حضرت عثمان بن ابوالعاص کے بارے میں روایت ہے کہ وہ نبی کریم صلی اللہ علیہ وآلہ وسلم کی خدمت اقدس میں حاضر ہوئے اور انہوں نے عرض کیا۔ یا رسول اللہ صلی اللہ علیہ وآلہ وسلم! تحقیق شیطان میری نماز اور میری تلاوت کے درمیان حائل ہوجاتا ہے۔ آپ صلی اللہ علیہ وآلہ وسلم نے فرمایا: ”یہ وہ شیطان ہے۔ جس کو خنزب کہا جاتا ہے۔ پس جب اس کو محسوس کرو تو تم اپنی بائیں جانب تین مرتبہ تھوک دو اور اللہ تعالیٰ سے اس کے شر کی پناہ مانگو۔“ [مصنف ابن ابي شيبه/ كتاب الطب/حدیث: 25148]

حضرت ابو التیاح بیان کرتے ہیں کہ کسی آدمی نے حضرت عبد اللہ بن خنبش سے پوچھا۔ رسول اللہ صلی اللہ علیہ وآلہ وسلم کے ساتھ جب شیاطین نے مکر کرنا چاہا تو آپ صلی اللہ علیہ وآلہ وسلم نے کیا کیا تھا؟ عبد اللہ نے جواب دیا۔ آپ صلی اللہ علیہ وآلہ وسلم کے پاس مختلف وادیوں سے اور مختلف پہاڑوں سے اتر کر شیاطین آئے اور ان میں ایک ایسا شیطان بھی تھا جس کے پاس آگ کا ایک بڑا انگارہ تھا۔ اور اس کے ذریعہ سے وہ رسول اللہ صلی اللہ علیہ وآلہ وسلم کو جلانا چاہتا تھا۔ پھر آپ صلی اللہ علیہ وآلہ وسلم اس شیطان سے گھبرا گئے۔ جعفر راوی کہتے ہیں۔ میرا خیال ہے کہ آپ صلی اللہ علیہ وآلہ وسلم پیچھے ہٹنے لگے۔ حضرت جبرائیل (علیہ السلام) تشریف لائے اور انہوں نے فرمایا: ”اے محمد (صلی اللہ علیہ وآلہ وسلم)! کہو“ آپ صلی اللہ علیہ وآلہ وسلم نے پوچھا۔ ”میں کیا کہوں؟“ جبرائیل نے کہا۔ ”آپ یہ کہو: میں اللہ تعالیٰ کے ان کلماتِ تامہ کے ذریعہ پناہ پکڑتا ہوں کہ جن کلمات سے کوئی فاجر یا نیک تجاوز نہیں کرسکتا، ہر اس چیز کے شر سے جو اس نے پیدا کی، پھیلائی اور بنائی۔ اور میں ہر اس چیز کے شر سے پناہ حاصل کرتا ہوں جو آسمان سے اترے اور آسمان میں چڑھے اور ہر اس چیز کے شر سے جو اس نے زمین میں پیدا کی اور جو زمین سے باہر آئے، اور رات، دن کے فتنوں کے شر سے اور رات کو آنے والی کسی بھی چیز کے شر سے مگر رات کو آنے والی وہ چیز جو خیر کے ساتھ آئے، اے رحمن“۔ راوی کہتے ہیں۔ پس شیطانوں کی آگ بجھ گئی اور اللہ تعالیٰ نے ان کو ناکام کردیا۔ [مصنف ابن ابي شيبه/ كتاب الطب/حدیث: 25149]

حضرت مجاہد سے روایت ہے کہتے ہیں کہ مجھے غول (بھوت) اور شیاطین کو دیکھنے سے بڑی آزمائش پیش آتی تھی اور مجھے کوئی سایہ سا نظر آتا تھا۔ میں نے حضرت ابن عباس رضی اللہ عنہما سے (اس کے بارے میں) پوچھا۔ تو انہوں نے فرمایا: تم نے جو کچھ دیکھا ہے اس پر جرأت کرو اور اس سے ڈرو نہیں۔ کیونکہ جس طرح تم اس سے ڈرتے ہو وہ بھی تم سے ڈرتے ہیں۔ تم اس سے بھی زیادہ ڈرپوک نہ بنو۔ حضرت مجاہد کہتے ہیں۔ میں نے پھر دوبارہ یہ دیکھا تو میں نے اس کو لاٹھی ماری یہاں تک کہ میں نے ضرب کی آواز بھی سُنی۔ [مصنف ابن ابي شيبه/ كتاب الطب/حدیث: 25150]

حضرت ابراہیم نخعی سے روایت ہے کہتے ہیں کہ پہلے لوگوں میں سے جب کوئی خواب کی حالت میں ناپسندیدہ چیز دیکھتا تو یہ کہتا تھا۔: میں اس ذریعہ سے پناہ پکڑتا ہوں جس ذریعہ سے اللہ تعالیٰ کے فرشتے اور رسول پناہ پکڑتے ہیں ہر اس چیز کے شر سے جو میں نے اپنی خواب میں دیکھی کہ مجھے اس کی وجہ سے کوئی ایسی بات دنیا یا آخرت میں پہنچے جس کو میں پسند نہیں کرتا۔ [مصنف ابن ابي شيبه/ كتاب الطب/حدیث: 25151]

حضرت عمرو بن شعیب، اپنے والد، اپنے دادا سے روایت کرتے ہیں کہ رسول اللہ صلی اللہ علیہ وآلہ وسلم نے ارشاد فرمایا: ”تم میں سے جب کوئی اپنی نیند میں ڈر جائے تو اس کو یہ کہنا چاہیے۔: ”بسم اللہ، میں اللہ تعالیٰ کے کلمات تامہ کے ذریعہ سے اس کے غضب اور اس کے سخت انتقام اور اس کے شریر بندوں اور شیطانوں کی شرارت اور اس بات سے کہ وہ میرے پاس حاضر ہوں، پناہ میں آتا ہوں۔ [مصنف ابن ابي شيبه/ كتاب الطب/حدیث: 25152]

حضرت عبد الرحمن بن ابی لیلیٰ سے روایت ہے، کہتے ہیں کہ جب تم میں سے کوئی شیطان (کے اثرات) کو محسوس کرے تو اس کو چاہیئے کہ وہ زمین کو دیکھے اور اعوذ باللہ پڑھے۔ [مصنف ابن ابي شيبه/ كتاب الطب/حدیث: 25153]

حضرت جابر سے روایت ہے کہ رسول اللہ صلی اللہ علیہ وآلہ وسلم نے حضرت سعد کو ان کے ان کے بازو کی ایک رگ میں دو مرتبہ داغ دیا تھا۔ [مصنف ابن ابي شيبه/ كتاب الطب/حدیث: 25154]

حضرت قیس بن ابی حازم سے روایت ہے کہتے ہیں کہ ہم حضرت خباب کی عیادت کرنے کے لئے ان کے ہاں گئے۔ انہوں نے اپنے پیٹ میں سات مرتبہ داغا ہو اتھا۔ [مصنف ابن ابي شيبه/ كتاب الطب/حدیث: 25155]

حضرت ابن عمر رضی اللہ عنہما کے بارے میں روایت ہے کہ انہوں نے لقوہ کے مرض کی وجہ سے اپنے بدن پر داغا اور بچھو کے ڈسنے پر دم کیا۔ [مصنف ابن ابي شيبه/ كتاب الطب/حدیث: 25156]

حضرت جریر سے روایت ہے کہتے ہیں کہ حضرت عمر نے مجھے قسم دے کر کہا کہ میں ضرور اپنے بدن کو داغوں۔ [مصنف ابن ابي شيبه/ كتاب الطب/حدیث: 25157]