حسن سے روایت ہے۔ کہتے ہیں کہ ابن عامر یا ابن زیاد نے کہا کہ: میرے پاس کوئی ایسا آدمی لایا گیا جس نے کسی بچے کو شراب پلائی ہو تو میں اس کو ضرور کوڑے لگاؤں گا۔ ابن عون کہتے ہیں: میرے حافظے کے مطابق وہ ابن زیاد تھے۔ [مصنف ابن ابي شيبه/ كتاب الطب/حدیث: 25038]

حضرت ابن عمر رضی اللہ عنہما کے بارے میں منقول ہے کہ وہ اس بات کو (بھی) ناپسند کرتے تھے کہ جانوروں کو شراب پلائی جائے۔ [مصنف ابن ابي شيبه/ كتاب الطب/حدیث: 25039]

حضرت ابراہیم کے بارے میں منقول ہے کہ وہ اس بات کو ناپسند سمجھتے تھے کہ شراب اور چیچڑ کے خون کے ساتھ اور آگ کے ذریعہ سے علاج کیا جائے۔ [مصنف ابن ابي شيبه/ كتاب الطب/حدیث: 25040]

حضرت حکم بن عطیہ سے روایت ہے۔ کہتے ہیں کہ حسن سے سوال کیا گیا کہ ایک بچہ تکلیف میں مبتلا ہے، کیا اسے شراب کا ایک قطرہ دیا جاسکتا ہے؟ انہوں نے فرمایا نہیں۔ [مصنف ابن ابي شيبه/ كتاب الطب/حدیث: 25041]

حضرت زہری سے روایت ہے کہ حضرت عائشہ رضی اللہ عنہا کہا کرتی تھیں کہ جو شخص شراب کے ذریعہ سے علاج کرے تو اللہ تعالیٰ اس کو شفا ہی نصیب نہ کریں۔ [مصنف ابن ابي شيبه/ كتاب الطب/حدیث: 25042]

حضرت عامر سے روایت ہے۔ کہتے ہیں کہ حضرت ابن عمر نے فرمایا: جو شخص کسی بچے کو شراب پلائے گا تو ہم پلانے والے کو کوڑے ماریں گے۔ [مصنف ابن ابي شيبه/ كتاب الطب/حدیث: 25043]

حضرت سعد بن ابراہیم سے روایت ہے کہ حضرت ابن عمر رضی اللہ عنہما اس بات کو ناپسند کرتے تھے کہ اونٹ کی پشت پر جو زخم لگا ہے اس کا علاج شراب سے کیا جائے۔ [مصنف ابن ابي شيبه/ كتاب الطب/حدیث: 25044]

حضرت عائشہ رضی اللہ عنہا سے روایت ہے۔ کہتی ہیں کہ رسول اللہ صلی اللہ علیہ وآلہ وسلم نے ارشاد فرمایا: ”تم لوگ مبغوض لیکن نافع چیز یعنی تلبینہ (بھوسے اور شہد کا حریرہ) کو لازم پکڑو۔ پس قسم ہے اس ذات کی جس کے قبضہ میں میری جان ہے۔ یقینا یہ چیز تمہارے پیٹ کو اس طرح دھو ڈالتی ہے جیسا کہ تم میں سے کوئی ایک اپنے چہرہ سے میل کو دھو ڈالتا ہے۔“ اور رسول اللہ صلی اللہ علیہ وآلہ وسلم کے گھر والوں میں سے جب کسی کو کوئی تکلیف ہوتی تو ہانڈی مسلسل آگ پر دھری رہتی یہاں تک کہ مریض کسی ایک جانب … موت یا حیات… کی طر ف آجاتا۔ [مصنف ابن ابي شيبه/ كتاب الطب/حدیث: 25045]

حضرت مکحول سے روایت ہے۔ کہتے ہیں کہ نبی کرم (صلی اللہ علیہ وآلہ وسلم) (اپنی) پیشانی کے بالوں کے نچلے حصہ میں پچھنے لگواتے تھے اور اس کو آپ صلی اللہ علیہ وآلہ وسلم منقذ کا نام دیتے تھے۔ [مصنف ابن ابي شيبه/ كتاب الطب/حدیث: 25046]

حضرت انس سے روایت ہے کہتے ہیں کہ نبی کریم صلی اللہ علیہ وآلہ وسلم نے تین جگہ پر پچھنے لگوائے، دو رگیں گردن کے دونوں جانب اور ایک دو کندھوں کے درمیان۔ [مصنف ابن ابي شيبه/ كتاب الطب/حدیث: 25047]