حضرت واقع بن سحبان سے روایت ہے۔ کہتے ہیں کہ حضرت عبد اللہ فرماتے ہیں۔ جو آدمی کوئی چیز لٹکاتا ہے تو وہ اس کے سپرد کردیا جاتا ہے۔ [مصنف ابن ابي شيبه/ كتاب الطب/حدیث: 25018]

حضرت سعید بن جبیر سے روایت ہے۔ کہتے ہیں کہ انہیں درد سر تھا۔ بتاتے ہیں کہ ان سے ایک آدمی نے کہا۔ میں آپ کو اس درد کا دم کر دوں؟ حضرت سعید بن جبیر نے فرمایا۔ مجھے دم کی کوئی ضرورت نہیں ہے۔ [مصنف ابن ابي شيبه/ كتاب الطب/حدیث: 25019]

حضرت ابراہیم کے بارے میں روایت ہے کہ وہ بچوں کے لئے تعویذ کو پسند نہیں کرتے تھے۔ اور فرماتے تھے کہ بچے تعویذ کے ہمراہ ہی بیت الخلاء میں چلے جاتے ہیں۔ [مصنف ابن ابي شيبه/ كتاب الطب/حدیث: 25020]

حضرت سعد فرماتے ہیں کہ میں نے رسول اللہ صلی اللہ علیہ وآلہ وسلم کو کہتے ہوئے سُنا کہ ”جو شخص بوقت صبح سات عجوہ کھجوریں کھالے گا تو اس کو اس دن میں کوئی زہر یا جادو نقصان نہیں دے گا۔ [مصنف ابن ابي شيبه/ كتاب الطب/حدیث: 25021]

حضرت ابوہریرہ سے روایت ہے۔ کہتے ہیں کہ رسول اللہ صلی اللہ علیہ وآلہ وسلم نے ارشاد فرمایا ہے کہ ”عجوہ کھجور جنت سے ہے اور یہ زہر سے بھی شفاء ہے۔“ [مصنف ابن ابي شيبه/ كتاب الطب/حدیث: 25022]

حضرت ہشام بن عروہ اپنے والد کے واسطے سے حضرت عائشہ رضی اللہ عنہا کے بارے میں روایت کرتے ہیں کہ حضرت عائشہ رضی اللہ عنہا دورانِ سر سے افاقہ کے لئے سات صبح نہار منہ عجوہ کھجور کے سات دانے کھانے کا فرمایا کرتی تھیں۔ [مصنف ابن ابي شيبه/ كتاب الطب/حدیث: 25023]

حضرت عائشہ رضی اللہ عنہا سے روایت ہے۔ کہتی ہیں کہ رسول اللہ صلی اللہ علیہ وآلہ وسلم نے ارشاد فرمایا کہ: ”عجوہ عالیہ میں شفا ہے۔“ یا ارشاد فرمایا: ’ ’ عجوہ عالیہ، صبح کے وقت نہار منہ تریاق ہے۔“ [مصنف ابن ابي شيبه/ كتاب الطب/حدیث: 25024]

حضرت انس سے روایت ہے کہ حضرت ام سلیم کا ایک بچہ پیدا ہوا تو مجھے ابو طلحہ نے کہا۔ اس بچہ کو نبی کریم صلی اللہ علیہ وآلہ وسلم کے پاس لے جاؤ۔ پس یہ بچہ نبی کریم صلی اللہ علیہ وآلہ وسلم کی خدمت میں لایا گیا اور اس بچہ کے ہمراہ چند کھجوریں بھی بھیجی گئی تھیں۔ چناچہ آپ صلی اللہ علیہ وآلہ وسلم نے اس بچہ کو لیا اور فرمایا ”اس کے ساتھ کوئی چیز ہے؟“ لوگوں نے جواب دیا۔ جی ہاں! کھجوریں ہیں۔ اس پر نبی کریم صلی اللہ علیہ وآلہ وسلم نے کھجوریں لیں اور ان کو چبایا پھر آپ صلی اللہ علیہ وآلہ وسلم نے اپنے منہ مبارک سے (چبائی ہوئی کھجور) لی اور اس کو بچہ کے منہ میں ڈال دیا۔ پھر آپ صلی اللہ علیہ وآلہ وسلم نے اس کے تالو کو ملا اور اس کا نام آپ صلی اللہ علیہ وآلہ وسلم نے عبد اللہ رکھا۔ [مصنف ابن ابي شيبه/ كتاب الطب/حدیث: 25025]

حضرت ابو موسیٰ سے روایت ہے۔ کہتے ہیں کہ میرے ہاں بچہ پیدا ہوا۔ میں (اسے لے کر) نبی کریم صلی اللہ علیہ وآلہ وسلم کی خدمت میں حاضر ہوا تو آپ صلی اللہ علیہ وآلہ وسلم نے اس کا نام ابراہیم رکھا اور اس کو ایک کھجور سے گٹھی دی۔ [مصنف ابن ابي شيبه/ كتاب الطب/حدیث: 25026]

حضرت اسماء بنت ابی بکر سے روایت ہے کہ وہ نبی کریم صلی اللہ علیہ وآلہ وسلم کی خدمت میں ابن زبیر کو، جب حضرت اسماء نے ان کو جنا، لے کر حاضر ہوئیں۔ اور صحابہ نے کھجور کی تلاش کی یہاں تک کہ مل گئی تو پھر انہوں نے ابن زبیر کو اس کھجور کی گٹھی دی۔ پس سب سے پہلی چیز جو حضرت ابن زبیر کے پیٹ میں گئی وہ آپ صلی اللہ علیہ وآلہ وسلم کا لعاب مبارک تھا۔ [مصنف ابن ابي شيبه/ كتاب الطب/حدیث: 25027]