اپنا غلام ایک سال، یا ایک مہینے کے لئے یا کچھ مدت کے لئے کرایہ پردے پھر وہ اس سے غلام واپس لینے کا ارادہ رکھتا ہوں تو وہ واپس لے سکتا ہے۔ [مصنف ابن ابي شيبه/كتاب البيوع والأقضية/حدیث: 22732]

حضرت ابن ابی نجیح سے مروی ہے کہ ایک شخص نے دریافت کیا کہ اگر کسی شخص کے پاس امانت رکھوائی جائے اور وہ اس کو تجارت میں لگا لے؟ انہوں نے فرمایا کہ حضرت عطا رحمہ اللہ فرمایا کرتے تھے کہ جو منافع حاصل ہو وہ رب المال کو ملے گا۔ [مصنف ابن ابي شيبه/كتاب البيوع والأقضية/حدیث: 22733]

اور حضرت مجاہد رحمہ اللہ نے فرمایا کہ نہ رب المال کو ملے گا اور نہ ہی امانت دار کو بلکہ وہ مساکین کو ملے گا۔ [مصنف ابن ابي شيبه/كتاب البيوع والأقضية/حدیث: 22734]

حضرت حسن رحمہ اللہ فرماتے ہیں کہ امانت کے مال کو اس کے مالک کی اجازت کے بغیر کاروبار میں مت لگاؤ، اگر اس سے بغیر اجازت ایسا کیا تو وہ ضامن ہوگا اور جو منافع اس کو حاصل ہوا وہ اسی کا ہوگا۔ [مصنف ابن ابي شيبه/كتاب البيوع والأقضية/حدیث: 22735]