حضرت عامر سے دریافت کیا گیا کہ ایک شخص نے دوسرے پر مختلف چیزوں کا دعویٰ کیا ہے؟ فرمایا: وہ ہر ہر چیز پر قسم اٹھائے گا۔ [مصنف ابن ابي شيبه/كتاب البيوع والأقضية/حدیث: 24786]

حضرت شیبانی رحمہ اللہ اس شخص کے متعلق فرماتے ہیں جو بکریوں کو ودیعت کے طور پر لے پھر وہ بکریاں اس کے پاس زیادہ ہوجائیں (اُن کی نسل بڑھ جائے) اور وہ ان کو فروخت کر دے، تو اس پر فروخت کرنے کے دن کی قیمت لازم ہے۔ [مصنف ابن ابي شيبه/كتاب البيوع والأقضية/حدیث: 24787]

حضرت ابو سعید رضی اللہ عنہ فرماتے ہیں کہ رسول اللہ صلی اللہ علیہ وسلم کے زمانے میں ایک شخص کو اپنے خریدے ہوئے پھلوں میں نقصان پہنچا جس سے اس کا قرض بہت زیادہ ہوگیا، تو رسول اللہ صلی اللہ علیہ وسلم نے فرمایا: اس پر صدقہ کرو، چنانچہ لوگوں نے اس پر صدقہ کیا، لیکن وہ اس کے قرض کی پوری ادائیگی کو نہ پہنچا، تو رسول اللہ صلی اللہ علیہ وسلم نے فرمایا: جو کچھ تمہیں ملے وہ لے لو، اور تمہارے لئے اس کے سوا کچھ نہیں، یعنی قرض خواہوں سے فرمایا۔ [مصنف ابن ابي شيبه/كتاب البيوع والأقضية/حدیث: 24788]

حضرت کعب بن مالک رضی اللہ عنہ سے مروی ہے کہ آنحضرت صلی اللہ علیہ وسلم ان کے پاس سے گذرے جبکہ وہ ایک شخص کے پیچھے دو أوقیہ کے لئے لگے ہوئے تھے، آنحضرت صلی اللہ علیہ وسلم نے اس شخص سے ہاتھ سے اشارہ کرتے ہوئے فرمایا: اس سے آدھا کم کر دے، اس شخص نے عرض کیا کہ ٹھیک ہے اے اللہ کے رسول صلی اللہ علیہ وسلم ! پھر آپ صلی اللہ علیہ وسلم دوسرے سے مخاطب ہوئے اور ارشاد فرمایا: اس کا جو باقی حق رہ گیا ہے وہ اس کو ادا کرو۔ [مصنف ابن ابي شيبه/كتاب البيوع والأقضية/حدیث: 24789]

حضرت ابو صالح الحنفی سے مروی ہے کہ حضرت عمر رضی اللہ عنہ کے دور خلافت میں ایک قوم مقروض ہوگئی، حضرت عمر رضی اللہ عنہ نے ان کے عامل کو تحریر فرمایا کہ: ایک تہائی قرض کو تمّول تک مؤخر کردو، اور ایک تہائی ختم کردو اور ایک تہائی فوراً وصول کرلو، پس انہوں نے اسی طرح کیا۔ [مصنف ابن ابي شيبه/كتاب البيوع والأقضية/حدیث: 24790]

ابراہیم اس کو ناپسند فرماتے تھے کہ کوئی شخص دوسرے کو یوں کہے کہ یہ دینار مجھ سے خرید لو اور میں تمہیں ادا کر دوں گا۔ [مصنف ابن ابي شيبه/كتاب البيوع والأقضية/حدیث: 24791]

حضرت جابر فرماتے ہیں کہ میں نے حضرت ابن زبیر رضی اللہ عنہ کو سالوں کے حساب سے کھجوروں کی بیع کرنے سے منع کیا۔ [مصنف ابن ابي شيبه/كتاب البيوع والأقضية/حدیث: 24792]

حضرت جابر رضی اللہ عنہ سے مروی ہے کہ آنحضرت صلی اللہ علیہ وسلم نے کھجور کی کئی سالوں کے لئے بیع کرنے سے منع فرمایا ہے۔ [مصنف ابن ابي شيبه/كتاب البيوع والأقضية/حدیث: 24793]

حضرت جابر رضی اللہ عنہ سے مروی ہے کہ نبی صلی اللہ علیہ وسلم نے سالوں کے اعتبار سے (یعنی کئی سال کی اکٹھی بیع کرنے) سے منع فرمایا ہے۔ [مصنف ابن ابي شيبه/كتاب البيوع والأقضية/حدیث: 24794]

حضرت محمد بن علی رحمہ اللہ فرماتے ہیں کہ مجھے نبی کریم صلی اللہ علیہ وسلم کے صدقات کا ولی بنایا گیا تو میں حضرت محمود بن لبید کے پاس آیا اور ان سے اس کے متعلق دریافت کیا، انہوں نے فرمایا: حضرت عمر رضی اللہ عنہ کے پاس ایک یتیم کا مال تھا، آپ نے اس کا مال تین سال کے لئے فروخت کیا تھا۔ [مصنف ابن ابي شيبه/كتاب البيوع والأقضية/حدیث: 24795]