حضرت جابر سے روایت ہے، وہ کہتے ہیں کہ تمہیں مسلمان کے گھر میں جو چیز ملے تم اس کو کھا سکتے ہو۔ [مصنف ابن ابي شيبه/كتاب الأطعمة/حدیث: 26026]

حضرت یزید بن ابی زیاد سے روایت ہے، وہ کہتے ہیں کہ ہم ایک میزبان کے ہاں گئے جس نے ہمیں دعوت پر بلایا تھا۔ وہ ہمارے پاس نبیذ لے کر آیا۔ میں نے تو اس کو ناپسند کیا لیکن حضرت علی - امام ابوبکر (بن ابی شیبہ) کہتے ہیں۔ مناسب یہی ہے کہ وہ ابن حسین بن علی رحمہ اللہ ہوں - نے اس کو لے لیا اور پھر اس کو پی بھی لیا اور فرمایا۔ جب تم اپنے کسی مسلمان بھائی کے پاس جاؤ تو تم اس کے کھانے میں سے کھاؤ او اس کے مشروب میں سے پیو۔ [مصنف ابن ابي شيبه/كتاب الأطعمة/حدیث: 26027]

حضرت موسیٰ بن عمیر کہتے ہیں کہ میں نے حضرت شعبی کو کہتے سُنا کہ جب تم کسی مسلمان کے گھر جاؤ تو تم اس کے کھانے میں سے کھاؤ اور اس کے مشروب میں سے پیو۔ [مصنف ابن ابي شيبه/كتاب الأطعمة/حدیث: 26028]

حضرت عائشہ رضی اللہ عنہا سے روایت ہے۔ وہ کہتی ہیں کہ صحابہ نے پوچھا۔ یا رسول اللہ صلی اللہ علیہ وآلہ وسلم! دیہاتی لوگ ہمارے پاس گوشت لے کر آتے ہیں جس کے بارے میں ہمیں کوئی علم نہیں ہوتا کہ یہ کیا ہے؟ اس پر اللہ کا نام لیا گیا ہے یا نہیں؟ آپ صلی اللہ علیہ وآلہ وسلم نے ارشاد فرمایا: ”تم اس پر بسم اللہ پڑھ لو اور (اس کو) کھالو۔“ [مصنف ابن ابي شيبه/كتاب الأطعمة/حدیث: 26029]

حضرت زہری سے روایت ہے کہ انہوں نے ا بو بکر بن عبید اللہ بن عبد اللہ کو اپنے دادا سے، جناب نبی کریم صلی اللہ علیہ وآلہ وسلم سے روایت کرکے بیان کرتے سُنا کہ آپ صلی اللہ علیہ وآلہ وسلم نے فرمایا: ”شیطان، بائیں ہاتھ سے کھاتا ہے اور بائیں ہاتھ سے پیتا ہے۔ پس جب تم میں سے کوئی کھائے تو اس کو چاہیئے کہ وہ دائیں ہاتھ سے کھائے اور دائیں ہاتھ سے پیے۔“ [مصنف ابن ابي شيبه/كتاب الأطعمة/حدیث: 26030]

حضرت انس بن مالک رضی اللہ عنہ سے روایت ہے۔ وہ کہتے ہیں کہ جناب رسول اللہ صلی اللہ علیہ وآلہ وسلم نے ارشاد فرمایا: ”جب تم میں سے کوئی کھائے تو اس کو چاہیے کہ وہ اپنے دائیں ہاتھ سے کھائے اور دائیں ہاتھ سے پیئے۔ کیونکہ شیطان بائیں ہاتھ سے کھاتا ہے اور بائیں ہاتھ سے پیتا ہے۔“ [مصنف ابن ابي شيبه/كتاب الأطعمة/حدیث: 26031]

حضرت ابن عباس رضی اللہ عنہما سے روایت ہے، وہ کہتے ہیں کہ تم بائیں ہاتھوں سے نہ کھاؤ۔ اور بائیں ہاتھوں سے نہ پیو۔ کیونکہ حضرت آدم نے بائیں ہاتھ سے کھایا اور بھول گئے تو اس عمل نے ان میں بھولنے کی کیفیت پیدا کردی۔ [مصنف ابن ابي شيبه/كتاب الأطعمة/حدیث: 26032]

حضرت وہب بن کیسان سے روایت ہے کہ انہوں نے حضرت عمر بن ابی سلمہ کو سُنا کہ آپ نے فرمایا: میں جناب نبی کریم صلی اللہ علیہ وآلہ وسلم کی خدمت میں بچپن میں تھا اور میرا ہاتھ پیالہ میں گھوم رہا تھا۔ تو آپ صلی اللہ علیہ وآلہ وسلم نے مجھ سے فرمایا۔ ”اے بچے! اللہ کا نام لو اور دائیں ہاتھ سے کھاؤ اور اپنے سامنے سے کھاؤ۔“ [مصنف ابن ابي شيبه/كتاب الأطعمة/حدیث: 26033]

حضرت عمر بن ابی سلمہ سے روایت ہے، وہ کہتے ہیں کہ میں جناب نبی کریم صلی اللہ علیہ وآلہ وسلم کی خدمت میں حاضر ہوا آپ صلی اللہ علیہ وآلہ وسلم اس وقت کھانا کھا رہے تھے۔ چناچہ آپ صلی اللہ علیہ وآلہ وسلم نے ارشاد فرمایا: ”اے بیٹے! بیٹھ جاؤ۔ بسم اللہ پڑھو اور اپنے دائیں ہاتھ سے کھاؤ اور اپنے آگے سے کھاؤ۔“ [مصنف ابن ابي شيبه/كتاب الأطعمة/حدیث: 26034]

حضرت برید بن ابی مریم، اپنے والد سے روایت کرتے ہیں، وہ کہتے ہیں کہ حضرت عمر بن خطاب نے ایک آدمی کو دیکھا۔ اس نے بائیں ہاتھ سے کھانے کا ارادہ کیا تھا۔ حضرت عمر نے فرمایا: نہیں۔ مگر یہ صورت ہے کہ تمہارا ہاتھ معذور ہو یا خراب ہو۔ [مصنف ابن ابي شيبه/كتاب الأطعمة/حدیث: 26035]