حضرت شعبی فرماتے ہیں کہ گواہ پر گواہی قبول نہیں جب تک کہ وہ دو نہ ہوں۔ [مصنف ابن ابي شيبه/كتاب البيوع والأقضية/حدیث: 24596]

حضرت محمد رحمہ اللہ فرماتے ہیں کہ مقاواۃ میں کوئی حرج نہیں ہے۔ (مقاواۃ کہتے ہیں سستے داموں سامان خرید کر پھر اس کی آپس میں بولی لگانا یہاں تک کہ اس کی قیمت بڑھ جائے)۔ [مصنف ابن ابي شيبه/كتاب البيوع والأقضية/حدیث: 24597]

ابراہیم سے مروی ہے کہ صحابہ وتابعین تجارت کے مقابلے میں ہاتھ سے کمانے کو پسند فرماتے تھے۔ [مصنف ابن ابي شيبه/كتاب البيوع والأقضية/حدیث: 24598]

حضرت سعید بن المسیب سے مروی ہے کہ آنحضرت صلی اللہ علیہ وسلم سے دریافت کیا گیا کہ کون سی کمائی زیادہ پاکیزہ ہے؟ آپ علیہ السلام نے ارشاد فرمایا: آدمی کا اپنے ہاتھ سے کمانا اور ہر اچھی بیع (بیع صحیح)۔ [مصنف ابن ابي شيبه/كتاب البيوع والأقضية/حدیث: 24599]

حضرت عمرو رحمہ اللہ سے دریافت کیا گیا کہ حسن تربوز، ککڑی، کھیرے، گلاب اور جو پورا نہ نکلے اس کے متعلق کیا فرماتے تھے؟ فرماتے تھے نہیں خریدا جائے گا مگر جو پورا نکلے۔ [مصنف ابن ابي شيبه/كتاب البيوع والأقضية/حدیث: 24600]

حضرت مغیرہ فرماتے ہیں کہ میں نے ابراہیم سے دریافت کیا کہ ایک شخص انگور میں بیع سلم کرتا ہے؟ انہوں نے اس میں کوئی حرج نہ سمجھا، میں نے عرض کیا کہ: اگر اس نے انگور میں بیع سلم کی ہو تو کیا وہ اس کے بدلے کچی کھجوریں (بسر) لے سکتا ہے؟ فرمایا کہ نہیں۔ [مصنف ابن ابي شيبه/كتاب البيوع والأقضية/حدیث: 24601]

حضرت طاؤس سے ایک شخص نے دریافت کیا کہ: میں نے قسم اٹھائی ہے کہ میری باندی آزاد اگر میں نے اسے اتنے اتنے ثمن سے کم میں فروخت کیا، مجھے خوف ہے کہ اس کے فروخت کرنے سے پہلے موسم گزر جائے گا، تو آپ کی کیا رائے ہے کہ اس کو کم قیمت میں فروخت کرنا کیسا ہے؟ فرمایا اگر تمہیں بادشاہ کا خوف نہ ہو، یا فرمایا: اگر مجھے تمہارے بارے میں بادشاہ کا خوف نہ ہوتا تو۔ [مصنف ابن ابي شيبه/كتاب البيوع والأقضية/حدیث: 24602]

حضرت حسن اور حضرت محمد رحمہ اللہ اس میں کوئی حرج نہیں سمجھتے تھے کہ آدمی کوئی چیز اس طرح خریدے کہ کچھ رقم دے دے اور کچھ ادھار کرلے پھر اس کو مرابحۃً فروخت کر دے، فرمایا فروخت کرنے والے اتنا بتائے جتنا وہ جانتا ہے۔ [مصنف ابن ابي شيبه/كتاب البيوع والأقضية/حدیث: 24603]

حضرت ابو نضرہ فرماتے ہیں کہ سچا تاجر قیامت کے دن اللہ کے پاس شہید کے رتبہ میں ہے۔ [مصنف ابن ابي شيبه/كتاب البيوع والأقضية/حدیث: 24604]

حسن فرماتے ہیں کہ سچے اور امانت دار تاجر کا حشر صدیقین اور شہداء کے ساتھ ہوگا۔ [مصنف ابن ابي شيبه/كتاب البيوع والأقضية/حدیث: 24605]