حضرت انس کے بارے میں روایت ہے کہ انہوں نے لقوہ کے مرض کی وجہ سے (اپنے بدن پر) داغا تھا۔ [مصنف ابن ابي شيبه/ كتاب الطب/حدیث: 25158]

حضرت انس سے روایت ہے، کہتے ہیں کہ مجھے ابو طلحہ نے داغا اور انہوں نے بوجہ لقوہ کے مرض کے داغا۔ [مصنف ابن ابي شيبه/ كتاب الطب/حدیث: 25159]

حضرت محمد بن عبد الرحمن بن سعد بن زرارہ سے روایت ہے کہ میں نے اپنے چچا یحییٰ (اپنے میں سے کسی آدمی کو میں نے ان کے مشابہ نہیں پایا) کو بیان کرتے سُنا کہ حضرت سعد بن زرارہ کو حلق میں ایک بیماری پیدا ہوگئی جس کو ذبح (سوزش) کہا جاتا ہے، رسول اللہ صلی اللہ علیہ وآلہ وسلم نے ارشاد فرمایا: ”میں ضرور بالضرور ابو امامہ میں عذر کو پہنچاؤں گا یا فرمایا: میں ضرور بالضرور آزماؤں گا، چناچہ آپ صلی اللہ علیہ وآلہ وسلم نے ان کو اپنے ہاتھ سے داغا اور وہ انتقال کر گئے، تو رسول اللہ صلی اللہ علیہ وآلہ وسلم نے ارشاد فرمایا: ”یہود کے لئے یہ (واقعہ) بری موت ہے، وہ کہیں گے، محمد نے اپنے ساتھی سے تکلیف کیوں نہ دور کی، حالانکہ میں تو نہ اس کے لئے اور نہ اپنی جان کے لئے کسی چیز کا مالک ہوں۔“ [مصنف ابن ابي شيبه/ كتاب الطب/حدیث: 25160]

حضرت شیبان لحام سے روایت ہے کہتے ہیں کہ حضرت ابن الحنفیہ نے میرے سر میں داغا تھا۔ [مصنف ابن ابي شيبه/ كتاب الطب/حدیث: 25161]

حضرت عطاء بن سائب، ابو عبد الرحمن کے بارے میں روایت کرتے ہیں کہ عطاء، ابو عبد الرحمن کے ہاں گئے اور انہوں نے ایک غلام کو داغا تھا۔ [مصنف ابن ابي شيبه/ كتاب الطب/حدیث: 25162]

حضر ت مطرف بن شخیر سے روایت ہے کہ حضرت عمران بن حصین داغنے سے روکا کرتے تھے، لیکن پھر انہوں نے بعد میں اپنے بدن پر داغ لگوایا۔ [مصنف ابن ابي شيبه/ كتاب الطب/حدیث: 25163]

حضرت ابو مجلز سے روایت ہے کہ حضرت عمران بن حصین داغنے سے روکا کرتے تھے لیکن پھر وہ (مرض میں) مبتلا ہوئے تو انہوں نے خود کو داغ لگایا۔ پھر اس کے بعد وہ اونچی آواز سے کہا کرتے تھے کہ میں نے خود کو آگ کے ذریعہ سے داغا ہے لیکن اس نے نہ تو تکلیف ختم کی اور نہ ہی بیماری میں شفا دی۔ [مصنف ابن ابي شيبه/ كتاب الطب/حدیث: 25164]

حضرت عبد اللہ سے روایت ہے، کہتے ہیں کہ نبی کریم صلی اللہ علیہ وآلہ وسلم کی خدمت میں ایک شخص کو لایا گیا جس کے بارے میں داغنے کو کہا گیا تھا نبی کریم صلی اللہ علیہ وآلہ وسلم نے اس کو فرمایا: ”اس کو داغو یا فرمایا، اس کو گرم پتھر سے داغو۔“ [مصنف ابن ابي شيبه/ كتاب الطب/حدیث: 25165]

حضرت جریر سے روایت ہے کہتے ہیں کہ حضرت عمر نے مجھے قسم کھا کر کہا کہ میں ضرور بالضرور خود کو داغوں گا۔ [مصنف ابن ابي شيبه/ كتاب الطب/حدیث: 25166]

حضرت حسن بن سعد، اپنے والد سے روایت کرتے ہیں کہ انہوں نے فرمایا: حضرت حسن بن علی رضی اللہ عنہ کے پاس ایک بختی اونٹنی تھی جس کا کوہان ایک جانب گرگیا تھا چناچہ انہوں نے مجھے حکم دیا کہ میں اس کو کاٹ دوں اور داغ دوں۔ [مصنف ابن ابي شيبه/ كتاب الطب/حدیث: 25167]