راوی کہتے ہیں کہ میں نے ابراہیم سے اس کا ذکر کیا تو فرمایا: حسن نے صحیح کہا ہے کیا وہ جہاد میں نہیں ہے؟ [مصنف ابن ابي شيبه/كتاب البيوع والأقضية/حدیث: 24606]

حضرت سعید بن المسیب نے اس شخص کے متعلق فرمایا جس نے خدمت کی شرط لگا کر غلام کو آزاد کردیا، فرمایا: جب اس نے غلام آزاد کیا تو اس کی شرط باطل ہوگئی۔ [مصنف ابن ابي شيبه/كتاب البيوع والأقضية/حدیث: 24607]

حضرت ابو حیان التیمی اپنے والد سے روایت کرتے ہیں کہ حضرت شریح کی ایک پڑوسن اپنی باندی لے کر حضرت شریح کی خدمت میں آئی، اور عرض کیا اے ابو امیہ! میں نے اپنی اس باندی کو آزاد کردیا ہے۔ آپ نے فرمایا: جو تو کہہ رہی ہے میں وہ سن چکا ہوں، اس خاتون نے عرض کیا کہ! جب تک میں زندہ ہوں میں نے اس پر اپنی خدمت کی شرط لگائی ہے، حضرت شریح نے فرمایا: یہ رہی وہ، اگر چاہے تو کرے۔ [مصنف ابن ابي شيبه/كتاب البيوع والأقضية/حدیث: 24608]

حضرت ضحاک نے اس خاتون کے متعلق فرمایا جس نے اپنے خادم کو آزاد کر کے پھر استثناء کرلیا، آپ نے فرمایا وہ آزاد ہے۔ [مصنف ابن ابي شيبه/كتاب البيوع والأقضية/حدیث: 24609]

حضرت سعد بن الاخرم سے مروی ہے کہ ایک شخص حضرت ابن مسعود رضی اللہ عنہ کی خدمت میں حاضر ہوا اور عرض کیا: میں نے اپنی اس باندی کو آزاد کردیا ہے، اور میں نے اس پر شرط لگائی ہے کہ جس طرح باندی آقا کی خدمت کرتی ہے اس طرح میری خدمت کرے گی، سوائے اس کی شرم گاہ کے، یا فرمایا: شرم گاہ کے علاوہ، پھر جب اس کی گردن موٹی ہوگئی (یعنی وہ طاقتور ہوگئی) تو اس نے کہا کہ میں آزاد ہوں، آپ نے فرمایا: اس کو اس بات کا اختیار نہیں ہے، اس کو پکڑ کرلے جاؤ، جو شرط آپ نے لگائی ہے اس پر اس کو پورا کرنا ضرور ی ہے۔ [مصنف ابن ابي شيبه/كتاب البيوع والأقضية/حدیث: 24610]

حضرت سفینہ سے مروی ہے کہ حضرت ام سلمہ رضی اللہ عنہا نے ان کو آزاد کردیا اور ان پر یہ شرط لگا دی کہ جب تک زندہ ہے۔ آنحضرت صلی اللہ علیہ وسلم کی خدمت کرے۔ [مصنف ابن ابي شيبه/كتاب البيوع والأقضية/حدیث: 24611]

حضرت ضحاک فرماتے ہیں کہ مجھے حضرت زہری نے حکم دیا کہ میں لکھوں کہ انہوں نے اتنا اتنا سونا اتنے اتنے طعام کے بدلہ میں قرض لیا ہے اتنیمدت تک کے لیے۔ اس اس طرح کا اچھا طعام یا اس کی مثل کا طعام ہوگا۔ [مصنف ابن ابي شيبه/كتاب البيوع والأقضية/حدیث: 24612]

حضرت حماد نے فرمایا: اگر میں کسی کو نقد طعام فروخت کروں پھر وہ اس کو گھر لے جائے پھر میں اس سے اقالہ کروں اور اس کے گھر پر ہی اس پر قبضہ کرلوں، تو اگر میں چاہوں تو اس کو ادھار میں فروخت کرسکتا ہوں۔ [مصنف ابن ابي شيبه/كتاب البيوع والأقضية/حدیث: 24613]

حضرت قتادہ نے فرمایا: جب تک اس کو اپنے گھر منتقل نہ کرلو اس وقت تک اسے مت خریدو۔ [مصنف ابن ابي شيبه/كتاب البيوع والأقضية/حدیث: 24614]

ابراہیم فرماتے ہیں کہ کہا جاتا تھا کہ ایک کُرّ گندم کو سو میزان چارہ کے بدلے ادھار فروخت کرنے میں کوئی حرج نہیں ہے۔ [مصنف ابن ابي شيبه/كتاب البيوع والأقضية/حدیث: 24615]