حضرت ضحاک کے بارے میں روایت ہے کہ وہ اس بات میں کوئی حرج نہیں محسوس کرتے تھے کہ آدمی کتاب اللہ میں سے کچھ (لکھ کر) لٹکائے بشرطیکہ غسل اور قضائے حاجت کے وقت اس کو اتار دے۔ [مصنف ابن ابي شيبه/ كتاب الطب/حدیث: 25098]

حضرت محمد بن علی سے روایت ہے کہتے ہیں کہ ایک رات نبی کریم صلی اللہ علیہ وآلہ وسلم نماز پڑھ رہے تھے کہ اس دوران آپ صلی اللہ علیہ وآلہ وسلم نے اپنا ہاتھ مبارک زمین پر رکھا تو آپ صلی اللہ علیہ وآلہ وسلم کو کسی بچھو نے ڈس لیا، آپ صلی اللہ علیہ وآلہ وسلم نے اس بچھو کو اپنے جوتے سے قابو کرلیا اور مار ڈالا۔ پھر جب آپ صلی اللہ علیہ وآلہ وسلم نماز سے فارغ ہوئے تو ارشاد فرمایا: ”اللہ کی لعنت ہو بچھو پر، نہ نمازی کو چھوڑتا ہے اور نہ غیر نمازی کو۔“ یا آپ صلی اللہ علیہ وآلہ وسلم نے ارشاد فرمایا: نبی کو چھوڑتا ہے نہ غیر نبی کو۔“ پھر آپ صلی اللہ علیہ وآلہ وسلم نے نمک اور پانی منگوایا اور اس کو ایک برتن میں رکھ دیا۔ پھر اپنی انگلی پر جس جگہ بچھو نے ڈسا تھا اس جگہ یہ پانی ڈالنا شروع کیا اور اس کو ملنے لگے اور اس پر معوذتین پڑھ کر دم فرمایا۔ [مصنف ابن ابي شيبه/ كتاب الطب/حدیث: 25099]

حضرت اسود کے بارے میں روایت ہے کہ وہ حمیری زبان میں دم کیا کرتے تھے۔ [مصنف ابن ابي شيبه/ كتاب الطب/حدیث: 25100]

ابراہیم سے روایت ہے کہتے ہیں کہ بچھو کا دم یہ ہے۔ شَجَّۃ قَرَنیۃ مِلْحَۃِ بَحْرٍ قفْطا۔ [مصنف ابن ابي شيبه/ كتاب الطب/حدیث: 25101]

حضرت اسود سے روایت ہے کہتے ہیں کہ میں نے یہ دم حضرت عائشہ رضی اللہ عنہا کے سامنے پیش کیا تو انہوں نے فرمایا یہ عہد و پیمان ہیں۔ [مصنف ابن ابي شيبه/ كتاب الطب/حدیث: 25102]

حضرت ابوہریرہ سے روایت ہے کہتے ہیں کہ رسول اللہ صلی اللہ علیہ وآلہ وسلم کی خدمت میں ایک ایسا آدمی لایا گیا جس کو بچھو نے ڈسا تھا، آپ صلی اللہ علیہ وآلہ وسلم نے فرمایا۔ ”اگر یہ آدمی یوں کہتا: میں اللہ تعالیٰ کے کلمات تامہ کے ذریعے مخلوق کے شر سے پناہ مانگتا ہوں، تو یہ نہ ڈسا جاتا اور یہ بچھو اس کو نقصان نہ دیتا۔“ [مصنف ابن ابي شيبه/ كتاب الطب/حدیث: 25103]

ابراہیم سے روایت ہے۔ کہتے ہیں کہ پہلے لوگ دم کرتے تھے لیکن دم میں پھونک مارنے کو پسند نہیں کرتے تھے۔ [مصنف ابن ابي شيبه/ كتاب الطب/حدیث: 25104]

حضرت ابو الہزہاز سے روایت ہے کہتے ہیں کہ میں حضرت ضحاک کی خدمت میں حاضر ہوا جبکہ وہ تکلیف میں تھے، میں نے (ان سے) عرض کیا اے ابو محمد! کیا میں آپ کو دم نہ کروں؟ انہوں نے فرمایا: کیوں نہیں (بلکہ کرو) لیکن پھونک نہ مارنا، ابوالہزہاز کہتے ہیں: پس میں نے ان کو معوذتین کے ذریعہ دم کیا۔ [مصنف ابن ابي شيبه/ كتاب الطب/حدیث: 25105]

ایوب سے روایت ہے کہتے ہیں کہ حضرت عکرمہ کا ارشاد ہے، مجھے یہ بات پسند نہیں ہے کہ میں دم میں یوں کہوں، بسم اللہ! اُف۔ [مصنف ابن ابي شيبه/ كتاب الطب/حدیث: 25106]

حضرت حکم اور حضرت حماد دونوں کے بارے میں روایت ہے کہ وہ دم میں تھتھکارنے کو پسند نہیں کرتے تھے۔ [مصنف ابن ابي شيبه/ كتاب الطب/حدیث: 25107]