نبی کریم صلی اللہ علیہ وسلم نے ارشاد فرمایا: جو اللہ کی راہ میں مجاہد کی مدد کرے، یا مقروض کی اس کی تنگ دستی میں مدد کرے یا مکاتب کی اس کی گردن چھڑانے میں مدد کرے اللہ پاک اس کو اس دن (اپنے عرش کا سایہ نصیب کرے گا) جس دن اس کے علاوہ کوئی سایہ نہ ہوگا۔ [مصنف ابن ابي شيبه/كتاب البيوع والأقضية/حدیث: 23606]

نبی کریم صلی اللہ علیہ وسلم ایک اعرابی کے قریب سے گذرے وہ کوئی شئی فروخت کر رہا تھا، آپ صلی اللہ علیہ وسلم نے فرمایا: تم پر پہلی قیمت لازم ہے، بیشک نفع سہولت اور مہلت دینے کے ساتھ ہے۔ [مصنف ابن ابي شيبه/كتاب البيوع والأقضية/حدیث: 23607]

نبی کریم صلی اللہ علیہ وسلم نے ارشاد فرمایا: سامان کا مالک قیمت لگانے کا زیادہ حق دار ہے۔ [مصنف ابن ابي شيبه/كتاب البيوع والأقضية/حدیث: 23608]

حضرت ابن عمر رضی اللہ عنہما نے ارشاد فرمایا: جانور (گھوڑا وغیرہ) کی ناک پر قیمت چسپاں کردیا کرو۔ [مصنف ابن ابي شيبه/كتاب البيوع والأقضية/حدیث: 23609]

حضرت عائشہ رضی اللہ عنہا سے مروی ہے کہ جب حضرت ابوبکر صدیق رضی اللہ عنہ کا مرض الوفات قریب آیا، آپ نے فرمایا: میرے مال میں دیکھو خلافت میں آ نے کے بعد اس میں کتنا اضافہ ہوا ہے، اور وہ میرے بعد والے خلیفہ کو بھیج دو، بیشک میں اس کو حلال سمجھتا تھا، اور جتنا مال میں نے تجارت میں کمایا ہے تقریباً اتنا ہی میں نے چکنائی سے بھی حاصل کیا ہے۔ عائشہ رضی اللہ عنہا فرماتی ہیں کہ جب آپ کی وفات ہوگئی اور ہم نے دیکھا تو ایک نوبی غلام تھا۔ جس نے اپنے بچے اٹھائے ہوئے تھے اور ایک اونٹنی تھی جس پر پانی لایا کرتے تھے۔ عائشہ رضی اللہ عنہا فرماتی ہیں کہ ہم نے یہ سب عمر رضی اللہ عنہ کی طرف بھیج دیا۔ عائشہ رضی اللہ عنہا فرماتی ہیں کہ مجھے میرے قاصد نے بتایا کہ عمر رضی اللہ عنہ رو پڑے اور فرمایا کہ ابوبکر پر اللہ رحم فرمائے انہوں نے اپنے بعد میں آنے والوں کو سخت مشقت میں ڈال دیا ہے۔ [مصنف ابن ابي شيبه/كتاب البيوع والأقضية/حدیث: 23610]

حضرت عمر رضی اللہ عنہ فرماتے ہیں کہ اگر یہ خریدو فروخت نہ ہوتی تو تم لوگوں پر بوجھ بن جاتے۔ [مصنف ابن ابي شيبه/كتاب البيوع والأقضية/حدیث: 23611]

حضرت عائشہ رضی اللہ عنہا ارشاد فرماتی ہیں کہ حضرت ابوبکر صدیق رضی اللہ عنہ قریش میں سب سے بڑے تاجر تھے۔ [مصنف ابن ابي شيبه/كتاب البيوع والأقضية/حدیث: 23612]

حضرت ابو الدرداء رضی اللہ عنہ فرماتے ہیں کہ میں نبی کریم صلی اللہ علیہ وسلم کی بعثت سے پہلے تجارت کیا کرتا تھا، جب آنحضرت صلی اللہ علیہ وسلم کی بعثت ہوگئی تو میں نے تجارت اور عبادت کو جمع کرنے کا ارادہ کیا، تو وہ میرے لئے نہ ہوسکا، تو میں نے تجارت چھوڑ دی اور عبادت پر لگ گیا۔ [مصنف ابن ابي شيبه/كتاب البيوع والأقضية/حدیث: 23613]

حضرت ابن سیرین رحمہ اللہ فرماتے ہیں کہ مجھے اس بات کی خبر دی گئی کہ حضرت ابوبکر صدیق رضی اللہ عنہ قریش کے بڑے تاجر تھے۔ [مصنف ابن ابي شيبه/كتاب البيوع والأقضية/حدیث: 23614]

حضرت ابو وائل رحمہ اللہ فرماتے ہیں کہ تجارت سے حاصل کیا گیا ایک درہم مجھے اپنے وظیفے کے دس درہموں سے زیادہ پسند ہے۔ [مصنف ابن ابي شيبه/كتاب البيوع والأقضية/حدیث: 23615]