حضرت ابراہیم فرماتے ہیں کہ ہر موزونی شے برابر سرابر دی اور لی جائے گی۔ اگر جنس میں اختلاف ہوجائے تو تب کمی زیادتی کرسکتے ہو۔ اسی طرح ہر کیلی چیز برابر سرابر ہوگی۔ البتہ اگر اختلاف جنس ہوجائے تو تب کمی زیادتی کرسکتے ہو۔ [مصنف ابن ابي شيبه/كتاب البيوع والأقضية/حدیث: 24586]

حضرت شریح فرماتے ہیں کہ حق جدید ہی ہے، زیادہ دیر مطالبہ نہ کرنے سے وہ باطل نہ ہوگا۔ [مصنف ابن ابي شيبه/كتاب البيوع والأقضية/حدیث: 24587]

حضرت حسن اس شخص کے متعلق فرماتے ہیں جو غلام چوری کر کے آگے فروخت کر دے، پھر مشتری کے قبضہ میں غلام فوت ہوجائے تو مشتری کے دراہم ضائع ہوجائیں گے اور غلام کا مالک چور سے غلام کی قیمت وصول کرے گا۔ [مصنف ابن ابي شيبه/كتاب البيوع والأقضية/حدیث: 24588]

حضرت جعفر فرماتے ہیں کہ میں نے حضرت زہری سے دریافت کیا کہ ایک شخص دراہم کے بدلہ فلوس خریدے تو کیا یہ بیع صرف ہے؟ فرمایا ہاں یہ صرف ہے، سپردگی سے قبل جدا نہ ہو۔ [مصنف ابن ابي شيبه/كتاب البيوع والأقضية/حدیث: 24589]

ابراہیم سے اس شخص کے متعلق دریافت کیا گیا، جس نے کچھ کپڑے یہ کہہ کر خریدے کہ ہر کپڑا دس درہم کا ہے، اور ان کپڑوں میں بعض کپڑے بعض سے اعلیٰ ہوں، اور بعض کپڑوں میں پھٹن ہو تو کیا حکم ہے؟ وہ کپڑا دس درہم کے بدلہ میں واپس کرے گا۔ [مصنف ابن ابي شيبه/كتاب البيوع والأقضية/حدیث: 24590]

حضرت سفیان فرماتے ہیں کہ ان کے علاوہ ایک اور صاحب فرماتے ہیں کہ وہ پوری قیمت کے حساب سے جتنی قیمت اس کپڑے کی بنتی ہے اس کے بدلہ میں اسے واپس کرے گا۔ حضرت سفیان فرماتے ہیں کہ یہ میرے نزدیک پسندیدہ ہے۔ [مصنف ابن ابي شيبه/كتاب البيوع والأقضية/حدیث: 24591]

حضرت شعبی رحمہ اللہ فرماتے ہیں کہ اگر کوئی شخص غلام کو تجارت کی اجازت دے کر پھر فروخت کردے، تو وہ ضامن ہوگا۔ [مصنف ابن ابي شيبه/كتاب البيوع والأقضية/حدیث: 24592]

حضرت حسن بن صالح فرماتے ہیں کہ میں نے حضرت جعد بن ذکوان سے دریافت کیا کہ آپ اس وقت حضرت شریح کے پاس حاضر تھے جب انہوں نے یہ فرمایا تھا کہ میں گواہ پر گواہ کی گواہی کو نافذ قرار دیتا ہوں؟ فرمایا ہاں جب کہ وہ عادل ہو۔ [مصنف ابن ابي شيبه/كتاب البيوع والأقضية/حدیث: 24593]

حضرت شریح گواہ پر گواہی کو نافذ فرماتے تھے جب ان دونوں پر گواہی دی گئی ہو۔ [مصنف ابن ابي شيبه/كتاب البيوع والأقضية/حدیث: 24594]

حضرت شریح گواہ پر گواہ کی گواہی جائز نہیں سمجھتے تھے جب تک وہ گواہ زندہ ہو اگرچہ وہ یمن میں ہی ہو۔ [مصنف ابن ابي شيبه/كتاب البيوع والأقضية/حدیث: 24595]