حضرت عبد الرحمن الرحال فرماتے ہیں کہ حضرت ربیع بن خثیم جب سلام کا جواب دیتے تو یوں کہتے: وعلیکم اور سلام کرنے والے پر جواب کی نیت کرلیتے۔ [مصنف ابن ابي شيبه/ كتاب الأدب/حدیث: 27344]

حضرت ابو اسحاق فرماتے ہیں کہ حضرت شریح جب سلام کا جوا ب دیتے تو یوں کہتے: وعلیکم: یعنی تم پر بھی ہو۔ [مصنف ابن ابي شيبه/ كتاب الأدب/حدیث: 27345]

حضرت اعمش فرماتے ہیں کہ حضرت زید بن وھب کو جب سلام کیا جاتا تو آپ یوں جواب دیتے۔ وعلیکم السلام و رحمۃ اللہ وبرکاتہ و مغفرتہ۔ [مصنف ابن ابي شيبه/ كتاب الأدب/حدیث: 27346]

حضرت اعمش فرماتے ہیں کہ حضرت ابراہیم نے ارشاد فرمایا: جب کوئی آدمی سلام کا جواب دے تو اس کو چاہیے کہ وہ جمع کا صیغہ استعمال کرے اور یوں کہے وعلیکم، اس لے ب کہ آدمی کے ساتھ فرشتے بھی ہوتے ہیں۔ [مصنف ابن ابي شيبه/ كتاب الأدب/حدیث: 27347]

حضرت اسماعیل اور حضرت ابن عون یہ دونوں حضرات فرماتے ہیں کہ حضرت ابراہیم جب سلام کا جواب دیتے تو یوں کہتے، وعلیکم ورحمۃ اللہ۔ [مصنف ابن ابي شيبه/ كتاب الأدب/حدیث: 27348]

حضرت ابن عون فرماتے ہیں کہ امام محمد جب سلام کا جواب دیتے تو یوں کہتے: وعلیکم۔ [مصنف ابن ابي شيبه/ كتاب الأدب/حدیث: 27349]

حضرت غالب فرماتے ہیں کہ ہم لوگ حسن بصری کے دروازے پر بیٹھے ہوئے تھے کہ ایک آدمی آیا اور کہنے لگا: میرے والد نے میرے دادا سے نقل کیا ہے کہ انہوں نے فرمایا: کہ میرے والد نے مجھے رسول اللہ صلی اللہ علیہ وآلہ وسلم کے پاس بھیجا اور کہا: کہ آپ صلی اللہ علیہ وآلہ وسلم کے پاس جاؤ اور آپ صلی اللہ علیہ وآلہ وسلم کو میرا سلام کہنا، پس میں آپ صلی اللہ علیہ وآلہ وسلم کے پاس آیا میں نے کہا کہ میرے والد آپ صلی اللہ علیہ وآلہ وسلم کو سلام کہہ رہے ہیں۔ آپ صلی اللہ علیہ وآلہ وسلم نے فرمایا: علیک و علی ابیک السلام۔ تجھ پر اور تیرے والد پر سلام ہو۔ [مصنف ابن ابي شيبه/ كتاب الأدب/حدیث: 27350]

حضرت محمد بن ابو المجالد فرماتے ہیں کہ میں نے حضرت ابن ابی اوفی سے عرض کیا: آپ کے بھتیجوں نے آپ کو سلام کہا ہے پھر مسجد والوں نے بھی۔ آپ نے جواب دیا۔ وَعَلَیْک وَعَلَیْہِمْ۔ [مصنف ابن ابي شيبه/ كتاب الأدب/حدیث: 27351]

حضرت اسود فرماتے ہیں کہ حضرت عبد اللہ بن مسعود رضی اللہ عنہ نے مجھ سے ارشاد فرمایا: جب تم حضرت عمر سے ملو، یا اسی طرح کی کوئی بات فرمائی، تو ان کو سلام کہنا۔ راوی کہتے ہیں کہ جب میں آپ سے ملا تو میں نے ان کو سلام کہا۔ آپ نے یوں جواب دیا۔ علیہ، یا وعلیہ، السلام ورحمۃ اللہ۔ [مصنف ابن ابي شيبه/ كتاب الأدب/حدیث: 27352]

حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم نے مجھ سے فرمایا: بیشک جبرائیل تمہیں سلام کہہ رہے ہیں۔ آپ نے یوں جواب دیا وعلیہ السلام ورحمۃ اللہ۔ [مصنف ابن ابي شيبه/ كتاب الأدب/حدیث: 27353]