حسن کے بارے میں روایت ہے کہ وہ زہر کے لئے دم کرنے میں کوئی حرج نہیں محسوس کرتے تھے۔ [مصنف ابن ابي شيبه/ كتاب الطب/حدیث: 25078]

محمد سے روایت ہے کہتے ہیں کہ زہر، پہلو کے دانہ اور نظر کے بارے میں دم کرنے کرانے کی اجازت دی گئی ہے۔ [مصنف ابن ابي شيبه/ كتاب الطب/حدیث: 25079]

حضرت ابوبکر بن محمد سے روایت ہے کہ بنو حزم ساعدی کی والدہ، حضرت خالدہ بنت انس، رسول اللہ صلی اللہ علیہ وآلہ وسلم کی خدمت میں حاضر ہوئی اور آپ صلی اللہ علیہ وآلہ وسلم کے سامنے اپنے دم پیش کیے تو آپ صلی اللہ علیہ وآلہ وسلم نے ان کو ان کے کرنے کا حکم فرمایا۔ [مصنف ابن ابي شيبه/ كتاب الطب/حدیث: 25080]

حضرت انس سے روایت ہے، کہتے ہیں کہ رسول اللہ صلی اللہ علیہ وآلہ وسلم نے نظر اور زہر کے دم کی اجازت عنایت فرمائی تھی۔ [مصنف ابن ابي شيبه/ كتاب الطب/حدیث: 25081]

حضرت عامر سے روایت ہے، کہتے ہیں کہ حضرت ابن مسعود نے اپنے بیٹے پر بخار کے (تعویذ کے طور پر) بانس کی نلکی دیکھی تو آپ نے اس کو توڑ دیا اور ارشاد فرمایا: نظر اور زہر کے سوا کسی شئی کا دم (درست) نہیں ہے۔ [مصنف ابن ابي شيبه/ كتاب الطب/حدیث: 25082]

حضرت ابن عمر رضی اللہ عنہما کے بارے میں روایت ہے کہ انہوں نے بچھو کے (ڈسنے پر) دم کروایا تھا۔ [مصنف ابن ابي شيبه/ كتاب الطب/حدیث: 25083]

ابراہیم سے روایت ہے، کہتے ہیں کہ آل اسود کے پاس زمانہ جاہلیت ہی سے زہر کا ایک دم تھا، جس سے وہ دم کرتے تھے۔ راوی کہتے ہیں، پس حضرت اسود نے وہ دم حضرت عائشہ رضی اللہ عنہا کے سامنے پیش کیا، راوی کہتے ہیں، حضرت عائشہ رضی اللہ عنہا نے انہیں حکم دیا کہ وہ اس دم کے ذریعہ سے دم کیا کریں۔ راوی کہتے ہیں، حضرت عائشہ رضی اللہ عنہا نے یہ بھی فرمایا: نظر اور زہر کے علاوہ کسی شئی کا دم (درست) نہیں ہے۔ [مصنف ابن ابي شيبه/ كتاب الطب/حدیث: 25084]

حضرت ابوبکر بن سلیمان بن ابی حثمہ سے روایت ہے کہ رسول اللہ صلی اللہ علیہ وآلہ وسلم نے ان کی دادی حضرت شفاء بنت عبد اللہ سے فرمایا تھا۔ ”تم حفصہ کو اپنا دم بھی سکھا دو“۔ [مصنف ابن ابي شيبه/ كتاب الطب/حدیث: 25085]

ابو بشر یعنی اسماعیل بن علیہ کہتے ہیں کہ میں نے حضرت محمد سے پوچھا، ان کا دم کون سا تھا؟ محمد نے جواب دیا، پہلو کے پھوڑے کا دم تھا۔ [مصنف ابن ابي شيبه/ كتاب الطب/حدیث: 25086]

حضرت انس سے روایت ہے۔ فرماتے ہیں کہ رسول اللہ صلی اللہ علیہ وآلہ وسلم نے پہلو کے پھوڑے کے دم کی اجازت عنایت فرمائی ہے۔ [مصنف ابن ابي شيبه/ كتاب الطب/حدیث: 25087]