حضرت ہشام فرماتے ہیں کہ حضرت حسن بصری نے اس شخص کے بارے میں جسے بار بار چھینک آرہی ہو یوں ارشاد فرمایا: کہ تم اسے ایک مرتبہ ہی یرحمک اللہ کہہ دو۔ [مصنف ابن ابي شيبه/ كتاب الأدب/حدیث: 27664]

حضرت منصور فرماتے ہیں کہ حضر ت مجاہد نے ارشاد فرمایا: ایسے شخص کو ایک مرتبہ یرحمک اللہ کہہ دینا کافی ہے۔ [مصنف ابن ابي شيبه/ كتاب الأدب/حدیث: 27665]

حضرت ابو المنبہ فرماتے ہیں کہ میں نے حسن بصری سے اس آدمی کے متعلق پوچھا: جو ٹھنڈ یا بارش کی وجہ سے ذمیوں کے پاس جانے کا محتاج ہے، کیا وہ ان سے اجازت طلب کرے؟ آپ نے فرمایا: جی ہاں!۔ [مصنف ابن ابي شيبه/ كتاب الأدب/حدیث: 27666]

حضرت ابن عون فرماتے ہیں کہ میں نے امام محمد سے پوچھا کہ میں اہل کتاب سے کیسے اجازت مانگوں؟ آپ نے فرمایا: اگر تم چاہو تو یوں کہو: ہدایت کی پیروی کرنے والوں پر سلام ہو، کیا میں داخل ہو جاؤں؟ [مصنف ابن ابي شيبه/ كتاب الأدب/حدیث: 27667]

حضرت حصین فرماتے ہیں کہ حضرت ابو مالک غفاری نے ارشاد فرمایا: جب تم کسی ایسے گھر میں داخل ہو جس میں مشرکین موجود ہوں تو تم یوں کہو: السَّلاَمُ عَلَیْنَا وَعَلَی عِبَادِ اللہِ الصَّالِحِینَ۔ ترجمہ: ہم پر اور اللہ کے نیک بندوں پر سلام ہو، وہ سمجھیں گے کہ تم نے ان کو سلام کیا حالانکہ تم نے ان سے سلام کو پھیر دیا ہے۔ [مصنف ابن ابي شيبه/ كتاب الأدب/حدیث: 27668]

حضرت ابراہیم فرماتے ہیں کہ حضرت عبد الرحمن بن یزید ذمیوں پر داخل ہونے سے پہلے اجازت طلب کرتے تھے۔ [مصنف ابن ابي شيبه/ كتاب الأدب/حدیث: 27669]

حضرت ابو سنان فرماتے ہیں کہ حضرت سعید بن جبیر نے ارشاد فرمایا: تم اہل کتاب پر بھی بغیر اجازت کے داخل مت ہو۔ [مصنف ابن ابي شيبه/ كتاب الأدب/حدیث: 27670]

حضرت ابراہیم فرماتے ہیں کہ حضرت اسود فرماتے تھے کہ کیا میں اندر آ جاؤں؟ [مصنف ابن ابي شيبه/ كتاب الأدب/حدیث: 27671]

حضرت مجاہد فرماتے ہیں کہ ایک آدمی کو حضرت ابن عمر رضی اللہ عنہما کے پاس چھینک آئی تو اس نے کہا: اشھب۔ حضرت ابن عمر رضی اللہ عنہما نے فرمایا: اشھب شیطان کا نام ہے، جو ابلیس نے چھینک اور الحمد للہ کے درمیان رکھا ہے تاکہ اس کا ذکر ہوجائے۔ [مصنف ابن ابي شيبه/ كتاب الأدب/حدیث: 27672]

حضرت مغیرہ فرماتے ہیں کہ حضرت ابراہیم مکروہ سمجھتے تھے کہ جب چھینک آئے تو یوں کہا جائے: اشھب۔ [مصنف ابن ابي شيبه/ كتاب الأدب/حدیث: 27673]